ប្រជាពលរដ្ឋខេត្តបាត់ដំបងអះអាងថា សមត្ថកិច្ចនៅមូលដ្ឋានបានឃុបឃិតជាមួយអ្នកមានលុយជួលប្រជាពលរដ្ឋកាប់ទន្ទ្រានដីព្រៃតំបន់ការពារនៅជាប់ព្រំដែនថៃក្នុងស្រុកសំឡូត ដើម្បីយកដីធ្វើជាកម្មសិទ្ធិ ហើយមិនមានអាជ្ញាធរណាទប់ស្កាត់នោះទេ។ មេឃុំសំឡូតបដិសេធចំពោះការចោទប្រកាន់នេះ។
ប្រជាពលរដ្ឋស្រុកសំឡូតព្រួយបារម្ភថា ព្រៃឈើតំបន់ការពារនៅជាប់ព្រំដែនថៃក្នុងស្រុកនេះនឹងហិនហោចក្នុងពេលឆាប់ៗ ខាងមុខ ប្រសិនបើអាជ្ញាធរមូលដ្ឋាននៅតែបណ្ដោយឲ្យជនប្រព្រឹត្តិលួចទន្ទ្រានព្រៃដោយសេរីនោះ។ សហគមន៍ការពារព្រៃឈើស្រុកសំឡូត អ្នកស្រី អ៊ុំ នឿម ថ្លែងប្រាប់អាស៊ីសេរីនៅរសៀលថ្ងៃទី១០កុម្ភៈថា ក្រុមអ្នកមានលុយបានជួលប្រជាពលរដ្ឋទៅកាប់បំផ្លាញព្រៃតំបន់ការពារនៅជាប់ព្រំដែនថៃដែលជាតំបន់ព្រៃក្រាសត្រង់ចំណុចសែនចៅនៅអមសង្ខាងផ្លូវច្រកព្រំដែន ក្នុងភូមិសំឡូត ឃុំសំឡូត បណ្ដាលឲ្យហិនហោចព្រៃឈើរាប់រយហិកតារ។អ្នកស្រីបន្តទៀតថា ក្រុមអ្នកមានលុយទំនងមានអ្នកធំនៅពីក្រោយខ្នងបានជាហ៊ានជួលពលរដ្ឋទន្ទ្រានព្រៃយ៉ាងច្រើនហិកតារដូច្នេះ ពីព្រោះអាជ្ញាធរមូលដ្ឋានក៏បានដឹងរឿងនេះដែរ ក៏ប៉ុន្តែធ្វើជាមិនដឹងមិនឭ ដោយមិនហ៊ានចាត់វិធានការទៅលើជនល្មើសនោះឡើយ៖ «ខ្ញុំស្ដាយណាស់តែមិនដឹងធ្វើមិចបើយើងធ្វើអីមិនកើតមានតែនិយាយទេ ព្រោះគេមានខ្សែធំហើយយើងត្រឹមតែប្រជាពលរដ្ឋធម្មតាធ្វើអីគេបាន។ បើថានៅកាប់ដូចសព្វថ្ងៃមិនយូរទេលីងហើយ។ហើយអ្នកស៊ីឈ្នួលកាប់ព្រៃមួយខែ៣លានរៀល គឺប្រជាពលរដ្ឋគាត់អត់មានការងារធ្វើចេះតែស៊ីឈ្នួលកាប់ឈើឲ្យគេទៅ ហើយគ្មានពីណាដោះស្រាយបានទេ សូម្បីតែមេភូមិក៏បិតមុខអស់ ព្រោះលុយបិទមុខក៏មិនដឹង បានជាគាត់មិនអើពើ»។ ចំណែកពលរដ្ឋនៅស្រុកសំឡូតសុំឲ្យបញ្ចេញឈ្មោះម្នាក់ទៀត អះអាងថា ជនខិលខូចបានទន្ទ្រានដីព្រៃនេះ តាំងពីវិច្ឆិការហូតមកទល់សព្វថ្ងៃ គឺព្រៃការពារបានក្លាយទៅជាទីវាលអស់រាប់រយហិកតារទៅហើយ។ពលរដ្ឋរូបនេះបន្ថែមទៀតថា ការទន្ទ្រានព្រៃនេះ ទំនងយកទៅសាងសងធ្វើជាសំណងអាគារ និងកាស៊ីណូ ព្រោះជាប់ព្រំដែនថៃដែលទើបមានការអភិវឌ្ឍន៍៖ «ខ្ញុំចង់ឲ្យនៅព្រៃឈើ កាត់ណាអស់ព្រែធ្វើឲ្យភ្លៀងមិនទៀងទាត់ ហើយពួកខ្ញុំកសិករដាំដំណាំមិនបានហូប ព្រោះអីកាលណាមានការអភិវឌ្ឍន៍គឺមានការទន្ទ្រានដីអស់ហើយព្រៃឈើគ្មានសង់ទេ។តំបន់នេះនោះប៉ូលិសនិងទាហាននៅទីនោះទាំងអស់ បើកច្រកនៅទីនោះ ហើយភាគច្រើនជាដីទាហាននិងប៉ូលិសនោះឯងអ្នកវាទទីយកដី។អ្នកឧទ្យានរក្សគ្នាបានត្រឹមតែទៅមើលព្រៃហើយត្រឡប់មកវិញមិនអាចធ្វើអីកើតទេ»។ អាស៊ីសេរីមិនអាចទាក់ទងអភិបាលស្រុកសំឡូតលោក សើ សាម៉េត ដើម្បីសុំអត្ថាធិប្បាយជុំវិញបញ្ហានេះបានទេ នៅថ្ងៃទី១០កុម្ភៈ ដោយទូរស័ព្ទពុំមានអ្នកទទួល។ ប៉ុន្តែមេឃុំសំឡូត លោក ធឹម ព្រឿង មានប្រសាសន៍ប្រាប់អាស៊ីសេរីថា ដីនេះជាតំបន់ដែលប៉ូលិសនិងទាហានប្រចាំការនៅទីនោះ ដោយមិនមានការទន្ទ្រានដីព្រៃដូចការចោទប្រកាន់របស់ប្រជាពលរដ្ឋនោះទេ៖ «មិនមានប្រជាជនរស់នៅដូចមិនមានទេ គ្រាន់តែថានៅចំណុចនោះជាតំបន់របស់ប្រជាពលរដ្ឋតាំងបីសម័យសង្គ្រាម ហើយចំការគាត់ចាស់កាលបីសម័យសង្គ្រាម ឥឡូវគាត់កាប់ឆ្ការព្រៃឫស្សីដែលដុតអីរឿងនេះវាមានមែន»។ ទោះយ៉ាងនេះក្ដីប្រជាពលរដ្ឋទាំង២រូបនៅតែអះអាងថា កាលពីដើមឆ្នាំ២០១៨ដែលមិនទាន់មានអ្នកចូលទៅកាប់ទន្ទ្រានគឺជាតំបន់ព្រៃឈើខៀវស្រស់បំព្រងសម្រាប់ជាជម្រកសត្វព្រៃ ដោយពុំមែនព្រៃកម្មសិទ្ធិរបស់បុគ្គលណាមួយនោះឡើយ។ មន្ត្រីសម្របសម្រួលសមាគមការពារសិទ្ធិមនុស្សអាដហុក(Adhoc)ប្រចាំខេត្តបាត់ដំបង លោក យិន ម៉េង លី មានប្រសាសន៍ថា ការទន្ទ្រានព្រៃឈើយកដីធ្វើជាកម្មសិទ្ធិជាអំពើខុសច្បាប់ ហើយអាជ្ញាធរពាក់ព័ន្ធត្រូវតែចាប់ជនប្រព្រឹត្តយកទៅផ្ដន្ទាទោសតាមច្បាប់។លោកបន្ថែមទៀតថា កន្លងមកបញ្ហាការទន្ទ្រានដីព្រៃរបស់រដ្ឋធ្វើជាកម្មសិទ្ធិនៅក្នុងខេត្តបាត់ដំបងកើតមានជាច្រើនករណី ក៏ប៉ុន្តែជាទូទៅអាជ្ញាធរច្រើនតែចាប់បានតែពលរដ្ឋក្រីក្រ រីឯអ្នកមានលុយនិងមានអំណាចមិនទាន់ចាប់យកមកផ្ដន្ទាទោសមានម្នាក់នៅឡើយទេ៖ «ហើយប្ដឹងជនប្រព្រឹត្តទៅតុលាការ ដើម្បីឲ្យទាំងនោះរាងចាលឬពេលខ្លះយើងឃើញពេលនៅព្រៃប្រជាពលរដ្ឋអ្នកកាប់ ដែលគាត់គ្រាន់តែស៊ីឈ្នួលគេយកលុយទេ តាមពិតដល់ដីស្រឡះទៅវាមិនមែនជាប្រជាពលរដ្ឋ វាអាចមានអ្នកមានលុយអ្នកមានអំណាចនៅក្រោយខ្នងទៅវិញ ហើយរឿងនេះត្រូវស្រាវជ្រាវទប់ស្កាត់ដើម្បីថែរក្សាព្រៃឈើនេះទុកឲ្យកូនចៅជំនាន់ក្រោយបានស្គាល់ផង»។ លោក យិន ម៉េង លី បន្ថែមទៀតថា ការអនុវត្តធូររលុងជាមូលហេតុធ្វើឲ្យព្រៃឈើហិនហោចឆាប់រហ័ស ព្រោះអ្នកប្រព្រឹត្តមិនខ្លាចច្បាប់ ហើយពួកគេចេះតែនាំគ្នាទៅទន្ទ្រានព្រៃយកដីបានតាមអំពើចិត្ត៕ កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments