 |
| លោក សម រង្ស៊ី ក្នុងសន្និសីទពីក្រៅប្រទេសកន្លងមក។ ហុង មិនា |
មាស សុខជា ភ្នំពេញ ប៉ុស្តិ៍ Thu, 6 July 2017
ភ្នំពេញៈ គណៈកម្មាធិការអចិន្រៃ្តយ៍នៃរដ្ឋសភានឹងបើកកិច្ចប្រជុំនៅថ្ងៃនេះ ដើម្បីពិនិត្យទៅលើសំណើវិសោធនកម្មច្បាប់ស្តីពីគណបក្សនយោបាយដែលស្នើឡើងដោយលោកនាយករដ្ឋមន្ត្រី ហ៊ុន សែន នាពេលថ្មីៗនេះដើម្បីហាមប្រាមលោក សម រង្ស៊ី អតីតមេដឹកនាំគណបក្សប្រឆាំងមិនឲ្យជ្រៀតជ្រែកក្នុងកិច្ចការនយោបាយស្រុកទេស។
អ្នកនាំពាក្យរដ្ឋសភា លោក ឡេង ប៉េងឡុង បានឲ្យដឹងកាលពីម្សិលមិញថា រដ្ឋសភាបានទទួលរួចហើយនូវសំណើធ្វើវិសោធនកម្មច្បាប់នេះ បន្ទាប់ពីអ្នកជំនាញច្បាប់ និងតំណាងរាស្ត្រគណបក្សប្រជាជនបញ្ចប់ការសិក្សាផ្លូវច្បាប់ហើយលោកថាគណៈកម្មាធិការអចិន្រៃ្តយ៍នៃរដ្ឋសភានឹងជួបប្រជុំនៅថ្ងៃនេះ ដើម្បីពិនិត្យ និងសម្រេចក្នុងការកំណត់ពេលវេលាបើកសម័យប្រជុំពេញអង្គ ដើម្បីធ្វើវិសោធនកម្មចំណុចមួយចំនួននៃច្បាប់នេះ។
បើទោះបីជាមានការរិះគន់លើការធ្វើវិសោធនកម្មច្បាប់ដើម្បីកម្ចាត់លោក សម រង្ស៊ី អតីតប្រធានគណបក្សសង្គ្រោះជាតិពីឆាកនយោបាយក៏ដោយ ក៏លោក ឡេង ប៉េងឡុង បានការពារនីតិវិធីនៃការធ្វើវិសោធនកម្មច្បាប់ដោយលោកថ្លែងថាការធ្វើវិសោធនកម្មច្បាប់ស្តីពីគណបក្សនយោបាយនេះគឺ «រដ្ឋាភិបាលធ្វើទៅតាមច្បាប់។ រដ្ឋាភិបាលស្នើច្បាប់វាជារឿងធម្មតា»។ «គណបក្សណាអាចធ្វើអីពួកគេធ្វើហ្នឹងហើយប្រសិនបើគណបក្សណាឈ្នះកាន់អំណាច ពួកគេចង់លុប [ច្បាប់] ចាស់ ធ្វើ [ច្បាប់] ថ្មី [វាស្រេចតែពួកគេ]»។
លោក ប៉េងឡុង បន្តថា៖ «យើងអញ្ជើញ [សមាជិកគណៈកម្មាធិការអចិន្រៃ្តយ៍ ១០ នាក់ពីគណបក្សទាំងពីរដើម្បីជួបប្រជុំគ្នា] ជាបន្ទាន់ដើម្បីពិនិត្យសំណើច្បាប់របស់សមាជិកសភាជាង ៤០ នាក់»។
លោកបន្ថែមថា៖ «ប្រសិនបើសមាជិកគណៈកម្មាធិការអចិន្រៃ្តយ៍ ៥ នាក់ពីគណបក្សសង្គ្រោះជាតិមិនចូលរួមកិច្ចប្រជុំ វាជារឿងរបស់ពួកគេ»។
នៅពេលទាក់ទងកាលពីម្សិលមិញ តំណាងរាស្ត្រគណបក្សប្រជាជនកម្ពុជាលោក ឈាង វុន បានបដិសេធធ្វើអត្ថាធិប្បាយ។
អនុប្រធានគណបក្សសង្គ្រោះជាតិលោក អេង ឆៃអ៊ាង ថ្លែងថាជាគោលការណ៍ គណបក្សសង្គ្រោះជាតិនឹងចូលរួមកិច្ចប្រជុំ ប៉ុន្តែបានសង្កត់ធ្ងន់ថាប្រសិនបើការអនុវត្ត ឬការធ្វើវិសោធនកម្មច្បាប់មិនផ្តល់អត្ថប្រយោជន៍ជាតិ គណបក្សសង្គ្រោះជាតិនឹងមិនចូលរួមទេ។ ប៉ុន្តែទោះជាយ៉ាងណាក្តីលោកបានបញ្ជាក់ថា គណបក្សសង្គ្រោះជាតិមិនទាន់បានសម្រេចនៅឡើយទេថាតើគណបក្សត្រូវចូលរួមឬអត់ ដោយរង់ចាំពិភាក្សាគ្នាសិន។
លោក ឆៃអ៊ាង បន្ថែមថា៖ «ច្បាប់នេះសម្រាប់ខ្មែរយើងគឺអាក្រក់ដោយសារ [យើង] ធ្វើច្បាប់គឺដើម្បីឲ្យមានការឯកភាពជាតិ។ ប្រសិនបើ [យើង] ធ្វើច្បាប់ដើម្បីបំបែកបំបាក់ កម្ចាត់មនុស្សចេញពីឆាកនយោបាយ វាមិនមានភាពរីកចម្រើនសម្រាប់ប្រទេសកំពុងអភិវឌ្ឍន៍»។ «ពីព្រោះបណ្តាប្រទេសអភិវឌ្ឍន៍ ពួកគេក៏មិនដែលធ្វើច្បាប់បែបនេះដែរ»។
លោក ឆៃអ៊ាង ក៏បានបញ្ជាក់ជាថ្មីផងដែរថាចំពោះសម្ទុះនៃការគាំទ្ររបស់គណបក្សសង្គ្រោះជាតិ បើទោះបីជាលោក សម រង្ស៊ី ត្រូវបានហាមឃាត់មិនឲ្យចូលរួមជាមួយគណបក្សក៏ដោយ ក៏គណបក្សនេះនៅតែរឹងមាំដោយសារកម្មវិធីនយោបាយរបស់គណបក្សច្បាស់លាស់ដោយលោកចង្អុលបង្ហាញអំពីលទ្ធផលនៃការបោះឆ្នោតឃុំ សង្កាត់នាពេលថ្មីៗដែលគណបក្សសង្គ្រោះជាតិឈ្នះបានជិត ៥០០ ឃុំសង្កាត់៕ PS
From KI Media - Khmer Intelligence
via_IFTTT
0 Comments