ប្រជាពលរដ្ឋខ្មែរបានបញ្ចេញទស្សនៈផ្សេងៗគ្នាអំពីការប្រារព្ធពិធីបុណ្យឯករាជ្យជាតិលើកទី៦៥។ ប្រជាពលរដ្ឋភាគច្រើននៅតែ កោតសរសើរព្រះបរមរតនកោដ្ឋ នរោត្តម សីហនុ ដែលបានទាមទារឯករាជ្យពីអាណានិគមបារាំង នៅឆ្នាំ១៩៥៣ ប៉ុន្តែពួកគេ បន្ទោសរបបលោក ហ៊ុន សែន ដែល ដឹកនាំប្រទេសកម្ពុជា អោយស្ថិតក្រោមអាណានិគមបែបថ្មីពីប្រទេសជិតខាង និងប្រទេសចិន។
បើទោះបីជាប្រជាពលរដ្ឋខ្មែរភាគច្រើន ចូលរួមអបអរសាទរការប្រារព្ធពិធីបុណ្យឯករាជ្យជាតិលើកទី៦៥ នៅថ្ងៃទី៩ វិច្ឆិកា ដែលកម្ពុជា បានទាមទារឯករាជ្យពីអាណានិគមបារាំង នៅឆ្នាំ១៩៥៣ ក៏ពិតមែន ប៉ុន្តែ ពួកគេយល់ថា កម្ពុជាបច្ចុប្បន្នក្រោមការដឹកនាំរបស់លោក ហ៊ុន សែន គឺនៅមិនទាន់មានឯករាជ្យភាព និងអធិតេយ្យភាពពេញលេញនោះទេ។
យុវជនឈ្មោះ ចឹក ចិត្រា ដែលធ្លាប់ចុះស្រាវជ្រាវបញ្ហានៅតាមព្រំដែន រៀបរាប់ថា ពិធីបុណ្យឯករាជ្យ ជាតិដែលរបបលោកហ៊ុន សែន រៀបចំឡើង ហាក់មានចេតនាចង់ចំណេញនយោបាយពីស្នាព្រះហស្ថរបស់អតីតព្រះមហាវីរៈក្សត្រ និងអ្នកនយោបាយមុនៗ ខណៈដែលរបបលោកបច្ចុប្បន្ននេះ មានភាពកម្សោយក្នុងការការពារអធិបតេយ្យភាពជាតិ និងឯករាជ្យភាពជាតិពីប្រទេសជិតខាង៖ «ថ្ងៃទិវាឯករាជ្យនេះ គឺសំដៅលើតែរូបភាពនៃការទទួលបានឯករាជ្យពីអាណានិគមក្នុងសម័យប្រទេសធំៗលើពិភពលោកទេ ប៉ុន្តែយើងអត់មើល ទៅលើឥទ្ធិពលបច្ចុប្បន្នថា តើ អំណាចឥទ្ធិពលអណានិគមបែបទំនើបវាយ៉ាងម៉េចទៅវិញ? យើងមើលទៅលើគុណវិបត្តិនិងគុណសម្បត្តិនៃសេដ្ឋកិច្ច ក៏ហាក់ដូចជា គេគ្រប់គ្រងលើយើងទាំងស្រុង ថាតើយើងធ្វើអោយឯករាជ្យយ៉ាងម៉េច?»។
រីឯកសិករមួយរូបរស់នៅស្រុករមាសហែក ខេត្តស្វាយរៀង លោកស្រី ម៉ម ស៊ីណា រៀបរាប់ថា ពលរដ្ឋខ្មែរនៅតាមបណ្ដោយខ្សែក្រវ៉ាត់ព្រំដែនភាគច្រើន មានជីវភាពក្រខ្សត់ខ្លាំង ដោយសារខ្វះការ យកចិត្តទុកដាក់ពីរបបលោក ហ៊ុន សែន ដែលជារឿងងាយស្រួលធ្វើឲ្យបរទេសឈ្លានពានកម្ពុជា គ្រប់បែបយ៉ាង៖ «ខ្ញុំរាល់ថ្ងៃនៅតែព្រួយបារម្ភខ្លាចវៀតណាមចូលគ្រប់គ្រងទឹកដីខ្មែរព្រោះ សព្វថ្ងៃនេះតាមព្រំដែន គឺជនជាតិវៀតណាម រស់នៅច្រើនជាងខ្មែរ»។
មិនខុសគ្នាប៉ុន្មានឡើយ យុវជនមួយរូបទៀត លោក ម៉ា កូ យល់ថា ពិធីបុណ្យឯករាជ្យជាតិនេះគឺធ្វើឲ្យ តែល្អមើលប៉ុណ្ណោះ ខណៈដែលកម្ពុជាមិនទាន់រឹងមាំខ្លាំងទាំងសេដ្ឋកិច្ច និងនយោបាយ រួមទាំងកម្លាំងការពារព្រំដែននោះទេ។ លោកចង់ឃើញលោក ហ៊ុន សែន ធ្វើឲ្យប្រទេសកម្ពុជាខ្លាំងដូចសម្ដីរបស់លោកពិតប្រាកដ មិនមែនបានត្រឹមតែនិយាយម្ដងហើយម្តងទៀតនោះទេ៖ «លោក ហ៊ុន សែន គាត់ថា កម្ពុជាមិនរណបបរទេសណាទេ ប៉ុន្តែគាត់និយាយនោះ គឺសំដៅលើបរទេសមួយចំនួនដែលមិនល្អសម្រាប់អំណាចគាត់ទេ ប៉ុន្តែបរទេសមួយចំនួនទៀត គាត់បានទៅអោបដៃអោបជើងដូចជាចិនជាដើម។ ចំពោះបញ្ហាព្រំដែនជាមួយប្រទេសវៀតណាមវិញ គឺអត់ឃើញមានមន្ត្រីឬក៏ថ្នាក់ដឹកនាំកម្ពុជាចុះដោះស្រាយដោយឯករាជ្យពិតប្រាកដដូចដែលខ្លួនឯងបាននិយាយនោះទេ គឺនៅតែធ្វើអោយទឹកដីខ្មែរបាត់បង់ទៅ។ ម្យ៉ាងវិញទៀត គឺការធ្វើអន្តោប្រវេសន៍ជនជាតិវៀតណាម គឺមានការបើកដៃដោយមន្ត្រីខ្មែរតាំងពីដើមមក ហើយឥឡូវនេះ ចែកដីអោយថែមទៀតនៅខេត្តកំពង់ឆ្នាំង និងនៅម្តុំបឹងទន្លេសាប»។
ដោយឡែកគ្រូបង្រៀននៅវិទ្យាល័យក្រុងបាវិតខេត្តស្វាយរៀង លោក ឯម សុខសុវណ្ណ មានប្រសាសន៍ថា បើនិយាយអំពីថ្ងៃបុណ្យឯករាជ្យជាតិ គឺលោកពិតជារីករាយ និងមានមោទនភាពខ្លាំង ព្រោះ ជាថ្ងៃដែលកម្ពុជាទទួលបានឯករាជ្យពេញបរិបូរពីបារាំងក្រោមស្នាព្រះហស្ថទាមទារដ៏ស្វិតស្វាញ របស់អតីតព្រះមហាវីរក្សត្រ ប៉ុន្តែបើនិយាយអំពីអធិបតេយ្យភាពក្នុងបច្ចុប្បន្ននេះវិញ គឺកម្ពុជា មិនទាន់មានពេញលេញពីប្រទេសជិតខាងនោះទេ៖ «ប្រទេសដែលឯករាជ្យភាព និងអធិបតេយ្យភាពច្បាស់លាស់ លុះត្រាតែប្រទេសនោះ មានទាំងសេដ្ឋកិច្ច យោធារឹងមាំ ប្រជាពលរដ្ឋ ខ្មែរមានប្រាក់ខែត្រឹមត្រូវសមរម្យ ប្រជាពលរដ្ឋមានចំណេះដឹង និងមានព្រំដែនរឹងមាំត្រឹមត្រូវជាដើម។ យើងនិយាយតែខេត្តកំពង់សោមមួយតើថាពេលនេះ មានឯករាជ្យ ឬអត់មិនចាំបាច់និយាយជាទូទៅនោះទេ»។
ប្រជាពលរដ្ឋមួយរូបទៀត ឈ្មោះ ស្រី ម៉ៅ បានចូលរួមអបអរសាទរចំពោះការប្រារព្ធទិវាបុណ្យឯករាជ្យជាតិ ព្រោះយល់ថា វាជាការរម្លឹកអំពីប្រវត្តិសាស្ត្រ និងជាការផ្ដល់មេរៀនល្អៗអោយពលរដ្ឋខ្មែរ ជំនាន់ បានចងចាំ និងចេះដឹង។ ទោះយ៉ាងណាក្តី ស្រី ម៉ៅ ហាក់មិនពេញចិត្តចំពោះរបបលោកហ៊ុន សែន ដែល តែងតែឆ្លៀតយកឱកាសថ្លែងសារអំពីស្នាដៃរបស់ខ្លួនជ្រុលហួសហេតុថា បានអភិវឌ្ឍប្រទេសបានជឿនលឿនកន្លងមក គឺមានតែគណបក្សប្រជាជនតែឯង។ បន្ថែមពីនេះ ស្រីម៉ៅ មើលឃើញថា របប លោក ហ៊ុន សែន អសមត្ថភាពការពារអធិបតេយ្យភាព និងកសាងប្រទេសអោយ រឹងមាំពោលគឺរបបលោកហ៊ុន សែន បានត្រឹមតែអួតប៉ុណ្ណោះ៖ «កម្ពុជា មិនទាន់មានឯករាជ្យភាពទេ។ ខ្ញុំសំដៅថា ប្រទេសណាដែលមានគោលការណ៍ជួយជ្រោមជ្រែងទង្វើផ្ដាច់ការរបស់រដ្ឋាភិបាល គឺរដ្ឋាភិបាល ហាក់ទេរទៅរកប្រទេសនោះ អត់ទាន់មានថា រៀបចំប្រទេសខ្លួនឯងអោយមានឯករាជ្យ ហើយរៀបចំអោយមានច្បាប់ទម្លាប់អោយសាកសមជាប្រទេសមួយដែលមានវ័យចំណាស់នោះទេ។ យើងឃើញថា រឿងព្រំដែន ខ្មែរចាញ់ព្រៀបវៀតណាម។ ចំណែករឿងទឹកដីនិងការវិនិយោគកំពុងតែចាញ់ប្រៀបចិន។
ផ្ទុយពីការយល់ឃើញរបស់ពលរដ្ឋអ្នកនាំពាក្យទីស្តីការគណៈរដ្ឋមន្ត្រីនៃរបបលោក ហ៊ុន សែន គឺលោក ផៃ ស៊ីផាន ថ្លែងថា អ្នកដែលមើលឃើញកម្ពុជាថាគ្មានឯករាជ្យភាពពេញលេញនោះ គឺជាក្រុមរស់នៅក្នុងសម័យអតីតកាល ខ្វះការយល់ដឹង ហើយនិយមមាក់ងាយប្រទេសជាតិ។ លោកបញ្ជាក់ថា បរទេសជាពិសេសវៀតណាមក្តី គ្មានឥទ្ធិពលលើកម្ពុជានោះទេ ព្រោះការគ្រប់ប្រទេសកម្ពុជាសព្វថ្ងៃនេះ អាស្រ័យលើការសម្រេចចិត្តនានារបស់រដ្ឋសភាកម្ពុជា ដែលមានការបោះឆ្នោតគាំទ្រពីប្រជាពលរដ្ឋខ្មែរ។
ក្នុងពិធីបុណ្យឯករាជ្យជាតិ ដែលមានពិធី រំលឹកខួបកំណើតកងទ័ពជាតិដែរនោះ បានធ្វើឡើងនៅវិមានឯករាជ្យ និងមុខព្រះបរមរាជវាំង នារាជធានីភ្នំពេញ ដែលមានការចូលរួមពីព្រះមហាក្សត្រ មន្ត្រីរបបក្រុងភ្នំពេញ អ្នកមុខអ្នកការអ្នកការទូតមួយចំនួនប្រចាំកម្ពុជា រួមទាំងប្រជាពលរដ្ឋ និងសិស្សានុសិស្សរាប់រយនាក់ផងដែរ។
ប្រជាពលរដ្ឋ សំណូមពរឲ្យអ្នកនយោបាយខ្មែរ លះបង់គំនុំផ្ទាល់ខ្លួន ហើយចេះស្រលាញ់ជាតិពិត ប្រាកដ និងចាប់ផ្ដើមរួបរួមសាមគ្គីគ្នា កសាងសេដ្ឋកិច្ច និងកសាងសង្គមជាតិអោយរឹងមាំតាមបែប ប្រជាធិបតេយ្យពិតប្រាកដ ដើម្បីអោយប្រទេសខ្មែរ មានកម្លាំងជាតិខ្លាំង មិនរណបឬនៅ ក្រោម អាណានិគមបែបថ្មីរបស់បរទេសទៀតឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments