ប្រជាពលរដ្ឋ និងសង្គមស៊ីវិល នៅតែចង់ឃើញរបបក្រុងភ្នំពេញ ស្វែងរកមូលហេតុពិត និង អ្នកទទួលខុសត្រូវចំពោះព្រឹត្តិការណ៍ជាន់គ្នាស្លាប់ជិត៤០០នាក់នៅលើស្ពានកោះពេជ្រ ក្នុងថ្ងៃចុងក្រោយនៃពិធីបុណ្យអុំទូកកាលពីឆ្នាំ២០១០។ ការលើកឡើងនេះ បន្ទាប់ពីរយៈពេល៨ឆ្នាំមកនេះ របបក្រុងភ្នំពេញ មិនបានបង្ហាញការពិត និងរកឃើញមុខអ្នកទទួលខុសត្រូវលើព្រឹត្តិការណ៍នោះ នៅឡើយទេ។ រីឯអភិបាលក្រុងភ្នំពេញអះអាងថា ករណីនេះ គ្មានអ្នកទទួលខុសត្រូវឡើយ ព្រោះ វា ជារឿងឧបទ្ទវហេតុ។
ថ្ងៃទី២២ ខែវិច្ឆិកា ឆ្នាំ២០១៨ គឺជាខួប ៨ឆ្នាំនៃព្រឹត្តិការណ៍ជាន់គ្នានៅលើស្ពានពេជ្រឆ្លងទៅកោះពេជ្រ ក្នុងថ្ងៃចុងក្រោយនៃពិធីបុណ្យអុំទូកកាលពីឆ្នាំ២០១០។ ហេតុការណ៍កាលណោះ បានធ្វើឲ្យមនុស្សចំនួន ៣៥៣នាក់ស្លាប់ និង៣៩៣នាក់រងរបួស។ រហូតមកដល់ពេលនេះ ក្រៅពីសំណងជា ទឹកប្រាក់ មិនមានអាជ្ញាធរ ឬមន្ត្រីរដ្ឋាភិបាលណាម្នាក់ចេញមុខទទួលខុសត្រូវចំពោះហេតុការណ៍ដែលកើតឡើងនោះទេ គឺឃើញតែសម្ដែងការសោកស្ដាយនូវអ្វីដែលបានកើតឡើងប៉ុណ្ណោះ។
ក្នុងខួប៨ឆ្នាំនេះ សាលាក្រុងភ្នំពេញ និងក្រុមគ្រួសារសាច់ញាតិអ្នកស្លាប់ជាច្រើននាក់ បានរៀបចំ ពិធីបង្សុកូល នៅស្តូបក្បែរស្ពាននាគនៃទីក្រុងកោះពេជ្រ ដើម្បីឧទ្ទិសកុសលដល់អ្នកដែលបានបាត់ បង់ជីវិតនៅពេលនោះ។ គ្រួសារសាច់ញាតិជនរងគ្រោះសុទ្ធតែបង្ហាញអារម្មណ៍ក្ដុកក្ដួលរំជួលចិត្ត ខណៈដៃកំពុងកាន់រូបថតអ្នកស្លាប់ដែលភាគច្រើនជាយុវវ័យ។ «»
ឪពុកជនរងគ្រោះម្នាក់ក្នុងចំណោមគ្រួសារសាច់ញាតិជនរងគ្រោះដទៃទៀត លោក កែវ សុវណ្ណ មានប្រសាសន៍ថា លោកបាត់បង់កូនប្រុសម្នាក់អាយុជាង២០ និងកូនស្រីម្នាក់អាយុ១៤ឆ្នាំ។ រយៈពេល៨ឆ្នាំហើយ លោកនៅតែនឹកស្រមៃជានិច្ច អំពីព្រឹត្តិការណ៍ដែលមិននឹកស្មានដល់ថាកូនទាំងពីររបស់លោក ត្រូវស្លាប់ក្នុងមួយពព្រិចភ្នែក។ លោកស្នើសុំឲ្យរបបលោក ហ៊ុន សែន ជួយស្វែង រកការពិត និងជួយស្វែងរកមុខអ្នកទទួលខុសត្រូវ ដើម្បីផ្សះផ្សាការឈឺចាប់ផ្លូវចិត្ត និងបំបាត់មន្ទិលសង្ស័យផ្សេងៗ ព្រោះមជ្ឈដ្ឋានមួយចំនួន នៅតែគិតថា វាមិនមែនជាឧបទ្ទវហេតុទេ គឺជាកំហុសបច្ចេកទេសរបស់អាជ្ញាធរក្រុងភ្នំពេញ។ «»
ជាមួយគ្នានេះ អ្នកសល់ជីវិតពីការស្លាប់ក្នុងហេតុការណ៍ជាន់គ្នាម្នាក់ គឺលោក រស់ គង់ រៀបរាប់ថា លោកមិនដែលភ្លេចព្រឹត្តិការណ៍ដ៏រំជួលចិត្តនិងតក់ស្លុតនោះទេ។ លោករម្លឹកថា ព្រឹត្តិការណ៍ស្លាប់ កាលណោះ អាចមិនមែនបណ្ដាលមកពីស្ពាននោះ មានចរន្តភ្លើងឆក់នោះទេ គឺអាចមកពីការដើរប្រជ្រៀតគ្នាណែនពេក ហើយបណ្ដាលឲ្យអ្នកនៅកណ្ដាលស្ពានស្លាប់ជាបន្តបន្ទាប់។ ទោះយ៉ាងណាក្តី លោកមើលឃើញថា ពេលនោះ អាជ្ញាធររដ្ឋក៏មានភាពធ្វេសប្រហែសដែរ ដែលមិនបានអនុវត្តតួនាទីក្នុងការយាមកាម សម្រួលចរាចរ និងជួយសង្គ្រោះឲ្យត្រឹមត្រូវ និងទាន់ពេលវេលា។ លោក បន្តថា អាជ្ញាធររដ្ឋ គួរតែមានការទទួលខុសត្រូវខ្ពស់ជាងនេះ មិនត្រឹមតែផ្ដល់សំណង សាងសង់ស្តូប រម្លឹកវិញ្ញាណក្ខន្ធ និងសម្ដែងការសោកស្ដាយប៉ុណ្ណោះទេ។ «»
អាស៊ីសេរី បានព្យាយាមទាក់ទងសុំការឆ្លើយតបពីអ្នកនាំពាក្យទីស្តីការគណៈរដ្ឋមន្ត្រីនៃរបបលោក ហ៊ុន សែន គឺលោក ផៃ ស៊ីផាន និងអ្នកនាំពាក្យក្រសួងមហាផ្ទៃ លោក ខៀវ សុភ័គ ជាច្រើនលើក នៅថ្ងៃទី២២ ខែវិច្ឆិកា ប៉ុន្តែ ពុំបានអ្នកទទួលទូរស័ព្ទ។
ប្រធានគ្រប់គ្រងផ្នែកអង្កេតនៃអង្គការសិទ្ធិមនុស្សលីកាដូ (Licadho) លោក អំ សំអាត សម្ដែងការ គាំទ្រចំពោះការរៀបចំឲ្យមានពិធីបុណ្យបង្សុកូលរបស់អាជ្ញាធរ ព្រោះលោកថា វាជាព្រឹត្តិការណ៍ធំមួយដែលកម្ពុជា គួរចងចាំ និងសម្រាប់ដាស់តឿនឲ្យមានការប្រុងប្រយ័ត្ននៅពេលក្រោយទៀត។ ប៉ុន្តែលោក អំ សំអាត យល់ថា ការស្វែងរកមូលហេតុពិត និងស្វែងរកអ្នកទទួលខុសត្រូវគឺជារឿងសំខាន់ ដែលគ្រួសារជនរងគ្រោះចង់បាន។ «»
រីឯអភិបាលក្រុងភ្នំពេញ លោក ឃួង ស្រេង នៅតែអះអាងថា ព្រឹត្តិការណ៍ជាន់គ្នាស្លាប់នៅលើស្ពាន កោះពេជ្រនោះ គឺជាឧបទ្ទវហេតុ ហើយឧបទ្ទវហេតុជាន់គ្នាស្លាប់បែបនេះ មិនអាចរកមូលហេតុ និង រកអ្នកទទួលខុសត្រូវនោះទេ។ លោកថែមទាំងបានប្រតិកម្មជាមួយអ្នកសារព័ត៌មានអាស៊ីសេរី ដែល សួរនាំអំពីបញ្ហានេះ ថា សួរបែបមិនយល់បញ្ហា និងមិនដឹងអី។ «»
ផ្ទុយពីការលើកឡើងនេះ លោក អំ សំអាត យល់ថា កន្លងមកនៅពេលមានព្រឹត្តិការណ៍ស្លាប់មនុស្ស ឬរបួសច្រើន គឺរបបក្រុងភ្នំពេញនិងស្ថាប័នផ្សេងៗ តែងតែសម្ដែងការសោកស្ដាយ និងចាត់ទុកថា ជាឧបទ្ទវហេតុជាដើមដោយមិនបានធ្វើការស្រាវជ្រាវឲ្យបានអស់ចិត្តសម្រាប់ជនរងគ្រោះនោះទេ។ លោកបន្តថា ចំពោះការស្លាប់នៅស្ពានកោះពេជ្រ វាគួរតែមានការស៊ើបអង្កេតឲ្យច្បាស់លាស់ រួចផ្ដល់របាយការណ៍ជាក់លាក់ដល់ក្រុមគ្រួសាររបស់ជនរងគ្រោះ និងពលរដ្ឋទូទៅ។ «»
គេនៅចាំបានថា ក្រោយព្រឹត្តិការណ៍រត់ជាន់គ្នាស្លាប់នោះកើតឡើង លោកនាយករដ្ឋមន្ត្រី ហ៊ុន សែន បានចេញមុខសម្ដែងការសោកស្ដាយ។ លោក ហ៊ុន សែន ថែមទាំងសម្រក់ទឹកភ្នែកសម្ដែងការអាណិតចំពោះជនបាត់បង់ជីវិតថែមទៀតផង។ ប៉ុន្តែលោកមិនបានស្ដីបន្ទោស ឬចាប់អោយមន្ត្រីណាម្នាក់ទទួលខុសត្រូវឡើយ។ លោកគ្រាន់តែចាត់ទុកថា វាជាហេតុការណ៍អាក្រក់ដែលគ្មានអ្នកណាម្នាក់ចង់ឲ្យកើតឡើងនោះទេ។
ព្រឹត្តិការណ៍ជាន់គ្នាស្លាប់នៅក្នុងឆ្នាំ២០១០ នោះ គឺមានលោក កែប ជុតិមា ធ្វើជាអភិបាលក្រុង និងលោក ទូច ណារ័ត្ន ជាស្នងការនគរបាលរាជធានីភ្នំពេញ។ ក្រោយព្រឹត្តិការណ៍នេះ មានមតិជាច្រើនលើកឡើងថា អាជ្ញាធរក្រុងភ្នំពេញដែលជាអ្នករៀបចំចាត់ចែងពិធីបុណ្យ និងជាអ្នកធានានូវសុខសុវត្ថិភាពពលរដ្ឋ គួរចេញមុខទទួលខុសត្រូវចំពោះសោកនាដកម្មដែលបានកើតឡើង ដូចជាត្រូវក្លាហានប្រកាសចុះចេញពីតំណែងដូចនៅបរទេស ឬរបបក្រុងភ្នំពេញ ត្រូវដាក់ពិន័យរដ្ឋបាលចំពោះការធ្វេសប្រហែសរបស់មន្ត្រីថ្នាក់ក្រោមរបស់ខ្លួនជាដើម។
មន្ត្រីកម្មវិធីនៃមជ្ឈមណ្ឌលប្រជាពលរដ្ឋដើម្បីអភិវឌ្ឍ និងសន្តិភាព លោក ហេង គឹមហុង មានប្រសា សន៍ថា ប្រសិនបើរបបក្រុងភ្នំពេញ នៅតែចាត់ទុកថា ជាឧបទ្ទវហេតុរត់ជាន់គ្នាស្លាប់ និងនៅតែព្រងើយកន្តើយ មិនស្វែងរកមូលហេតុពិត ដើម្បីចាប់ឲ្យមានអ្នកទទួលខុសត្រូវនោះ គឺប្រជាពលរដ្ឋ ជាពិសេសក្រុមគ្រួសារជនរងគ្រោះ ប្រាកដជាពិបាកកាត់បន្ថយ ការឈឺចាប់ផ្លូវចិត្ត ហើយពួកគាត់នៅតែបន្តរស់នៅជាមួយមន្ទិលសង្ស័យដដែល។ «»
ថ្វីត្បិតតែយ៉ាងណាក៏ដោយ ក្រុមគ្រួសារជនរងគ្រោះដែលចូលរួមពិធីរំឭកខួប ៨ឆ្នាំនេះ នៅតែទទូចឲ្យរបបក្រុងភ្នំពេញ និងស្ថាប័នពាក់ព័ន្ធ ត្រូវតែធានា និងការពារសន្តិសុខ នៅពេលមានបុណ្យទាន ឬព្រឹត្តិការណ៍សំខាន់ណាមួយ ដើម្បីបញ្ចៀសកុំឲ្យកើតមានព្រឹត្តិការណ៍ដូចករណីសោកនាដកម្មនេះបន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments