គ្រូបង្រៀន ពលរដ្ឋ និងអ្នកតាមដានសង្គម បន្តទទូចឱ្យតុលាការលើកលែងការចោទប្រកាន់ និងដោះលែងប្រធានសហភាពសហជីពកម្ពុជា លោក រ៉ុង ឈុន ឱ្យមានសេរីភាពវិញ ដើម្បីកុំឱ្យមានការរិះគន់ពីប្រជាពលរដ្ឋបន្តទៀត។
ពលរដ្ឋមួយចំនួន នៅតែបន្តដាក់រូបលោក រ៉ុង ឈុន លើបណ្ដាញសង្គម និងទាមទារឱ្យតុលាការក្រុងភ្នំពេញដោះលែងលោក រ៉ុង ឈុន នៅថ្ងៃសវនាការ នៅពេលខាងមុខនេះ។
កាលពីដើមខែកុម្ភៈ តុលាការក្រុងភ្នំពេញបានបន្តជំនុំជម្រះសំណុំរឿងរបស់លោក រ៉ុង ឈុន និងសកម្មជនពីរនាក់ទៀត គឺសកម្មជនសិទ្ធិការងារ កញ្ញា សរ កណិកា និងអ្នកគាំទ្រគណបក្សសង្គ្រោះជាតិ លោក តុន និមល។ តុលាការ គ្រោងជម្រះក្ដីលើសំណុំរឿងរបស់អ្នកទាំង៣ នៅថ្ងៃ ទី១៧ កុម្ភៈ បន្តទៀត។
សហការីលោកគ្រូ រ៉ុង ឈុន គឺលោក ឯម ប៊ុនណារិទ្ធ លើកឡើងថា រយៈពេលជាច្រើនខែមកហើយដែលតុលាការរបបក្រុងភ្នំពេញបានឃុំខ្លួនលោក រ៉ុង ឈុន នៅក្នុងពន្ធនាគារទាំងអយុត្តិធម៌។ លោកបន្តថា លោក ពលរដ្ឋ និងគ្រូបង្រៀនជាច្រើន សោកស្ដាយចំពោះការចាប់ខ្លួននេះ ដោយសារលោក រ៉ុង ឈុន មិនបានប្រព្រឹត្តកំហុសអ្វីនោះទេ ហើយអ្វីដែលលោកបានកសាងកន្លងមក គឺជាការលះបង់ និងធ្វើដើម្បីប្រទេសជាតិប៉ុណ្ណោះ។ លោកសង្ឃឹមថា តុលាការក្រុងភ្នំពេញ នឹងឈរលើគោលការណ៍ឯករាជ្យ ដោះលែងលោក រ៉ុង ឈុន៖ «ការចាប់លោកគ្រូរហូតមកដល់ពេលនេះ គឺឃុំដោយអត់មានមូលដ្ឋានអីច្បាស់លាស់ទេ ចោទម្តងពីនេះ ចោទម្តងពីនោះ ពីបទញុះញង់ ប៉ុន្តែមិនឃើញមូលដ្ឋានណាមួយនិយាយអំពីបទរបស់គាត់។ មកដល់ម៉ោងនេះ តុលាការមិនទាន់ចោទគាត់ពីបទអីឱ្យច្បាស់លាស់នៅឡើយទេ នៅសួរដេញដោលលើកពីមួយថ្ងៃទៅមួយថ្ងៃ ពន្យារពេលហើយ ពន្យារពេលទៀត។ យើងអត់ដឹងថា ចេតនារបស់អ្នកដើមចោទនោះ គឺគេចោទយ៉ាងម៉េចឱ្យពិតប្រាកដទេ»។
អ្នកវិភាគដែលបានតាមដានករណីនេះលើកឡើងថា ករណីចាប់លោក រ៉ុង ឈុន ដាក់ពន្ធនាការ អាចពាក់ព័ន្ធនឹងករណីនយោបាយ ជាជាងរឿងយុត្តិធម៌។
អគ្គលេខាធិការសហព័ន្ធនិស្សិតបញ្ញវន្តកម្ពុជា លោក គៀន ពន្លក ថ្លែងថា ការចាប់ខ្លួនលោក រ៉ុង ឈុន ដាក់ពន្ធនាគារកន្លងមក តុលាការមិនបានឈរលើគោលការឯករាជ្យ ឬយុត្តិធម៌ តាមវិជ្ជាជីវៈរបស់ខ្លួននោះទេ តែអនុវត្តតាមនយោបាយរបស់បក្សកាន់អំណាច។ លោកបន្ថែមថា ប្រសិនបើតុលាការ និងរដ្ឋាភិបាលមិនព្រមដោះលែងលោក រ៉ុង ឈុន និងបញ្ចប់បញ្ហានយោបាយនេះទេ កម្ពុជាអាចនឹងរងទណ្ឌកម្មបន្ថែមទៀតពីសហគមន៍អន្តរជាតិ៖ «តុលាការគួរតែយល់អំពីស្ថានភាពហ្នឹង ព្រោះអី លោកគ្រូគឺជាបុគ្គលមួយរូបដែលអន្តរជាតិទទួលស្គាល់ អ៊ីចឹងហើយវាគ្មានផលចំណេញអ្វីដែលរដ្ឋាភិបាលត្រូវកាត់ទោសឱ្យគាត់ជាប់ពន្ធនាគារទេ អ៊ីចឹងគួរតែដោះលែងគាត់ទៅ ដើម្បីអី? ដើម្បីយើងរក្សាបានផលប្រយោជន៍ទាំងសងខាងទាំងផលប្រយោជន៍រដ្ឋាភិបាល ទាំងផលប្រយោជន៍របស់មន្ត្រីរាជការ ទាំងផលប្រយោជន៍ដែលយើងទទួលបានជំនួយសេដ្ឋកិច្ចពីអន្តរជាតិ»។
អាស៊ីសេរីបានព្យាយាមទាក់ទងទៅអ្នកនាំពាក្យតុលាការក្រុងភ្នំពេញ លោក អ៊ី រិន្ទ ដើម្បីសួរនាំបន្ថែមពីករណីនេះ នៅថ្ងៃទី១១ កុម្ភៈ ដោយទូរស័ព្ទចូល ប៉ុន្តែពុំមានអ្នកទទួល។
នាយករងទទួលបន្ទុកផ្នែកសិទ្ធិមនុស្សអង្គការលីកាដូ (Licadho) លោក អំ សំអាត មានប្រសាសន៍ថា ពលរដ្ឋបានប្រើប្រាស់សិទ្ធិរបស់ខ្លួនក្នុងការបញ្ចេញមតិលើបណ្ដាញសង្គម ដោយសារពួកគេគាំទ្រ ហើយយល់ថា ការចាប់ខ្លួនលោក រ៉ុង ឈុន នេះ គឺមិនមានមូលដ្ឋានច្បាប់ ឬហេតុផលសមរម្យក្នុងការដាក់បន្ទុកនោះទេ។ លោកទទូចឱ្យតុលាការដោះលែងលោក រ៉ុង ឈុន និងសកម្មជនដទៃទៀត ហើយទម្លាក់ចោលបទចោទប្រកាន់ទាំងអស់ ដើម្បីកុំឱ្យមានមតិរិះគន់ពីប្រជាពលរដ្ឋ អង្គការជាតិ និងអន្តរជាតិជាច្រើនទៀត៖ «សហគមន៍អន្តរជាតិ ជាពិសេសគឺអ្នករាយការណ៍ពិសេស គេបានទទូច និងទាមទារសូមឱ្យទម្លាក់ចោលនូវបទចោទប្រកាន់ទៅលើអ្នកទាំងអស់គ្នា ហើយនឹងដោះលែងឱ្យមានសេរីភាពវិញ ពីព្រោះគេចាត់ទុកថា ការចាប់និងឃុំខ្លួនហ្នឹង វាជាការបំពានទៅលើសេរីភាពជាមូលដ្ឋានរបស់ពលរដ្ឋ និងការបញ្ចេញមតិរបស់ពលរដ្ឋ។ អ៊ីចឹងរឿងតែមួយទេ គឺសូមឱ្យពន្លឿននីតិវិធីនៅតុលាការ ដើម្បីកុំឱ្យការឃុំខ្លួននៅក្នុងនីតិវិធីនៃការរងចាំសវនាការនេះ វាអូសបន្លាយយូរតទៅទៀត»។
អាជ្ញាធរបានចាប់ខ្លួនមេសហជីព និងអ្នកឃ្លាំមើលបញ្ហាព្រំដែនរូបនេះ កាលពីយប់ថ្ងៃទី៣១ កក្កដា ដោយចោទប្រកាន់ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។ ការចាប់ខ្លួននេះ គឺបន្ទាប់ពីលោកចុះជួបពលរដ្ឋដែលអះអាងថា អាជ្ញាធរវៀតណាមរំលោភយកដីពលរដ្ឋខ្មែរនៅខេត្តត្បូងឃ្មុំ។ ចំណែក កញ្ញា សរ កណិកា និងលោក តុន និមល ត្រូវបានអាជ្ញាធរចាប់ខ្លួន ក្រោយពេលពួកគេចូលរួមតវ៉ាឱ្យដោះលែងលោក រ៉ុង ឈុន និងជនជាប់ឃុំមួយចំនួនទៀត។
ចាប់តាំងពីដើមឆ្នាំ២០២០រហូតមក ដល់ថ្ងៃទី១១ កុម្ភៈ មានសកម្មជនសង្គម ព្រះសង្ឃខ្មែរថាវរៈ សកម្មជននយោបាយ និងក្រុមយុវជនជិត៧០នាក់ហើយ ត្រូវបានអាជ្ញាធរចាប់ខ្លួនដាក់ពន្ធនាគារ។ តុលាការបានចោទប្រកាន់ពួកគេពីបទ រួមគំនិតក្បត់ ញុះញង់ និងប្រមាថថ្នាក់ដឹកនាំជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments