គណៈកម្មាធិការជាតិរៀបចំការបោះឆ្នោត ឬហៅកាត់ថា គ.ជ.ប បដិសេធការចោទប្រកាន់របស់លោក សុន ឆ័យ អនុប្រធានគណបក្សភ្លើងទៀន ដែលចោទថា គ.ជ.ប ជាស្ថាប័នមិនឯករាជ្យ។
លិខិតរបស់ក្រុមប្រតិកម្មព័ត៌មាន គ.ជ.ប កាលពីថ្ងៃទី១ មិថុនា បានបដិសេធថា ការចោទប្រកាន់របស់លោក សុន ឆ័យ មិនឆ្លុះបញ្ចាំងពីការពិតទេ ហើយផ្ទុយពីជំហររបស់ គ.ជ.ប ដែលប្រកាន់ភ្ជាប់គោលការណ៍ស្មើភាព និងឥតលម្អៀងជាមួយគ្រប់គណបក្សនយោបាយ ទោះបីជាគណបក្សតូច ឬធំក្ដី។
ការចេញលិខិតបដិសេធរបស់ គ.ជ.ប នេះ ធ្វើឡើងនៅក្រោយពីលោក សុន ឆ័យ បានឆ្លើយតបទៅនឹងអ្នកនាំពាក្យគណបក្សប្រជាជនកម្ពុជា លោក សុខ ឥសាន នៅក្នុងនាទីវេទិកាអ្នកស្ដាប់វិទ្យុអាស៊ីសេរី កាលពីរាត្រីថ្ងៃទី៣១ឧសភាថា គ.ជ.ប តែងតែលម្អៀងទៅគណបក្សកាន់អំណាច ដូចជាការដោះស្រាយបណ្ដឹងរបស់គណបក្សប្រជាជនកម្ពុជាប្ដឹងគណបក្សភ្លើងទៀនជាដើម៖ «ឱ្យតែគណបក្សភ្លើងទៀននិយាយអី មានចំណុចអីហ្នឹង គឺគាត់សហការគ្នាល្អណាស់រវាងគណបក្សគាត់ហើយ និង គ.ជ.ប ដូចជា ត្រូវគ្នាចិត្តមួយថ្លើមមួយតែហ្មង ប្ដឹងនេះមិនចេះឈប់មិនចេះហើយហ្មង»។
ឆ្លើយតបនឹងការចោទប្រកាន់របស់លោក សុន ឆ័យ នេះ លិខិតរបស់ គ.ជ.ប ដដែលអះអាងថា គ.ជ.ប មានយន្តការដោះស្រាយបណ្ដឹងបីថ្នាក់ គឺនៅថ្នាក់គណៈកម្មការឃុំ សង្កាត់ រៀបចំការបោះឆ្នោត គណៈកម្មការរាជធានី ខែត្រ រៀបចំការបោះឆ្នោត និង គណៈកម្មាធិការរៀបចំការបោះឆ្នោត គ.ជ.ប។ គ.ជ.ប បញ្ជាក់ថា គិតមកត្រឹមថ្ងៃទី១ មិថុនា គ.ជ.ប បានទទួលពាក្យបណ្ដឹងចំនួន ៥០បណ្ដឹង ពីតំណាងគណបក្សនយោបាយ និងប្រជាពលរដ្ឋ។ លោក សុខ ឥសាន ថ្លែងក្នុងវេទិកាអ្នកស្ដាប់វិទ្យុអាស៊ីសេរី កាលពីរាត្រីថ្ងៃអង្គារ ទី៣១ ឧសភា គណបក្សប្រជាជនកម្ពុជាបានប្ដឹងគណបក្សភ្លើងទៀនចំនួន ៤៥បណ្ដឹង។
ទោះបីជា គ.ជ.ប ចេញលិខិតប្រកាសនៅមុនការបោះឆ្នោតឃុំ សង្កាត់នៅថ្ងៃទី៥ មិថុនាខាងមុខនេះមកដល់ ដោយអះអាងថា ជាស្ថាប័ននេះ ជាស្ថាប័នឯករាជ្យបែបនេះក្ដី ក៏ស្ថាប័ន គ.ជ.ប រងការចោទប្រកាន់ពីសហគមន៍ជាតិអន្តរជាតិកន្លងមកថា ជាស្ថាប័នមិនឯករាជ្យ ហើយលម្អៀងទៅគណបក្សកាន់អំណាច ដោយសារតែថ្នាក់ដឹកនាំ គ.ជ.ប ចាប់ថ្នាក់ជាតិ ដល់នាក់ឃុំ សង្កាត់ ជាសមាជិកគណបក្សប្រជាជនកម្ពុជា។
កាលពីពេលថ្មីៗ នេះ អង្គការសង្គមស៊ីវិលជាង ៦០ស្ថាប័ន បានទាមទារឱ្យរដ្ឋាភិបាលលោក ហ៊ុន សែន ធានាឱ្យបាននូវលក្ខខណ្ឌអប្បបរមា ៦ចំណុច ដើម្បីឱ្យការបោះឆ្នោតប្រព្រឹត្តទៅដោយសេរី និងយុត្តិធម៌។ ក្នុងក្រុមអង្គការសង្គមស៊ីវិល ស្នើឲ្យ គ.ជ.ប ត្រូវធានាថា ជាស្ថាប័ន ដែលអាចជឿទុកចិត្តបាន ដោយរក្សាសមាសភាពមកពីភាគីពាក់ព័ន្ធ ដូចមានចែងក្នុងរដ្ឋធម្មនុញ្ញ គឺ ៤រូប មកពីបក្សកាន់អំណាច ៤រូបទៀតមកពីបក្សគ្មានអាសនៈក្នុងសភា និង ១រូប ពីខាងសង្គមស៊ីវិលជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments