កម្ពុជាបន្តរក្សាជំហរគាំទ្រនយោបាយចិនតែមួយ និងប្ដេជ្ញារឹតចំណងមិត្តភាពជាមួយប្រទេសចិនឱ្យកាន់តែស៊ីជម្រៅបន្ថែមទៀត ជាពិសេសក្នុងកិច្ចសហប្រតិបត្តិការវិស័យកសិកម្ម។ ប៉ុន្តែ អ្នកវិភាគព្រួយបារម្ភថា ពលរដ្ឋពឹងផ្អែកលើវិស័យកសិកម្មអាចបាត់បង់ផលប្រយោជន៍ ដោយសារតែចិននាំចូលកម្មករ និងអ្នកវិនិយោគពង្រីកការបោះទុនវិស័យកសិកម្មនៅកម្ពុជាកាន់តែច្រើននាថ្ងៃអនាគត។
ក្នុងកិច្ចប្រជុំលើកទី៧ នៃគណៈកម្មាធិការសម្របសម្រួលអន្តររដ្ឋាភិបាលកម្ពុជាចិនរវាងឧបនាយករដ្ឋមន្ត្រីលោក ស៊ុន ចាន់ថុល ជាមួយរដ្ឋមន្ត្រីក្រសួងការបរទេសចិន លោក វ៉ាង យី (WANG YI) នៅថ្ងៃទី២២ ខែមេសា ភាគីទាំងពីរប្ដេជ្ញាក្នុងការជំរុញវិស័យកសិកម្មកម្ពុជា ស្របតាមកិច្ចសហប្រតិបត្តិការ «ត្បូងពេជ្រ» ដែលភាគីកម្ពុជា និងចិន ឯកភាពបង្កើតឡើងកាលពីឆ្នាំ២០២៣។
ភាគីកម្ពុជា និងចិន បានចុះហត្ថលេខាលើឯកសារសំខាន់ៗ ៣ចំណុចរួមមាន គម្រោងផែនការមេអភិវឌ្ឍន៍កសិកម្មកម្ពុជា លក្ខខណ្ឌតម្រូវការអនាម័យក្នុងការផលិតផលចំណីសត្វសម្រាប់ទៅកាន់ប្រទេសចិន និងការផ្ដល់ជំនួយរបស់ប្រទេសចិនសម្រាប់ផ្គត់ផ្គង់ទឹកស្អាតនៅជនបទដែលជំនួយនេះ ភាគីកម្ពុជា និងចិនពុំបានបង្ហាញចំនួនទឹកប្រាក់ជាសាធារណៈនោះទេ។
អ្នកឃ្លាំមើលផ្នែកអភិវឌ្ឍសង្គម បណ្ឌិត មាស នី ប្រាប់វិទ្យុអាស៊ីសេរីនៅថ្ងៃទី២២ ខែមេសាថា កម្ពុជា និងចិនកំពុងប្រឹងប្រែងអភិវឌ្ឍវិស័យកសិកម្ម ស្របពេលពលរដ្ឋកម្ពុជា ផលិតកសិផលនៅមានកម្រិត និងខ្វះបច្ចេកទេសច្រើន។ លោកព្រួយបារម្ភថា បញ្ហានេះ អាចធ្វើឱ្យពលរដ្ឋខ្មែរបាត់បង់ផលប្រយោជន៍ពីវិស័យកសិកម្មកាន់តែច្រើននាថ្ងៃអនាគតដោយសារតែភាគីចិននឹងនាំអ្នកជំនាញមកបង្កើតរោងចក្រផ្ដោតលើវិស័យកសិកម្ម ហើយពលរដ្ឋដែលមានដីកសិកម្មអាចក្លាយជាកម្មករឱ្យក្រុមហ៊ុនចិន។
បណ្ឌិត មាស នី៖ «នៅពេលដែលចិនគិតអំពីការវិនិយោគក្នុងវិស័យកសិកម្ម នៅថ្ងៃខាងមុខអាច ចិនអាចបង្កើតការវិនិយោគវិស័យកសិកម្មនៅកម្ពុជាកាន់តែច្រើនឡើងៗ យកកម្ពុជាជាកន្លែងនាំចេញទៅខាងក្រៅវិញ ដោយសារតែពលរដ្ឋខ្មែរយើងមិនមានសមត្ថភាពគ្រប់គ្រាន់ ផលិតឱ្យត្រូវតាមស្តង់ដារ អ៊ីចឹងមានតែប្រទេសពីខាងក្រៅ ដូចជាចិនដែលគេមានទាំងធនធាន និងធនធានមនុស្សគេអាចមកផលិតនៅស្រុកខ្មែរ ហើយនាំចេញទៅក្រៅប្រទេស ហ្នុងហើយដែលកម្ពុជា កសិករខ្មែរអាចនឹងក្លាយចេញពីម្ចាស់ដី ទៅជាកម្មកររបស់ប្រទេសខាងក្រៅវិញក្នុងវិស័យកសិកម្ម»។
វិទ្យុអាស៊ីសេរីមិនអាចទាក់ទងអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា លោក ស៊ុន ចាន់ថុល ដើម្បីសាកសួរបន្ថែមបញ្ហានេះបានទេ នៅថ្ងៃទី២២ ខែមេសា។
វត្តមានរបស់រដ្ឋមន្ត្រីការបរទេសចិន លោក វ៉ាង យី ដែលកំពុងបំពេញទស្សនកិច្ចនៅកម្ពុជា បន្ទាប់ពីបញ្ចប់ដំណើរទស្សនកិច្ចនៅប្រទេសឥណ្ឌូនេស៊ី (Indonesia) និងប៉ាពួញូហ្គីណេ (Papua New Guinea) ត្រូវបានអ្នកជំនាញផ្នែកភូមិសាស្ត្រនយោបាយវាយតម្លៃថា ចិនកំពុងព្យាយាមបង្ហាញពីឥទ្ធិពលរបស់ខ្លួនមកលើប្រទេសកម្ពុជា និងប្រទេសមួយចំនួនក្នុងតំបន់។
ដំណើរទស្សនកិច្ចរបស់លោក វ៉ាង យី នៅកម្ពុជាក្រៅពីពង្រឹងទំនាក់ទំនងក្នុងនាមជាមិត្តដែកថែប និងកិច្ចសហប្រតិបត្តិការលើវិស័យកសិកម្ម ភាគីកម្ពុជា និងចិន ក៏បន្តប្រកាសក្នុងការគាំទ្រនយោបាយការពារដល់គ្នាទៅវិញទៅមក។ លោក វ៉ាង យី សារភាពថា ប្រទេសចិនជាដៃគូ ដែលគួរទុកចិត្ត និងជាអ្នកគាំទ្រខ្លាំងបំផុតដល់កម្ពុជា។
ជំនួបទ្វេភាគីជាមួយរដ្ឋមន្ត្រីការបរទេសចិន កាលពីថ្ងៃទី២១ ខែមេសា រដ្ឋមន្ត្រីក្រសួងការបរទេសកម្ពុជាលោក សុខ ចិន្តាសោភា អះអាងនៅចំពោះមុខភាគីចិនថា កម្ពុជានៅតែគាំទ្រគោលនយោបាយចិនតែមួយ។ លោកបញ្ជាក់ថា កម្ពុជាក៏ទន្ទឹងរង់ចាំក្នុងការធ្វើកិច្ចការជាមួយចិនបន្ថែមទៀត និងចង់ឃើញក្រុមហ៊ុនចិនមកវិនិយោគនៅកម្ពុជាកាន់តែច្រើន។
ពាក់ព័ន្ធរឿងនេះ អ្នកតាមដានភូមិសាស្ត្រតំបន់អាស៊ីអាគ្នេយ៍ និងប៉ាស៊ីហ្វិក លោក សេង វណ្ណលី លើកឡើងថា ដំណើរទស្សនកិច្ចរបស់លោក វ៉ាង យី មកកម្ពុជាបង្ហាញទាំងសញ្ញាវិជ្ជមាន និងអវិជ្ជមាន ក្នុងបរិបទនៃទំនាក់ទំនងប្រទេសទាំងពីរកំពុងរងការចោទប្រកាន់លើគម្រោងមួយចំនួនដូចជាកំពង់ផែរាម និងព្រែកជីកហ្វូណន ថា បម្រើឱ្យយោធាចិន។
លោក សេង វណ្ណលី៖ «ចិនគាត់ដឹងច្បាស់ពីប្រទេសមួយចំនួនប្រតិកម្មប្រទេសមួយចំនួន ដែលរងផលប៉ះពាល់ពីគម្រោងព្រែកជីកហ្វូណន ក៏ដូចជាប្រទេសមួយចំនួន ដែលព្រួយបារម្ភពីការធ្វើទំនើបកម្ម ឬការពង្រីក ពង្រឹង និងការបង្កើនសកម្មភាពយោធារបស់ចិនក្នុងតំបន់ឥណ្ឌូប៉ាស៊ីហ្វិក ជាពិសេស តំបន់សមុទ្រចិនខាងត្បូង វាអាចជាសារមួយដែរ ក្នុងដំណើរទស្សនកិច្ចហ្នឹង ដើម្បីបង្ហាញថា ចិននឹងមិនងាកឆ្ងាយពីការផ្តល់សារសំខាន់ដល់ទំនាក់ទំនងរបស់ខ្លួនជាមួយកម្ពុជាទេ។ ចិនខ្លួនខ្ញុំគិតថា មកដើម្បីធានានូវការតាំងចិត្តរបស់ខ្លួន ចំពោះរដ្ឋាភិបាលដឹកនាំដោយក្រុមជំនាន់ថ្មីរបស់គណបក្សប្រជាជនកម្ពុជាថា ចិននៅតែជាមិត្តដែលអាចជឿទុកចិត្តបាន»។
ចំណែកលទ្ធផលនៃជំនួបទ្វេភាគីរវាងរដ្ឋមន្ត្រីក្រសួងការបរទេសចិន លោក វ៉ាង យី ជាមួយលោកនាយករដ្ឋមន្ត្រី ហ៊ុន ម៉ាណែត នៅរសៀលថ្ងៃទី២២ មេសា ភាគីទាំងពីរមិនទាន់បង្ហាញលទ្ធផលនៅឡើយ។
អ្នកវិភាគនយោបាយលើកឡើងថា ជំហរនយោបាយកម្ពុជា និងចិន បង្កើនទំនាក់ទំនងកាន់តែជិតស្និទ្ធបែបនេះ នឹងធ្វើឱ្យប្រទេសមួយចំនួនក្នុងតំបន់កាន់តែព្រួយបារម្ភអំពីមហិច្ឆតានៃការពង្រីកឥទ្ធិពលចិន ដោយសារតែចិនសម្លឹង ឃើញកម្ពុជាជាទីតាំងភូមិសាស្ត្រនយោបាយ សម្រាប់ទប់ទល់បញ្ហាក្នុងតំបន់ និងប្រជែងឥទ្ធិពលជាមួយប្រទេសមហាអំណាចលោកសេរី។ អ្នកឃ្លាំមើលមួយចំនួនព្រមានថា កម្ពុជាអាចធ្លាក់ចូលអន្ទាក់ភូមិសាស្ត្របម្រើមហិច្ឆតានយោបាយចិន និងធ្វើអ្វីៗតាមដែលចិនចង់បាន ប្រសិនបើកម្ពុជានៅតែគ្មានសមត្ថភាពកសាងប្រទេស ពង្រឹងសេដ្ឋកិច្ចដោយខ្លួនឯង និងរង់ចាំតែរស់ពឹងដង្ហើមពីប្រទេសចិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments