តំណាងរដ្ឋាភិបាលកម្ពុជាប្រចាំអង្គការសហប្រជាជាតិលើកឡើងថា ការទាមទាររបស់អ្នកជំនាញអង្គការសហប្រជាជាតិដើម្បីសិទ្ធិមនុស្សឱ្យដោះលែងមេដឹកនាំសហជីព កញ្ញា ឈឹម ស៊ីថរ ឱ្យមានសេរីភាព គឺជាការមើលងាយដល់សមត្ថកិច្ច និងសុច្ចរិតភាពរបស់តុលាការកម្ពុជា។ ទោះបីជាយ៉ាងណា មន្ត្រីអង្គការសង្គមស៊ីវិលយល់ឃើញថា ការលើកឡើងរបស់អ្នកជំនាញ អ.ស.ប នេះគឺជាការផ្ដល់មតិយោបល់ក្នុងនាមកម្ពុជាជាប្រទេសដែលផ្ដល់សច្ចាប័នលើឧបករណ៍សិទ្ធិមនុស្ស ស្របតាមច្បាប់ជាតិ និងអន្តរជាតិ មិនមែនជាការមើលងាយឡើយ។
ស្ថានបេសកកម្មអចិន្ត្រៃយ៍កម្ពុជាប្រចាំការិយាល័យអង្គការសហប្រជាជាតិ និងអង្គការអន្តរជាតិនានា នៅទីក្រុងហ្សឺណែវ (Geneva) យល់ឃើញថា សេចក្ដីថ្លែងការណ៍របស់ អ.ស.ប ជំរុញឱ្យគោរពសិទ្ធិមនុស្សគឺជាការបំភ័ន្តប្រាសចាកពីការពិត និងមានការរើសអើង។
តំណាងកម្ពុជានៅអង្គការសហប្រជាជាតិ លោក អ៊ិន តារា បានចេញសេចក្ដីថ្លែងការណ៍ កាលពីថ្ងៃទី៥ ខែឧសភា បដិសេធទាំងស្រុងជុំវិញការលើកឡើងរបស់អ្នកនាំពាក្យនៃការិយាល័យ អ.ស.ប ទទួលបន្ទុកសិទ្ធិមនុស្ស លោក ជេរេមី ឡរែនស៍ (Jeremy Laurence) កាលពីពេលថ្មីៗ នេះ គឺជាការបំភ័ន្តដែលមិនឆ្លុះបញ្ចាំងពីការអនុវត្តនីតិវិធីរបស់តុលាការកម្ពុជា។ តំណាងកម្ពុជារូបនេះចាត់ទុកការស្នើឱ្យតុលាការកម្ពុជាដោះលែង កញ្ញា ឈឹម ស៊ីថរ និងទម្លាក់បទចោទលើសមាជិកសហជីពផ្សេងទៀតឱ្យមានសេរីភាព គឺជាការមើលងាយដល់តុលាការ។ លោក អ៊ិន តារា បានថ្លែងការពារតុលាការកម្ពុជាថា ការចាប់ខ្លួនកញ្ញា ឈឹម ស៊ីថរ គឺដោយសារកញ្ញាដឹកនាំធ្វើកូដកម្មខុសច្បាប់ និងទទួលលុយឧបត្ថម្ភពីបរទេស។
ការឆ្លើយតបរបស់តំណាងកម្ពុជានេះធ្វើឡើងបន្ទាប់ឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សបានចេញសេចក្ដីថ្លែងការណ៍ កាលពីថ្ងៃទី៣ ខែឧសភា សម្ដែងក្ដីព្រួយបារម្ភ និងស្នើដល់អាជ្ញាធរកម្ពុជាទម្លាក់ចោលបទចោទប្រឆាំងនឹងក្រុមកូដករណាហ្គាវើលដ៍។ ការអំពាវនាវនេះ គឺក្រោយពេលតុលាការកំពូលតម្កល់ការផ្ដន្ទាទោសលើថ្នាក់ដឹកនាំ និងសមាជិកសហជីពចំនួន ៩នាក់ឱ្យជាប់ពន្ធនាគារចន្លោះពី ១ឆ្នាំ ដល់ ២ឆ្នាំ ក្រោមបទចោទ «ញុះញង់» ទាំងអយុត្តិធម៌។ អ្នកនាំពាក្យឧត្ដមស្នងការអ.ស.ប ទទួលបន្ទុកសិទ្ធិមនុស្ស លោក ជេរេមី ឡរែនស៍ (Jeremy Laurence) ជំរុញឱ្យរដ្ឋាភិបាលកម្ពុជាធានាឱ្យបានពេញលេញនូវកិច្ចការពារសិទ្ធិមនុស្ស ដែលខ្លួនបានទទួលស្គាល់ក្រោមច្បាប់អន្តរជាតិ និងបង្កើតបរិយាកាសឱ្យមនុស្សគ្រប់រូបអាចអនុវត្តសិទ្ធិរបស់ខ្លួនបានដោយសេរី ។
វិទ្យុអាស៊ីសេរីមិនអាចទាក់ទង អ្នកនាំពាក្យគណៈកម្មាធិការសិទ្ធិមនុស្សកម្ពុជា លោក ស្រ៊ាង ចិន្តា ដើម្បីសុំការបញ្ជាក់បន្ថែមជុំវិញរឿងនេះបានទេ នៅថ្ងៃទី៦ ខែឧសភា។
ទាក់ទងនឹងរឿង ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា យល់ឃើញថា ការលើកឡើងពីក្ដីបារម្ភ ចំពោះតុលាការផ្ដន្ទាទោសលើថ្នាក់ដឹកនាំសហជីព និងសមាជិកសហជីពមិនមែនជាការរើសអើង ឬមើលងាយដល់តុលាការកម្ពុជាឡើយ។ ផ្ទុយទៅវិញ លោកថា កម្ពុជាគួរតែកែលំអចំណុចខ្វះខាតរបស់ខ្លួន តាមការស្នើសុំរបស់អ្នកជំនាញអង្គការសហប្រជាជាតិ និងដោះលែងកញ្ញា ឈឹម ស៊ីថរ ឱ្យមានសេរីភាពឡើងវិញ។
លោក នី សុខា៖ «ផ្ទុយទៅវិញរឿងដែលអាប់ឱនកិត្តិយស ប្រសិនបើការផ្ដល់មតិយោបល់ទៅហើយ រដ្ឋាភិបាលយើង នៅតែសោះអង្គើយ មិនព្រមឆ្លើយតប មិនព្រមដោះស្រាយបញ្ហាទាំងអស់ហ្នឹង។ ខ្ញុំគិតថា រឿងហ្នឹងទៅវិញទេដែលជារឿងប៉ះពាល់កិត្តិយស ទៅមុខមាត់រដ្ឋាភិបាល ពីព្រោះយើងដឹងហើយកន្លងមកប្រសិនបើរដ្ឋាភិបាលដោះស្រាយបញ្ហាសិទ្ធមនុស្ស។ រដ្ឋាភិបាលប្រទេសមួយចំនួនដែលគេគោរពសិទ្ធិមនុស្ស គេដោះស្រាយបញ្ហាសិទ្ធិមនុស្ស ឆ្លើយតបបញ្ហាសិទ្ធិមនុស្សគឺថាជាកិត្តិយសទៅវិញទេ»។
ក្រៅពីឧត្ដមស្នងការ អ.ស.ប ទទួលបន្ទុកសិទ្ធិមនុស្សបានចេញសេចក្ដីថ្លែងការណ៍ទាមទារឱ្យដោះលែង កញ្ញា ឈឹម ស៊ីថរ និងទម្លាក់ចោលបទចោទលើសមាជិកសហជីពចំនួន ៨នាក់ផ្សេងទៀត ក៏មានអង្គការ សមាគម ក្នុងស្រុកចំនួន ៥០ស្ថាប័ននៅថ្ងៃទី៦ ខែឧសភា បានរួមគ្នាចេញសេចក្ដីថ្លែងការណ៍រួមមួយ ក្រោមចំណងជើងថា «គ្រប់គ្រាន់ហើយ សូមបញ្ឈប់ការធ្វើទុក្ខបុកម្នេញថ្នាក់ដឹកនាំ និងសមាជិកសហជីពណាហ្គាវើលដ៍»។ អង្គការ សមាគមទាំងនោះ រួមមាន សម្ព័ន្ធខ្មែរជំរឿន និងការពារសិទ្ធិមនុស្សលីកាដូ (LICADHO) សមាគមបណ្ដាញយុវជនកម្ពុជា (CYN) សម្ព័ន្ធសហជីពកម្ពុជា (CATU) និងអង្គការសមាគមផ្សេងទៀត។ ក្រុមអង្គការ សមាគម និងសហជីពទាំងអស់នេះ លើកឡើងថា រដ្ឋាភិបាលបានប្រើប្រព័ន្ធតុលាការធ្វើទុក្ខបុកម្នេញលើសមាជិក និងថ្នាក់ដឹកនាំសហជីពណាហ្គាវើលដ៍ ។ ជាងនេះទៅទៀត ក្រុមកូដកររងការរំលោភបំពានពីកងសន្តិសុខ និងអាជ្ញាធររាជធានីភ្នំពេញ ទាំងផ្លូវកាយ ផ្លូវចិត្ត និងបំពារបំពានកេរ្តិ៍ភេទ ដែលសកម្មភាពទាំងនេះគឺជារូបភាពបង្ហាញថា អាជ្ញាធរព្យាយាមបំភិតបំភ័យ គំរាមកំហែង និងធ្វើទុក្ខបុកម្នេញលើកូដករដែលធ្វើកូដកម្មដោយអហិង្សា ជាជាងជួយដោះស្រាយបញ្ហាប្រឈម។
ក្រុមអង្គការជាតិ និងអន្តរជាតិ សម្ដែងការព្រួយបារម្ភ និងសោកស្ដាយចំពោះការផ្ដន្ទាទោសលើសមាជិកសហជីពណាហ្គាវើលដ៍។ ពួកគាត់ទទូចឱ្យតុលាការដោះលែងប្រធានសហជីពកញ្ញា ឈឹម ស៊ីថរ និងផ្ដល់នូវសេរីភាពពេញលេញដល់សមាជិកសហជីពទាំងអស់ ព្រមទាំងបញ្ឈប់ការធ្វើទុក្ខបុកម្នេញលើក្រុមអ្នកការពារសិទ្ធិមនុស្ស៕
From ព័ត៌មានថ្មីៗ | RFA
via_IFTTT
0 Comments