អ្នកឃ្លាំមើលសង្គម និងសាធារណជន រិះគន់រដ្ឋបាលខេត្តព្រះសីហនុ ដែលអនុញ្ញាតឲ្យក្រុមហ៊ុនស្រាបៀ និងក្រុមហ៊ុនឆ្នោតកីឡាជាតិ ដាក់ពង្រាយផ្ទាំងប៉ាណូផ្សាយពាណិជ្ជកម្មតាមបង្គោលភ្លើងតាមផ្លូវសាធារណៈ និងតាមឆ្នេរសមុទ្រ គ្របដណ្ដប់ស្ទើរទូទាំងក្រុងទេសចរណ៍មួយនេះនាឱកាសពិធីបុណ្យសមុទ្រ នៅថ្ងៃទី២៣ ដល់ថ្ងៃទី២៥ ខែធ្នូ។
សាធារណជន និងភ្ញៀវទេសចរដែលចូលទស្សនានៅតាមតំបន់ឆ្នេរឯករាជ្យ និងតាមឆ្នេរអូរឈើទាល នៅចុងខែធ្នូ ឆ្នាំ២០១៦ មិនពេញចិត្តចំពោះរដ្ឋបាលខេត្តព្រះសីហនុ ដែលអនុញ្ញាតឲ្យក្រុមហ៊ុនស្រាបៀ និងឆ្នោតកីឡាជាតិ ដំឡើងផ្ទាំងប៉ាណូផ្សាយពាណិជ្ជកម្មនៅតាមសួនច្បារ តាមបង្គោលភ្លើងបំភ្លឺផ្លូវសាធារណៈ និងតាមឆ្នេរសមុទ្រមួយចំនួន។
បញ្ហានេះ អ្នកឃ្លាំមើលសង្គម និងភ្ញៀវទេសចរមួយចំនួន ទទួលស្គាល់ភាពរីកចម្រើននៃការស្ដារហេដ្ឋារចនាសម្ព័ន្ធនានារបស់រដ្ឋបាលខេត្តនេះ មានដូចជា ការស្ថាបនាផ្លូវថ្នល់បានធំទូលាយ ស្ថាបនាសួនច្បារ និងបំពាក់ភ្លើងបំភ្លឺ ជាដើម មានសោភណភាពគួរជាទីគយគន់ទាំងយប់ថ្ងៃ ជាពិសេសសោភណភាពស្រស់បំព្រងនៅពេលរាត្រី។
អ្នកសម្របសម្រួលអង្គការលីកាដូ (LICADHO) ប្រចាំខេត្តព្រះសីហនុ លោក ប៊ួន ណារិទ្ធិ ពោលសរសើរ និងគាំទ្រសកម្មភាពអភិវឌ្ឍន៍ទីតាំងមួយចំនួនរបស់រដ្ឋបាលខេត្តព្រះសីហនុ ត្រៀមស្វាគមន៍ភ្ញៀវទេសចរក្នុងពិធីបុណ្យសមុទ្រឆ្នាំនេះ។ ទន្ទឹមគ្នានេះ លោក ប៊ួន ណារិទ្ធិ បានរិះគន់រដ្ឋបាលខេត្តនេះ មិនគួរអនុញ្ញាតឲ្យក្រុមហ៊ុនផ្សព្វផ្សាយផលិតផលស្រាបៀ និងក្រុមហ៊ុនឆ្នោតកីឡាជាតិ ជាដើម ដាក់ពង្រាយស្តង់ឃោសនា និងដាក់តាំងផ្ទាំងប៉ាណូតាមផ្លូវសាធារណៈ និងតាមតំបន់ឆ្នេរច្រើនពេកទេ ព្រោះអាចរងការរិះគន់ពីភ្ញៀវទេសចរជាតិ និងអន្តរជាតិទៅលើការផ្សព្វផ្សាយទាំងនេះ៖ «បើប្រៀបធៀបឆ្នាំមុនៗ គឺឆ្នាំនេះ ខេត្តព្រះសីហនុ យើង គឺមានសោភណភាពល្អប្លែក និងអាចទាក់ទាញដល់កំណើនភ្ញៀវទេសចរជាតិ និងអន្តរជាតិ មកកម្សាន្តពិធីបុណ្យសមុទ្រឆ្នាំនេះ មិនឲ្យខកចិត្តនោះទេ។ ភ្ញៀវទេសចរនៅពេលមកដល់ខេត្តព្រះសីហនុ នឹងបានឃើញសោភណភាពស្រស់ស្អាតជាងពេលមុន»។
ត្រង់ចំណុចនេះ ភ្ញៀវទេសចរសំណូមពរឲ្យរដ្ឋបាលខេត្តនេះ ត្រូវដកផ្ទាំងប៉ាណូ ឬស្លាកសញ្ញាផ្សាយពាណិជ្ជកម្មផលិតផលស្រាបៀ ជាពិសេសផ្ទាំងប៉ាណូផ្សាយពាណិជ្ជកម្មឆ្នោតកីឡាជាតិ ដែលដាក់តាំងនៅតាមផ្លូវសាធារណៈសំខាន់ៗ និងទីតាំងក្បែរវេទិការៀបចំពិធីបុណ្យសមុទ្រនាឆ្នេរឯករាជ្យ ដែលលោកនាយករដ្ឋមន្ត្រី ហ៊ុន សែន នឹងចូលរួមបើកសម្ពោធពិធីនេះ ដើម្បីកុំឲ្យប៉ះពាល់ដល់កិត្តិយសរបស់ប្រមុខដឹកនាំរដ្ឋាភិបាល៖ «ខ្ញុំសំណូមពរឲ្យរដ្ឋបាលខេត្តព្រះសីហនុ ដកធុងឆ្នោតមានពណ៌ក្រហមទាំងអស់ចេញពីតំបន់ឆ្នេរអូរឈើទាល និងឆ្នេរឯករាជ្យ ហើយទុកទីតាំងទាំងនោះ ផ្តល់ជូនប្រជាពលរដ្ឋលេងល្បែងប្រជាប្រិយកម្សាន្ត និងចុះងូតទឹកសមុទ្រជាដើម ដើម្បីកុំឲ្យប៉ះពាល់ដល់អារម្មណ៍គាត់ ហើយធុងឆ្នោត ឬស្តង់ឆ្នោតពណ៌ក្រហម ដែលត្រូវគេដាក់ពង្រាយនៅតាមឆ្នេរឯករាជ្យ និងឆ្នេរអូរឈើទាល រាល់ថ្ងៃនេះ យើងមើលទៅមិនសមភ្នែក ឬមិនគួរល្អទាល់តែសោះ។ វប្បធម៌ដូនតាយើងកន្លងមក ហាក់មិនបង្ហាញស្លាកសញ្ញាផលិតផលស្រាបៀ និងផ្សាយពាណិជ្ជកម្មល្បែងស៊ីសងជាសាធារណៈដូចពេលបច្ចុប្បន្ននេះពេកទេ។ ប៉ុន្តែសព្វថ្ងៃនេះ ហាក់ធ្វើឲ្យខូចសោភណភាព ឬបង្ហាញនូវវប្បធម៌មិនល្អ និងបង្កើតឲ្យមានក្មេងទំនើង ឬបង្ហាញពីភាពស្រវឹងកោងកាចជាដើម ធ្វើឲ្យខូចសណ្ដាប់ធ្នាប់ប្រទេសជាតិ និងប៉ះពាល់ដល់អារម្មណ៍ភ្ញៀវជាតិ អន្តរជាតិ»។
ទាក់ទិនបញ្ហានេះ ថ្នាក់ដឹកនាំខេត្តព្រះសីហនុ ចាប់ពីថ្នាក់អភិបាល និងអភិបាលរងខេត្ត បានបដិសេធមិនធ្វើអត្ថាធិប្បាយទៅលើមតិរិះគន់របស់សាធារណជន ទៅលើការដាក់តាំងផ្ទាំងប៉ាណូផ្សាយពាណិជ្ជកម្មផលិតផលស្រាបៀ និងឆ្នោតកីឡាជាតិនៅតាមផ្លូវសាធារណៈមួយចំនួន មានផ្លូវឯករាជ្យ តាមឆ្នេរអូរឈើទាល និងឆ្នេរឯករាជ្យនេះទេ។
ទោះជាបែបនេះក្តី សាធារណជនបានទទូចឲ្យអភិបាលខេត្តព្រះសីហនុ លោក យន្ត មីន ត្រូវណែនាំឲ្យក្រុមហ៊ុនស្រាបៀ និងក្រុមហ៊ុនឆ្នោតកីឡាជាតិ ឲ្យកាត់បន្ថយផ្ទាំងប៉ាណូផ្សាយពាណិជ្ជកម្មផលិតផលស្រាបៀ និងផ្ទាំងប៉ាណូផ្សាយពាណិជ្ជកម្មឆ្នោតកីឡាជាតិ ចេញពីទីតាំងតាមផ្លូវសាធារណៈសំខាន់ៗ និងឆ្នេរសមុទ្រមួយចំនួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments