មេធាវីបញ្ជាក់នៅមុខតុលាការកំពូលថា ប្រធានបក្សបេះដូងជាតិលោក សៀម ភ្លុក និងមន្ត្រីគណបក្សភ្លើងទៀនពីររូបទៀត ដែលកំពុងជាប់ឃុំ គឺជាមនុស្សស្អាតស្អំ ហើយស្នើឱ្យដោះលែងពួកគេឱ្យមានសេរីភាពឡើងវិញ។ ការសំអាងនេះ ធ្វើឡើងនៅពេលតុលាការកំពូលបើកសវនាការជំនុំជម្រះក្តីជុំវិញសំណុំរឿងក្លែងឯកសារបង្កើតគណបក្សបេះដូងជាតិ ហើយដែលតុលាការកំពូលគ្រោងប្រកាសសាលដីកា នៅថ្ងៃទី១៣ ខែឧសភាខាងមុខនេះ។
ក្រុមប្រឹក្សាជំនុំជម្រះនៃតុលាការកំពូល នៅព្រឹកថ្ងៃទី២៩ មេសា បានបើកសវនាការជំនុំជម្រះក្ដីលើបណ្ដឹងសាទុក្ខរបស់ស្ថាបនិកគណបក្សបេះដូងជាតិ លោក សៀម ភ្លុក និងមន្ត្រីគណបក្សភ្លើងទៀនពីររូបទៀត គឺ លោក ខឿន វីរ៉ាត់ អ្នកស្រី នូ សុទ្ធារី ក្នុងសំណុំរឿងក្លែងបន្លំឯកសារ ដើម្បីបង្កើតគណបក្សបេះដូងជាតិ កាលពីឆ្នាំ២០២១។
សវនាការរយៈពេលមួយព្រឹកនេះ ភាគច្រើនមេធាវីការពារក្តីឱ្យជនជាប់ចោទ គឺលោក ជូង ជូងី និងលោក អែម ចន្ថា បានលើកឡើងពីអង្គច្បាប់ អង្គសេចក្ដីបញ្ជាក់ទៅក្រុមប្រឹក្សាជំនុំជម្រះពិចារណាទម្លាក់ចោលការចោទប្រកាន់ និងដោះលែងកូនក្តីឱ្យមានសេរីភាព។ ចំណែកតំណាងអយ្យការវិញ ស្នើតម្កល់សាលដីការបស់តុលាការថ្នាក់ក្រោមទុកជាបានការដដែល។ តែទោះយ៉ាងណាក្ដី ក្រោយស្ដាប់ការបកស្រាយ និងសំណើរបស់មេធាវីការពារក្ដីជនជាប់ឃុំរួចហើយ ប្រធានក្រុមប្រឹក្សាជំនុំជម្រះ លោក យូរ ឧត្តរា បានសម្រេចលើកពេលប្រកាសសាលដីកាលើបណ្ដឹងជំទាស់នេះ ទៅព្រឹកថ្ងៃទី១៣ ខែឧសភា។
មេធាវីការពារក្ដីលោក សៀម ភ្លុក និងជាមេធាវីរបស់មន្ត្រីគណបក្សភ្លើងទៀន លោក អែម ចន្ថា ប្រាប់វិទ្យុអាស៊ីសេរីក្រោយពេលសវនាការថា កូនក្ដីរបស់លោកមិនបានក្លែង ឬប្រើប្រាស់ឯកសារក្លែងដូចការចោទប្រកាន់កន្លងមកនោះទេ។ លោកឱ្យដឹងថា លោក សៀម ភ្លុក គឺជាអ្នកយកឯកសារស្នើសុំបង្កើតបក្សបេះដូងជាតិទៅដាក់នៅក្រសួងមហាផ្ទៃដោយគ្មានចេតនាធ្វើឱ្យខូចស្នាមមេដៃខុស ឬបន្លំស្នាមមេដៃទេ ពីព្រោះគាត់មិនដឹងថា ស្នាមមេដៃ ដែលប្រមូលមកនោះមានបញ្ហានោះឡើយ។ លោកបន្តថា ចំណែកលោក ខឿន វីរ៉ាត់ និងអ្នកស្រី នូ សុទ្ធារី មានឈ្មោះជាសមាជិកស្ថាបនិកបក្ស តែពួកគេមិនពាក់ព័ន្ធនឹងឯកសារដាក់ទៅក្រសួងមហាផ្ទៃនោះដែរ ដូច្នេះលោកបញ្ជាក់ថា បើផ្អែកតាមច្បាប់នោះ កូនក្ដីរបស់លោកជាមនុស្សស្អាតស្អំ។
លោក អែម ចន្ថា៖ «នៅក្នុងការចោទពីបទហ្នឹង សកម្មភាពហ្នឹង ហើយអង្គច្បាប់ នៃមាត្រាហ្នឹង យើងគិតថាវាអត់ត្រូវទេ កូនក្តីរបស់ខ្ញុំមិនគួរទទួលបានការចោទប្រកាន់បែបហ្នឹងទេ អ៊ីចឹង យោងតាមមាត្រាផ្សេងៗ ទៀត ដូចខ្ញុំរៀបរាប់ រួមទាំងក្រមព្រហ្មទណ្ឌ រួមទាំងរដ្ឋធម្មនុញ្ញនោះ កូនក្ដីខ្ញុំ គួររួចផុតពីបទចោទ»។
ចំណែកប្រពន្ធប្រធានចលនាយុវជនថ្នាក់ជាតិរបស់បក្សភ្លើងទៀន លោក ខឿន វីរ៉ាត់ គឺលោកស្រី ថាច់ ចន្ធូ ថ្លែងថា លោកស្រីខ្លោចចិត្តពេលឃើញប្តីស្លៀកខោអាវអ្នកទោស ដៃជាប់ខ្នោះដោយគ្មានកំហុស។ លោកស្រីរំពឹងថា សេចក្ដីសម្រេចរបស់តុលាការកំពូលនៅពេលខាងមុខមានការប្រែប្រួលប្រកបដោយយុត្តិធម៌ សម្រាប់ប្ដីលោកស្រី និងអ្នកទោសនយោបាយផ្សេងទៀត។
លោកស្រី ថាច់ ចន្ធូ៖ «ថ្ងៃទី១៣ តុលាការប្រកាសហ្នឹង ខ្ញុំសូមសំណូមពរឱ្យតុលាការដោះលែងប្តីខ្ញុំឱ្យមានសិទ្ធិសេរីភាពជួបជុំគ្រួសារវិញ ដោយគ្រួសារខ្ញុំអត់បានប្រព្រឹត្តកំហុស ហើយខ្ញុំសុំឱ្យដោះលែងប្តីខ្ញុំ និងអ្នកទោសនយោបាយផ្សេងៗ ទៀត»។
សាលាឧទ្ធរណ៍ភ្នំពេញកាលពីខែវិច្ឆិកា ឆ្នាំ២០២៣ បានសម្រេចតម្កល់សេចក្ដីសម្រេចរបស់សាលាដំបូងរាជធានីភ្នំពេញ ដែលកាលពីខែមីនា ឆ្នាំ២០២៣ បានផ្ដន្ទាទោសឱ្យលោក សៀម ភ្លុក ជាប់ពន្ធនាគាររយៈពេល ២ឆ្នាំ ៦ខែ ចំណែកលោក ខឿន វីរ៉ាត់ លោក តូច ថឹង និងអ្នកស្រី នូ សុទ្ធារី ត្រូវជាប់ពន្ធនាគាររយៈពេល២ឆ្នាំ ពាក់ព័ន្ធនឹងការប្រើប្រាស់លិខិតក្លែង និងការប្រមូលស្នាមមេដៃពីពលរដ្ឋ ដើម្បីបង្កើតគណបក្សបេះដូងជាតិ។
ទោះជាយ៉ាងណា ក្ដី មន្ត្រីបក្សភ្លើងទៀន គឺលោក តូច ថឹង អវត្តមាននៅក្នុងសវនាការនេះ ដោយសារគាត់មិនប្ដឹងសាទុក្ខទៅតុលាការកំពូល កាលពីខែមករាកន្លងទៅ។
គ្រួសារ និងមេធាវីរបស់លោក តូច ថឹង ធ្លាប់ប្រាប់វិទ្យុអាស៊ីសេរីថា មូលហេតុដែលលោក តូច ថឹង សម្រេចចិត្តមិនប្ដឹងជំទាស់បន្តទៀត ដោយសារគាត់គ្មានជំនឿថា តុលាការផ្តល់យុត្តិធម៌ ស្របពេលគាត់មានជំងឺប្រចាំកាយ ហើយត្រូវបានអាជ្ញាធរបញ្ជូនទៅឃុំនៅពន្ធនាគារក្នុងតំបន់ដាច់ស្រយាល។
វិទ្យុអាស៊ីសេរីមិនអាចទាក់ទងអ្នកនាំពាក្យតុលាការកំពូល អ្នកស្រី ម៉ៅ ធីតា ដើម្បីសាកសួរជុំវិញរឿងនេះបានទេ នៅថ្ងៃទី២៩ ខែមេសា។
ជុំវិញរឿងនេះ ប្រធានសមាគមការពារសិទ្ធិមនុស្សអាដហុក លោក នី សុខា មានប្រសាសន៍ថា កន្លងមកចំណាត់ការលើលោក សៀម ភ្លុក និងអ្នកផ្សេងទៀត មិនត្រឹមត្រូវតាមច្បាប់ស្ដីពីគណបក្សនយោបាយឡើយ ខណៈរដ្ឋធម្មនុញ្ញធានា ចំពោះពលរដ្ឋខ្មែរគ្រប់រូបមានសិទ្ធិបង្កើតគណបក្សនយោបាយ និងធ្វើសកម្មភាពនយោបាយ។ លោកមើលឃើញថា ប្រសិនបើឯកសារស្នើសុំបង្កើតបក្សបេះដូងជាតិមានភាពមិនប្រក្រតី អាជ្ញាធរត្រូវបញ្ជូនឯកសារទាំងនោះឱ្យតំណាងបក្សនោះកែតម្រូវវិញ ដោយអាជ្ញាធរមិនគួរចាប់ខ្លួន និងចោទប្រកាន់ដាក់ពន្ធនាគារនោះទេ។
លោក នី សុខា បញ្ជាក់ថា បញ្ហានេះធ្វើឱ្យមតិជាតិអន្តរជាតិចាត់ទុកការរឹតត្បិតសិទ្ធិសេរីភាពរបស់សកម្មជនទាំងនោះថា ជាជាងការអនុវត្តច្បាប់។
លោក នី សុខា៖ «វាអត់មានការខូចខាតដល់អ្នកណាមួយទេ វាគ្រាន់តែបើសិនពួកគាត់មិនបានដឹង មិនបានចូលរួមក្នុងការប្រព្រឹត្តនូវបទល្មើស ឬឱ្យអ្នកណាផ្ដិតមេដៃជំនួស ដោយមិនបានដឹងរឿងហ្នឹង អាហ្នឹង គាត់មិនមែនជាអ្នកប្រព្រឹត្តបទល្មើសទេ ពីព្រោះបទព្រហ្មទណ្ឌអ្នកណាប្រព្រឹត្ត អ្នកហ្នឹងទទួល បើយើងគ្រាន់តែជាមេគណបក្សឱ្យទៅទទួលអ្វីមិនបានប្រព្រឹត្ត អាហ្នឹង វាជារឿងអយុត្តិធម៌សម្រាប់គាត់ហើយបាទ»។
មន្ត្រីសិទ្ធិមនុស្សចង់ឃើញតុលាការសម្រេចក្ដីសំណុំរឿងនេះដោយយុត្តិធម៌ និងដោះលែងឱ្យពួកគេមានសិទ្ធិសេរីភាពពេញត្រឡប់មកធ្វើសកម្មភាពនយោបាយ ព្រមទាំងកែលម្អប្រជាធិបតេយ្យ និងការគោរពសិទ្ធិមនុស្សនៅកម្ពុជាឱ្យប្រសើរឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments