គណបក្សប្រឆាំងរំពឹងថា ខ្លួននឹងទទួលបានតំណែងអនុប្រធានទី១ និងប្រធានគណៈកម្មការចំនួនពី ៤ ទៅ ៥ នៃគណៈកម្មការជំនាញនៅក្នុងព្រឹទ្ធសភា ក្នុងការបោះឆ្នោតអសកលជ្រើសរើសសមាជិកព្រឹទ្ធសភា នៅដើមឆ្នាំ២០១៨ ខាងមុខ។ ការរំពឹងដូច្នេះ ក្រោយពេល គ.ជ.ប ប្រកាសលទ្ធផលបោះឆ្នោតជ្រើសរើសក្រុមប្រឹក្សាឃុំ-សង្កាត់ ដែលបង្ហាញថា គណបក្សសង្គ្រោះជាតិ ទទួលបានក្រុមប្រឹក្សាឃុំ-សង្កាត់ ទូទាំងប្រទេសមានសំឡេងប្រកៀកប្រកិតនឹងគណបក្សប្រជាជនកម្ពុជា។
ទោះសល់ពេល៦ខែទៀត ទើបមានការបោះឆ្នោតជ្រើសរើសសមាជិកព្រឹទ្ធសភាដែលនឹងប្រព្រឹត្តទៅថ្ងៃ១៤ ខែមករា ឆ្នាំ២០១៨ ខាងមុខក្តី ក៏សមាជិកព្រឹទ្ធសភា និងជាប្រធានស្ដីទីគណបក្ស សម រង្ស៊ី ទាវ វណ្ណុល ឲ្យអាស៊ីសេរី ដឹងថា បើផ្អែកចំនួនក្រុមប្រឹក្សាឃុំ-សង្កាត់ ដែលគណបក្សសង្គ្រោះជាតិ ទទួលបានកាលពីពេលថ្មីៗ និងសមាជិកសភាគណបក្សសង្គ្រោះជាតិ នឹងទទួលបាន ២៦អាសនៈ នៃចំនួនអាសនៈចំនួន៥៨។ លោកថា ក្រុមប្រឹក្សាឃុំ-សង្កាត់ និងសមាជិកសភាគឺជាអង្គបោះឆ្នោតជ្រើសរើសសមាជិកព្រឹទ្ធសភា៖ «»។
បើតាមលោក ទាវ វណ្ណុល ចំនួនអាសនៈនៅព្រឹទ្ធសភាដែលកើតចេញពីការបោះឆ្នោតមានត្រឹមតែ៥៧ ប៉ុន្តែដោយសារខេត្តព្រះសីហនុ ទើបបន្ថែមអាសនៈរដ្ឋសភាមួយទៀត ដូច្នេះចំនួនអាសនៈ នៅព្រឹទ្ធសភានឹងកើនឡើងមួយអាសនៈបន្ថែមទៀត។
សព្វថ្ងៃសមាជិកព្រឹទ្ធសភានៃនីតិកាលទី៣ មានទាំងអស់ចំនួន ៦១រូប ឬ ៦១អាសនៈ។ ក្រៅពីរអាសនៈដែលកើតចេញពីការបោះឆ្នោតនៃសមាជិកចំនួនក្រុមប្រឹក្សាក្នុងមុខតំណែង និងសមាជិករដ្ឋសភាសមាជិកព្រឹទ្ធសភាពីររូប ត្រូវតែងតាំងដោយស្ថាប័នព្រះរាជវាំង និងសមាជិកព្រឹទ្ធសភាពីររូបទៀត តែងតាំងពីរដ្ឋសភា។
ប្រធានស្ដីទីគណបក្ស សម រង្ស៊ី លោក ទាវ វណ្ណុល អះអាងថា ចំនួនអាសនៈដែលគណបក្សសង្គ្រោះជាតិ ដែលនឹងទទួលបានមានចំនួន២៦ គឺបានតិចជាងគណបក្សប្រជាជនកម្ពុជា ត្រឹមតែ ៥អាសនៈ។ ដូច្នេះហើយទើបលោករំពឹងថា គណបក្សសង្គ្រោះជាតិ នឹងទទួលបានតំណែងអនុប្រធានទី០១ នៃព្រឹទ្ធសភា ឬយ៉ាងហោចបើគណបក្សប្រជាជនកម្ពុជា មិនព្រមក៏គណបក្សសង្គ្រោះជាតិ បានតំណែងជាអនុប្រធានទី២ ដែរ។
ទាក់ទងការអះអាងពីការទទួលអាសនៈ និងតួនាទីអនុប្រធានព្រឹទ្ធសភារបស់ពីមន្ត្រីគណបក្សប្រឆាំងដូច្នេះ អាស៊ីសេរីសុំការបញ្ជាក់ពីអគ្គលេខាធិការនៃព្រឹទ្ធសភា លោក អ៊ុំ សារិទ្ធ ប៉ុន្តែលោកសុំមិនធ្វើអត្ថាធិប្បាយទេ ដោយរង់ចាំការបោះឆ្នោតផ្លូវរបស់ព្រឹទ្ធសភាសិន។ ដូចគ្នានេះដែរ មន្ត្រីអង្គការសង្គមស៊ីវិលដែលធ្វើការងារទាក់ទងការបោះឆ្នោតក៏មិនអាចសន្និដ្ឋានពីចំនួនអាសនៈដែលគណបក្សប្រឆាំងកើនកៅអី និងការថយចុះនៃអាសនៈរបស់គណបក្សកាន់អំណាចនៅឡើយដែរ។
យ៉ាងណាក៏ដោយចុះ អ្នកនាំពាក្យគណបក្សប្រជាជនកម្ពុជា លោក សុខ ឥសាន ឲ្យដឹងថា បើតាមការគណនារបស់លោកផ្ទាល់គណបក្សប្រជាជនកម្ពុជា នៅតែរក្សាអាសនៈក្នុងអាណត្តិទី៤ ខាងមុខចំនួន ៣២អាសនៈ ហើយគណបក្សសង្គ្រោះជាតិ អាចទទួលបានជាង ២០អាសនៈ ដែលដូចទៅគណបក្សប្រឆាំងលើកឡើងដែរ។ លោក សុខ ឥសាន ចំនួនកៅអីដែលគណបក្សទទួលបាននេះ គ្រប់គ្រាន់អាចឲ្យគណបក្សរបស់លោកក្នុងការអនុម័តអ្វីមួយនៅស្ថាប័ននេះដដែល៖ «»។
អ្នកនាំពាក្យគណបក្សកាន់អំណាចរូបនេះនិយាយថា ទោះគណបក្សប្រជាជនកម្ពុជា នឹងឈ្នះបានកៅអី ៣២ក្តី ប៉ុន្តែលោកអះអាងថា គណបក្សប្រជាជនកម្ពុជា នៅមានអាសនៈចំនួន៤ មកពីស្ថាប័នរាជវាំង និងរដ្ឋសភា។ លោកថា សមាជិកព្រឹទ្ធសភាពពីររូបមកពីព្រះរាជវាំង គ្មានគោលការណ៍អ្វីប្រឆាំងនឹងគណបក្សកាន់អំណាចទេ។ ចំណែកសមាជិកព្រឹទ្ធសភាមកពីរដ្ឋសភា ទោះគ្មានការគាំទ្រពីគណបក្សប្រឆាំងក៏គណបក្សប្រជាជន ស្នើសមាជិកព្រឹទ្ធពីររូបបានដែរ៖ «»។
ចំពោះការអះអាងថា នឹងទទួលបានតំណែងអនុប្រធានព្រឹទ្ធសភារបស់គណបក្សប្រឆាំង លោក សុខ ឥសាន ថា គឺអាស្រ័យលើការចរចារវាងថ្នាក់ដឹកនាំកំពូលនៃគណបក្សទាំងពីរសិន។
សមាជិកព្រឹទ្ធសភានីតិកាលទី៣នេះ គណបក្សប្រជាជនកម្ពុជា មានសមាជិកចំនួន ៤៦រូប ចំណែកសមាជិកព្រឹទ្ធសភាមកពីគណបក្ស សម រង្ស៊ី មានចំនួន ១១រូបប៉ុណ្ណោះ នៃចំនួនសមាជិកសរុបចំនួន ៦១ នៅក្នុងព្រឹទ្ធសភា។ ក្នុងចំណោមគណៈកម្មការជំនាញទាំង១០ នៅព្រឹទ្ធសភា គណបក្ស សម រង្ស៊ី បានធ្វើជាប្រធានគណៈកម្មការបានតែពីរប៉ុណ្ណោះ គណៈកម្មការប្រាំបីផ្សេងទៀតគ្រប់គ្រងដោយគណបក្សប្រជាជនកម្ពុជា។
លទ្ធផលផ្លូវការពីការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ ដែល គ.ជ.ប ប្រកាសនៅថ្ងៃទី២៥ ខែមិថុនា បង្ហាញថា គណបក្សប្រជាជនកម្ពុជា ឈ្នះនាំមុខគណបក្សសង្គ្រោះជាតិ ដែលទទួលបានតំណែងមេឃុំ-ចៅសង្កាត់ចំនួន ១.១៥៦ ហើយគណបក្សសង្គ្រោះជាតិចំនួន ៤៨៩។ ក្រៅពីមេឃុំ គណបក្សប្រជាជនកម្ពុជា មានជំទប់ទី១ ចំនួន ១.១៣៩ និងជំទប់ទី២ ចំនួន ៥១០។ រីឯគណបក្សសង្គ្រោះជាតិ ទទួលបានតំណែងជំទប់ទី១ ចំនួន ៥០៣ និងជំទប់ទី២ ចំនួន ១.០៨៧។
នាយកប្រតិបត្តិនៃគណៈកម្មាធិការអព្យាក្រឹត និងយុត្តិធម៌ដើម្បីការបោះឆ្នោតដោយសេរី និងត្រឹមត្រូវនៅកម្ពុជា ឬហៅថា អង្គការនិកហ្វិច (NICFEC) លោក សំ គន្ធាមី យល់ថា គណបក្សប្រជាជនកម្ពុជា មិនប្រគល់តំណែងអនុប្រធានទី១ ព្រឹទ្ធសភាទៅគណបក្សសង្គ្រោះជាតិទេ ព្រោះតួនាទីនេះសំខាន់ ត្បិតអីអនុប្រធានទី១ នឹងក្លាយជាប្រធានស្តីទីនៅពេលវត្តមានប្រធានព្រឹទ្ធសភា៖ «»។
លោក សុខ ឥសាន ព្រមានគណបក្សប្រឆាំងថា បើគណបក្សសង្គ្រោះជាតិ ទាមទារតួនាទីហួសហេតុក្នុងព្រឹទ្ធសភា នោះនឹងមិនទទួលបានអ្វីទាំងអស់ ខណៈគណបក្សនេះមិនទាន់ទទួលបានសំឡេងឆ្នោត ៥០ភាគរយនៅក្នុងព្រឹទ្ធសភានៅឡើយ។
បើតាមការអះអាងនៃគណបក្សទាំងពីរ ចំនួនកៅអីសមាជិកព្រឹទ្ធសភានៅអាណត្តិទី៤ ខាងមុខរបស់គណបក្សប្រជាជនកម្ពុជា និងគណបក្សសង្គ្រោះជាតិ មានប្រហាក់ប្រហែលទៅនឹងចំនួនកៅអីនៅក្នុងរដ្ឋសភានៅពេលនេះដែរ។ ក្រោយមានកិច្ចព្រមព្រៀងនយោបាយនៃគណបក្សទាំងពីរ គណបក្សសង្គ្រោះជាតិ ទទួលបានអនុប្រធានទី១នៃរដ្ឋសភា និងធ្វើជាប្រធានគណៈកម្មការចំនួន៥ នៅក្នុងសភា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments