សង្ខេបព័ត៌មានសំខាន់ៗប្រចាំថ្ងៃសុក្រ ទី២ ខែកញ្ញា ឆ្នាំ២០២២៖
១.អ្នកវិភាគនិងមន្ត្រីបក្សប្រឆាំងថា គ្រួសារលោក ហ៊ុន សែន កំពុងមានស្នាមប្រេះឆាររឿងប្រជែងអំណាច
អ្នកវិភាគ និងមន្ត្រីបក្សប្រឆាំងសង្ស័យថា ត្រកូលហ៊ុន កំពុងមានស្នាមប្រេះឆា ព្រោះកូនៗ លោកនាយករដ្ឋមន្ត្រី ហ៊ុន សែន កំពុងប្រជែងនយោបាយរៀងៗខ្លួនក្នុងមហិច្ឆតាធ្វើនាយករដ្ឋមន្ត្រីជំនួសឪពុក។ ការលើកឡើងដូច្នេះ ក្រោយពេលលោក ហ៊ុន សែន បានចេញសារកម្រមួយអះអាងថា កូនៗរបស់លោកមិនបានប្រជែងគ្នាដណ្ដឹមតំណែងធ្វើនាយករដ្ឋមន្ត្រីបន្តពីលោកនោះទេ។
២.លោក សម រង្ស៊ី ប្រធានស្ដីទីគណបក្សសង្រ្គោះជាតិប្រាប់តុលាការបារាំងថា ការតតាំងក្ដីរបស់ លោក នៅតុលាការនេះមិនមែន ដើម្បីតែការពារតែខ្លួនលោក ដែលជាជនរងគ្រោះពីការធ្វើបាបពី លោក ហ៊ុន សែន និងថែមទាំងជាការតតាំង ដើម្បីពលរដ្ឋខ្មែរជាជនរងគ្រោះជាច្រើនរូបផ្សេងទៀត។
លោក សម រង្ស៊ី បញ្ជាក់បែបនេះនៅក្រោយលោកបានចូលទៅឆ្លើយនៅតុលាការបារាំងនៅទីក្រុងប៉ារីស កាលពីថ្ងៃទី១ ខែកញ្ញា ម្សិលម៉ិញ ដែលតុលាការបានបើកសវនាការរយៈពេលជាង៥ម៉ោង ជំនុំជម្រះក្ដីដែលលោក ហ៊ុន សែន និងកូនប្រសារគឺលោក ឌី វិជ្ជា ប្ដឹងលោក សមរង្ស៊ី ពីបទបរិហាកេរ្ដិ៍។ តុលាការគ្រោងនឹងប្រកាសសាលក្រមនៅថ្ងៃទី១០ ខែតុលាខាងមុខនេះ។
៣.អ្នកវិភាគថា កម្ពុជាគួរពង្រឹងផ្នែកយោធាជាមួយប្រទេសលោកសេរីស្របគ្នាជាមួយចិន
ក្រុមអ្នកជំនាញកិច្ចការនយោបាយលើកឡើងស្របគ្នាថា រដ្ឋាភិបាលកម្ពុជាគួរតែប្រឹងប្រែងស្ដារ និងពង្រឹងទំនាក់ទំនងលើវិស័យយោធាជាមួយប្រទេសលោកសេរីបន្ថែមទៀត។ ក្រុមអ្នកជំនាញដដែលបញ្ជាក់ថា ការពង្រឹងទំនាក់ទំនងជាមួយប្រទេសចិនតែមួយនោះ នឹងធ្វើឱ្យកម្ពុជាបាត់បង់ភាពអព្យាក្រឹត្យ។
៤.សាលាឧទ្ធរណ៍សម្រេចមិនដោះលែងកញ្ញា សេង ធារី នៅក្រៅឃុំបណ្ដោះអាសន្នតាមសំណើរបស់មេធាវី
សាលាឧទ្ធរណ៍ភ្នំពេញ នៅព្រឹកថ្ងៃទី១ ខែកញ្ញាម្សិលមិញនេះ តម្កល់សំណុំរឿងកញ្ញា សេង ធារី ទុកជាបានការដូចតាមការសម្រេចរបស់តុលាការជាន់ទាប ដែលបានផ្ដន្ទាទោសដាក់ពន្ធនាគារ៦ឆ្នាំដដែល។ មេធាវីការពារក្ដីឱ្យកញ្ញា សេង ធារី បញ្ចេញប្រតិកម្មទៅនឹងការសម្រេចនេះថា ជារឿងអយុត្តិធម៌លើកូនក្ដីមិនអាចទទួលយកបានឡើយ។
៥.ក្រុមស្ត្រីថ្ងៃសុក្រស្នើក្រសួងមហាផ្ទៃជួយអន្តរាគមន៍បញ្ជូនប្ដីមកព្យាបាលខាងក្រៅ ក្រោយទទួលរង អំពើហិង្សានៅក្នុងពន្ធនាគារ
ក្រុមស្ត្រីថ្ងៃសុក្រដាក់ញត្តិទៅក្រសួងមហាផ្ទៃឱ្យជួយអន្តរាគមន៍បញ្ជូនប្ដីមកព្យាបាលខាងក្រៅ បន្ទាប់ពីទទួលរងអំពើហិង្សាមានរបួសធ្ងន់ធ្ងរនៅក្នុងពន្ធនាគារត្រពាំងផ្លុង។ ពួកគាត់បារម្ភថា ប្រសិនបើមិនមានការព្យាបាលណាមួយឱ្យបានត្រឹមត្រូវនិងទាន់ពេលវេលានោះទេ នោះប្ដីរបស់គាត់នឹងអាចគ្រោះថ្នាក់ដល់ជីវិត។ មន្ត្រីអង្គការសង្គមស៊ីវិល ជំរុញឱ្យមន្ត្រីពន្ធនាគារបញ្ជូនអ្នកទោសដែលមានជំងឺធ្ងន់ធ្ងរ ឬរងការធ្វើទារុណកម្មទៅព្យាបាលនៅមន្ទីរពេទ្យខាងក្រៅ ត្បិតពេទ្យខាងក្នុងពន្ធនាគារនៅមានកម្រិតនៅឡើយ។
៦.សមត្ថកិច្ចរំដោះជនបរទេសចំនួន២៣នាក់ ចេញពីកន្លែងអគារបង្ខាំងក្នុងខេត្តព្រះសីហនុ
មន្រ្តីប៉ូលិសក្នុងខេត្តព្រះសីហនុ អះអាងថា ក្រុមសមត្ថកិច្ចបានជួយសង្គ្រោះជនបរទេស ចំនួន ២៣នាក់បន្ថែមទៀត ក្រោយពីពួកគេបានដាក់ពាក្យបណ្តឹងទៅអាជ្ញាធរតាមប្រព័ន្ធបណ្តាញសង្គម ដើម្បីស្នើឱ្យសមត្ថកិច្ចជួយអន្តរាគមន៍ចំពោះករណីបង្ខាំងពួកគេដោយខុសច្បាប់។ មន្រ្តីសង្គមស៊ីវិល ព្រួយបារម្ភចំពោះការកើនឡើងនៃករណីបង្ខាំងមនុស្ស ដែលប៉ះពាល់សន្តិសុខសង្គម និង កេរ្តិ៍ឈ្មោះប្រទេស។
៧.កម្មកររោងចក្រ និងសហជីព រក្សាជំហរទាមទារប្រាក់ឈ្នួល២១៣ដុល្លារ សម្រាប់ឆ្នាំ២០២៣
សហជីព និងកម្មករវិស័យកាត់ដេរ រក្សាជំហរចង់បានការដំឡើងប្រាក់ឈ្នួល២១៣ដុល្លារសម្រាប់ឆ្នាំ២០២៣ ដោយសារ ទំនិញសព្វសារពើនៅលើទីផ្សារកំពុងហក់ឡើងថ្លៃ។ កិច្ចប្រជុំត្រីភាគីរួមមានក្រសួងការងារ ភាគីនិយោជក និងភាគីសហជីព ដើម្បីកំណត់ប្រាក់ឈ្នួលអប្បបរមាឆ្នាំ២០២៣ ដល់កម្មករផ្នែកឧស្សាហកម្មកាត់ដេរ ស្បែកជើង និងកាបូបធ្វើដំណើរ កាលពីថ្ងៃទី៣១ ខែសីហា នៅមិនទាន់ឯកភាពគ្នានៅឡើយ ហើយភាគីទាំង៣ នឹងបន្តជជែកគ្នានៅថ្ងៃទី១៣ និងថ្ងៃទី២១ ខែកញ្ញា។
៨.វេជ្ជបណ្ឌិតខ្មែរ ទទួលបានពានរង្វាន់ណូបែលអាស៊ី ក្នុងកិច្ចការងារព្យាបាលជម្ងឺផ្លូវចិត្ត
វេជ្ជបណ្ឌិតខ្មែរម្នាក់ ជំនាញព្យាបាលជម្ងឺផ្លូវចិត្ត លោក ឈឹម សុធារ៉ា ដែលទើបទទួលបានពានរង្វាន់ រ៉ាម៉ុន ម៉ាក់សេសេ (Ramon Magsaysay) ដែលពានរង្វាន់នេះ ត្រូវបានគេចាត់ទុកថា ជាពានរង្វាន់ ណូបែល សន្តិភាព ក្នុងតំបន់អាស៊ី (Asia's Noble Prize)នោះ។ លោកវេជ្ជបណ្ឌិត ឈឹម សុធារ៉ា រំភើប និងរីករាយ ចំពោះការទទួលបានពានរង្វាន់កម្រិតអន្តរជាតិមួយនេះ ហើយលោកថា ពានរង្វាន់នេះ គឺជាការជំរុញទឹកចិត្តលោក និងស្ថាប័នរបស់លោកធ្វើការព្យាបាលជម្ងឺផ្លូវចិត្តដល់ប្រជាពលរដ្ឋខ្មែរបន្ថែមទៀត។
៩.សង្គមស៊ីវិល រិះគន់រដ្ឋាភិបាល និងក្រសួងព័ត៍ ពន្យារពេលចេញច្បាប់ស្តីពីសិទ្ធិទទួលព័ត៍មាន
សង្គមស៊ីវិល រិះគន់ រដ្ឋាភិបាល និងក្រសួងព័ត៌មាន ដែលបន្តពន្យាពេលចេញច្បាប់ស្តីពីសិទ្ធិទទួលព័ត៌មាន។ ការរិះគន់នេះ កើតឡើងបន្ទាប់ពីក្រសួងព័ត៌មានធ្វើសន្និសិទសារព័ត៍មានស្តីពីសមិទ្ធផលរយៈពេល៥ឆ្នាំ នៅទីស្តីការគណៈរដ្ឋមន្ត្រី និងអះអាងថា ច្បាប់ស្តីពីសិទ្ធិទទួលព័ត៌មានត្រូវប្រើរយៈពេលយូរបន្ថែមទៀត។
១០.ក្រុមយុវជនដាក់ញត្តិទៅក្រសួងបរិស្ថានសុំរក្សាទុកកោះកុងក្រៅជាសម្បត្តិជាតិ
ក្រុមយុវជននៅតែបន្តសុំទៅរដ្ឋាភិបាលឬក្រសួងបរិស្ថានលុបចោលគម្រោងប្រគល់កោះកុងក្រៅទៅក្រុមហ៊ុនវិនិយោគ ដោយរក្សាទុកកោះនេះជាសម្បត្តិជាតិ។ ជាងនេះទៅទៀត ក្រុមយុវជនដដែលក៏ទៅស្នើរដ្ឋាភិបាលអោយដាក់តំបន់កោះកុងក្រៅនេះជាឧទ្យានជាតិសមុទ្រ និងជួយដោះស្រាយបញ្ហាប្រឈមរបស់ពលរដ្ឋរស់នៅទីនោះ។ ការព្យាយាមស្នើសុំបែបនេះ ដែលធ្វើឡើងម្តងហើយម្តងទៀតនេះ ព្រោះពួកគេមិនចង់ឲ្យវាសនាកោះនេះជួបវិនាសកម្មនៃការកាប់បំផ្លាញព្រៃឈើ និងធនធានធម្មជាតិដ៏មានតំលៃផ្សេងទៀត ដូចករណីនៅភ្នំតាម៉ៅ ក្នុងខេត្តតាកែវ នោះទេ។
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments