អគ្គនាយកដ្ឋានគយ និងរដ្ឋាករកម្ពុជា បានបង្ក្រាបបំណែកសាច់បង្កក និងគ្រឿងក្នុងសត្វ ខូចគុណភាពជាច្រើនតោន ដែលឈ្មួញលួចនាំចូលខុសច្បាប់តាមច្រករបៀង។ គ្រូពេទ្យជំនាញ បារម្ភថា សាច់បង្កកខូចគុណភាពទាំងនេះ មានផ្ទុកសារធាតុគីមី ដែលធ្វើឱ្យប៉ះពាល់ដល់សុខភាពអ្នកបរិភោគនៅថ្ងៃមុខ។
ការនាំចូលបំណែកសាច់បង្កក និងគ្រឿងក្នុងសត្វខូចគុណភាពខុសច្បាប់ ហាក់មិនថយចុះនោះទេ ទោះបីជាថ្នាក់ដឹកនាំ បានប្រកាសឱ្យផ្អាកនាំចូល យ៉ាងណាក្ដី។
អគ្គនាយកដ្ឋានគយ និងរដ្ឋាករកម្ពុជា បង្ក្រាបបំណែកសាច់នាំចូលខុសច្បាប់ចំនួន ២ករណី សរុបជាង ៤តោន (៤.៥៥០គីឡូក្រាម) ដែលនាំចូលគ្មានឯកសារ ខូចគុណភាព វេចខ្ចប់គ្មានអនាម័យ កាលពីថ្ងៃទី២២ ខែមេសា នៅខេត្តស្វាយរៀង និងខេត្តបន្ទាយមានជ័យ។ កន្លងមកអាជ្ញាធរក៏បានរឹបអូសបំណែកសាច់បង្កក និងគ្រឿងក្នុងសត្វខូចគុណភាព និងខុសច្បាប់នេះជាង ១០តោន កាលពីថ្ងៃទី២១ និងទី២០ ខែមេសា។
ប្រធានសមាគមគ្រូពេទ្យគុណធម៌កម្ពុជា លោកវេជ្ជបណ្ឌិត អ៊ូច វុឌ្ឍី មានប្រសាសន៍ថា សាច់បង្កក និងគ្រឿងក្នុងសត្វ ដែលនាំចូលខូចគុណភាព ជាទូទៅមានផ្ទុកសារធាតុគីមី សម្រាប់បង្ការសាច់កុំឱ្យស្អុយ ដែលសារធាតុទាំងអស់នេះ នឹងធ្វើឱ្យប៉ះពាល់ដល់សុខភាពអ្នកបរិភោគ និងបង្កជាជំងឺមានដូចជា រលាកពោះវៀនធំ រលាកក្រពះ ជាពិសេសគឺជំងឺមហារីក។
វេជ្ជបណ្ឌិត អ៊ូច វុឌ្ឍី៖ «ដូចជាសាច់ជ្រូក សាច់គោសាច់ក្របីអីហ្នឹង ស្រុកយើងមានតើ ប៉ុន្តែមិនដឹងយ៉ាងម៉េច ប្រទេសយើងតូចមួយ ប្រជាជនតិចមួយ ហើយចេះតែនាំចូលមក។ ប្រសិនបើយើងមិនទប់ស្កាត់ ហើយចេះតែនាំចូលមក ហើយយើងអត់ដឹងយើងចេះតែបរិភោគ ថ្ងៃក្រោយប៉ះពាល់ដល់សុខភាពបងប្អូនប្រជាពលរដ្ឋយើង មិនថាចាស់ក្មេង វាប្រឈមទៅអនាគត ហើយយើងយូរៗយើងក្រិនអស់ ដោយសារតែជំងឺផ្សេងៗហ្នឹង»។
កាលពីថ្ងៃទី៩ ខែមករា ក្រសួងពាណិជ្ជកម្ម និងក្រសួងកសិកម្ម រុក្ខាប្រមាញ់ និងនេសាទ បានសម្រេចផ្អាកជាបណ្ដោះអាសន្នសម្រាប់រយៈពេល ០៦ខែ ដោយចាប់ផ្ដើមអនុវត្តពីថ្ងៃទី១២ ខែមីនា រហូតដល់ថ្ងៃទី១២ ខែកញ្ញា ឆ្នាំ២០២៤ នូវការនាំចូលបំណែកសាច់បង្កក និងគ្រឿងក្នុងសត្វ មានដូចជា អណ្ដាត និងថ្លើម សត្វគោ ក្របី និងបំណែកសាច់គ្រឿងក្នុងដូចជា ជ្រូក មាន់ ដែលអាចបរិភោគបានក្រៅពី ស្លាប ភ្លៅ ថ្លើម និងសាច់ត្រូវយកឆ្អឹងចេញ។
ក្រុមប្រឹក្សាភិបាលរបស់អង្គការសាមគ្គីភាពកសិករកម្ពុជា លោក ឌី គន្ធា យល់ឃើញថា ការនាំចូលសាច់បង្កករាប់តោន យកមកចែកចាយក្នុងស្រុកបែបនេះ មិនត្រឹមតែធ្វើឱ្យប៉ះពាល់ដល់សុខភាពអ្នកបរិភោគប៉ុណ្ណោះទេ ប៉ុន្តែក៏ប៉ះពាល់ដល់កសិករចិញ្ចឹមសត្វក្នុងស្រុកផងដែរ។
លោក ឌី គន្ធា៖ «ពលរដ្ឋខ្មែរយើង គឺគាត់មិនបានទទួលវគ្គបណ្ដុះបណ្ដាលបច្ចេកទេសពាក់ព័ន្ធទៅនឹងការត្រួតពិនិត្យគុណភាពចំណីអាហារ ថាតើផលិតផលផ្លែឈើ បន្លែ ឬក៏អាហារកែច្នៃ ឬក៏សាច់ ដែលលក់នៅលើទីផ្សារហ្នឹង មានសារធាតុគីមីយ៉ាងណានោះទេ។ គាត់ពឹងផ្អែកទៅលើក្រុមការងារបច្ចេកទេស គណៈកម្មការត្រួតពិនិត្យចំណីអាហាររបស់រដ្ឋ អ៊ីចឹងក្រុមការងារទាំងអស់ត្រូវបង្ហាញឆន្ទៈនយោបាយទទួលខុសត្រូវខ្ពស់បំផុត»។
របាយការណ៍អគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ(ក.ប.ប) ចេញផ្សាយថ្ងៃទី២៤ ខែតុលា ឱ្យដឹងថា ក្នុងរយៈពេល ៩ខែ ក្នុងឆ្នាំ២០២៣ អាជ្ញាធរ បានរឹបអូសសាច់បង្កកចម្រុះខូចគុណភាព មានផ្ទុកសារធាតុគីមីហាមឃាត់ និងមេរោគចម្លង បានជិត ២ពាន់តោន ដែលចំនួននេះមានការកើនឡើង ១៥ភាគរយ បើធៀបនឹងរយៈពេលដូចគ្នាកាលពីឆ្នាំមុន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments