អាជ្ញាធររាជធានីភ្នំពេញ និងក្រសួងសាធារណការ បានចាប់ផ្ដើមបញ្ចេញរថយន្តក្រុងសាធារណៈជាង១០០គ្រឿង និងរថភ្លើងដើម្បីដឹកជញ្ជូនពលរដ្ឋ ទៅលេងស្រុកកំណើត ដោយឥតគិតថ្លៃ ក្នុងឱកាសបុណ្យភ្ជុំបិណ្ឌ។ ក្រុមអ្នកតាមដានសង្គម សម្ដែងការសាទរ តែស្នើសុំឲ្យបន្ថែមរថយន្តរត់បន្ថែមទៀត និងបន្តទៅខេត្តឆ្ងាយៗ ដូចជារតនគិរី និងមណ្ឌលគិរីផង។
នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ សង្កេតឃើញថា មានរថយន្ដក្រុងសាធារណៈខ្លះ មានមនុស្សជិះតិច មានរថយន្តខ្លះ មានមនុស្សជិះច្រើន ជាហេតុដែលនាំឲ្យមានការសង្ស័យពីការរៀបចំជើងចេញដំណើរ មិនទាន់មានភាពល្អប្រសើរ។
អ្នកឃ្លាំមើលរូបនេះ ស្នើសុំឲ្យរបបក្រុងភ្នំពេញ ពិចារណាលទ្ធភាព ដឹកជញ្ជូនកម្មករខិតជិតទីតាំងជាងនេះបន្ថែមទៀត ពោលគឺគួរមានការចូលពីផ្លូវជាតិបន្ថែមទៀត ព្រោះកម្មករ ឬពលរដ្ឋខ្លះ មានផ្ទះនៅឆ្ងាយពីទីតាំងផ្លូវជាតិ ជាហេតុនាំឲ្យមានផលលំបាកក្នុងការធ្វើដំណើរបន្ត៖ «អ៊ីចឹងគិតថា ឲ្យអ្នកធ្វើដំណើរទៅរកសេវា និងរកទីកន្លែងឲ្យបានច្បាស់លាស់។ កន្លងទៅ យើងឃើញថា ពិបាករកទីកន្លែង និងព័ត៌មាននៃការធ្វើដំណើរអត់បានទូលំទូលាយ»។
សាលារាជធានី នៅព្រឹកថ្ងៃទី៦ តុលា បានបញ្ចេញ រថយន្តក្រុងចំនួន ២០០គ្រឿងបន្ថែម សម្រាប់ដឹកជញ្ជូនពលរដ្ឋទៅមកតាមបណ្ដាខេត្តដោយឥតគិតថ្លៃ នៅឱកាសបុណ្យភ្ជុំបិណ្ឌរយៈពេល ៦ថ្ងៃ។ ដោយឡែក សម្រាប់ផ្លូវរថភ្លើងវិញ ក្រសួងសាធារណការ បានជូនដំណឹងថា បានចាប់ផ្ដើមដឹកជញ្ជូនពលរដ្ឋ ដោយឥតគិតថ្លៃ ចាប់ពីថ្ងៃទី៥ តុលា មក រហូតដល់ថ្ងៃទី១៦តុលា និងបន្ថែមថ្ងៃទី១៩ តុលាមួយថ្ងៃ សម្រាប់គោលដៅភ្នំពេញ ខេត្តព្រះសីហនុ។
ទាំងរថយន្ដក្រុងសាធារណៈ ត្រូវចេញដំណើរចាប់ពីម៉ោង៥៖៣០នាទីព្រឹក ឯរថភ្លើង ត្រូវចេញដំណើរនៅម៉ោង៦៖៣០នាទីព្រឹក។
ប្រធានសមាគមសេដ្ឋកិច្ចក្រៅប្រព័ន្ធ លោក វ៉ន់ ពៅ ក៏មើលឃើញថា ការបញ្ចេញមធ្យោបាយដឹកជញ្ជូនសាធារណៈសម្រាប់ឱកាសបុណ្យភ្ជុំបិណ្ឌបែបនេះ ជាចំណុចប្រសើរ និងអាចប្រកួតប្រជែងជាមួយ ក្រុមហ៊ុនឯកជនបានដែរ។ ប៉ុន្តែ ចំណុចដែលអាជ្ញាធរគួរតែបន្ថែម គឺគួរបន្ថែមថ្ងៃរត់បន្ថែមទៀត ព្រោះពលរដ្ឋខ្លះ ទៅលេងភ្ជុំតាំងពីមុនថ្ងៃទី៥ ឬ៦ តុលា និងពលរដ្ឋខ្លះទៀត អាចនៅលេងស្រុកកំណើតយូរ ទើបត្រលប់មកភ្នំពេញវិញ៖ «ចំពោះគោលដៅ វាជាចំណុចមួយ ដោះស្រាយសម្រាប់ពលរដ្ឋនៅជាប់ផ្លូវជាតិ ផ្លូវធំៗ។ ប៉ុន្តែ វាជាចំណុចមួយមានផលលំបាកផងដែរ សម្រាប់ប្រជាពលរដ្ឋនៅផ្លូវតូចៗ នៅចុងកាត់មាត់ញកមួយចំនួន ចុះពីផ្លូវធំទៅ វាជាចំណុចមួយ មានផលលំបាក សម្រាប់ពលរដ្ឋខ្មែរ ហើយខ្ញុំគិតថា រដ្ឋាភិបាលគួរតែមានវិធានការយ៉ាងម៉េច ធ្វើឲ្យរថយន្ដក្រុង ទៅដល់ភូមិសាស្ត្រចូលទៅដល់ភូមិមួយចំនួន មិនគួរគិតតែត្រឹមផ្លូវធំប៉ិនហ្នឹងទេ»។
អាស៊ីសេរី មិនអាចទាក់ទងសុំការពន្យល់បន្ថែម ពីអ្នកនាំពាក្យសាលារាជធានីភ្នំពេញ លោក ម៉េត មាសភក្ដី បានទេ នៅថ្ងៃទី៦ តុលា ដោយសារមិនលើកទូរស័ព្ទ។ ប៉ុន្តែ សារព័ត៌មានក្នុងស្រុក បានស្រង់សម្ដីលោក ចុះផ្សាយ ថា ការផ្ដួចផ្ដើមគំនិតរបស់មេដឹកនាំរបបក្រុងភ្នំពេញ ធ្វើឡើងដើម្បីជួយសម្រួលដល់ការធ្វើដំណើររបស់ប្រជាពលរដ្ឋគ្រប់និន្នាការទាំងអស់ក្នុងការកាត់បន្ថយការចំណាយ និងកាត់បន្ថយគ្រោះថ្នាក់ចរាចរណ៍ ក្នុងអំឡុងពេលធ្វើដំណើរទាំងទៅទាំងមក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments