មន្ត្រីសង្គមស៊ីវិលជំរុញឱ្យអាជ្ញាធរកម្ពុជា ស៊ើបអង្កេតករណីចាប់ពង្រត់សកម្មជននយោបាយថៃម្នាក់នៅក្នុងទីក្រុងភ្នំពេញ ដើម្បីបញ្ជៀសការរិះគន់ពីសហគមន៍ជាតិ និងអន្តរជាតិ។ ការលើកឡើងនេះ បន្ទាប់ពីក្រសួងមហាផ្ទៃ បដិសេធស៊ើបអង្កេតករណីនេះ ដោយអះអាងថា សមត្ថកិច្ចមិនបានដឹង ករណីនេះ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ (LICADHO) លោក អំ សំអាត មានប្រសាសន៍ថា អាជ្ញាធរមិនគួរប្រញាប់បដិសេធចំពោះការស៊ើបអង្កេតករណីចាប់ពង្រត់ សកម្មជននយោបាយក្រុមអាវក្រហមថៃ នៅក្នុងទឹកដីកម្ពុជានោះទេ ទោះបីជាករណីអ្វីក៏ដោយ។ លោក លើកឡើងថា អាជ្ញាធរ មានកាតព្វកិច្ចត្រូវស៊ើបអង្កេតករណីនេះ ដើម្បីធានានូវការស្វែងរកយុត្តិធម៌និងការពិត និងធានាកុំឱ្យមានការិះគន់នានាពីសហគមន៍ជាតិ និងអន្តរជាតិ៖ «ជាធម្មតាទេ ប្រសិនបើមានបទល្មើសកើតឡើងនៅលើទឹកដីរបស់ខ្លួន ដូច្នេះត្រូវតែមានការស្រាវជ្រាវនិងស៊ើបអង្កេតឱ្យបានច្បាស់លាស់ ព្រោះបើយើងមិនបើក ការស៊ើបអង្កេតរកការពិតណាមួយទេ នឹងរងផលនៃការរិះជាច្រើនហើយក៏ប៉ះពាល់ដល់នីតិវិធី ឬដល់ការអនុវត្តច្បាប់នៅក្នុងប្រទេសយើងផងដែរ»។
លោក អំ សំអាត ឱ្យដឹងថា ខាងអង្គការលីកាដូ (Licadho) ក៏កំពុងស្រាវជ្រាវករណីនេះដែរ ក្រោយមានព័ត៌មាន ស្តីពីការចាប់ពង្រត់សកម្មជននយោបាយថៃ ហើយក្រោយមកបាត់ដំណឹងនេះ ប៉ុន្តែលោកមិនទាន់ ដឹងអំពីលទ្ធផលនៅឡើយទេ។
អាស៊ីសេរី បានព្យាយាមទាក់ទងសុំការឆ្លើយតបអំពីរឿងនេះពីអ្នកនាំពាក្យអគ្គស្នងការនគរបាល ជាតិ លោក ឆាយ គឹមខឿន និងប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន ជាច្រើន លើក នៅថ្ងៃទី៦ ខែមិថុនា តែទូរស័ព្ទចូលពុំមានអ្នកទទួល។
ប៉ុន្តែ លោក ឆាយ គឹមខឿន បានប្រាប់កាសែតបាងកកប៉ុស្តិ៍របស់ថៃថា លោកមិនបានដឹងអំពីករណីបាត់ខ្លួននេះទេ ដូច្នេះតើឱ្យលោក ស៊ើបអង្កេតរបៀបម៉េច។ ទោះបីយ៉ាងណា មន្ត្រីនាំពាក្យ ក្រសួងយុត្តិធម៌អះអាងផ្ទុយវិញថា លោកសង្ឃឹមថា សមត្ថកិច្ចនឹងស៊ើបអង្កេតករណីនេះ។ លោក ស្នើឱ្យសង្គមស៊ីវិល កុំធ្វើសេចក្តីសន្និដ្ឋាននៅមុនការស៊ើបអង្កេត។
ដោយឡែក អ្នកនាំពាក្យប៉ូលិសថៃ លោក ពលកុល គីស្សាណា ផាត់ថាណាឆារើន (Pol Col Kissana Phathanacharoen) ប្រាប់កាសែតបាងកកប៉ុស្តិ៍ថា ករណីនិស្សិតថៃម្នាក់ឈ្មោះ វ៉ាន់ឆាឡឺម នឹងចាត់វិធានការច្បាប់មិនខុសពីករណីដទៃទៀតដែលសង្ស័យថា រត់ភៀសខ្លួនទៅក្រៅប្រទេស នោះទេ ដោយបញ្ជាក់ថា ប៉ូលិសថៃបានផ្ដួចផ្ដើមដំណើរការដើម្បីស្វែងរកការធ្វើបត្យាប័ននៅពេលដឹងថារូបគេបានភៀសខ្លួនចេញពីប្រទេសថៃ។ ប៉ុន្តែមន្ត្រីប៉ូលិសថៃរូបនេះ មិនបានបញ្ជាក់ថា បានបញ្ជូនកម្លាំង ឬស្នើប៉ូលិសកម្ពុជា ទៅចាប់លោកលោក វ៉ាន់ឆាឡឺម នោះទេ។
សកម្មជនយោបាយថៃ លោក វ៉ាន់ឆាឡឺម សាតស័ក្តិសិទ្ធ (Wanchalearm Satsaksit) ដែលជាសកម្មជន ក្រុមអាវក្រហមថៃ គាំទ្រអតីតនាយករដ្ឋមន្ត្រីថៃ លោក ថាក់ ស៊ីន ត្រូវបានបាត់ខ្លួន ក្រោយមានការចោទប្រកាន់ថា យុវជនរូបនេះ ត្រូវបានបុរសប្រដាប់អាវុធមួយក្រុប សម្រុកចាប់បញ្ជូលរថយន្តពណ៌ខ្មៅមួយពីមុខអគារស្នាក់នៅរបស់គាត់នៅក្រុងភ្នំពេញ កាលពីថ្ងៃទី៤ ខែមិថុនា ខណៈគាត់កំពុងទិញម្ហូបអាហារ។ យុវជនរូបនេះ បានរស់នៅនិរទេសខ្លួន ក្នុងប្រទេសកម្ពុជា ក្រោយត្រូវបានចោទប្រកាន់ពីបទប្រមាថព្រះមហាក្សត្រថៃ តាំងពីឆ្នាំ២០១៤ មក។ យុវនិស្សិត វ៉ាន់ឆាឡឺម ជាអ្នករិះគន់ឥតសំចៃមាត់ទៅលើនយោបាយដឹកនាំរបស់នាយករដ្ឋមន្ត្រីថៃ លោក ប្រាយុទ្ធ ចាន់អូចា។
អង្គការសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (HRW) ដែលកំពុងឃ្លាំមើលរឿងនេះ បានបញ្ជាក់ប្រាប់អាស៊ីសេរីថា ការចាប់ពង្រត់សកម្មជននយោបាយជនជាតិថៃរូបនេះ ពិតជាកើតមាន ប៉ុន្តែអង្គការនេះនៅមិនទាន់អាចបញ្ជាក់បានថា តើអំពើនេះធ្វើឡើងដោយសមត្ថកិច្ចកម្ពុជា ឬថៃនោះទេ។ ជោគ វាសនារបស់យុវជននេះ ក៏នៅមិនទាន់ដឹងយ៉ាងម៉េចនោះដែរ។
រីឯអ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ជំរុញឱ្យរដ្ឋាភិបាល កម្ពុជា សហការជាមួយរដ្ឋាភិបាលថៃ រួមគ្នាស្រាវជ្រាវករណីនេះ និងបង្ហាញជាសាធារណៈដើម្បី ធានាអំពីសុវត្ថិភាពរបស់សកម្មជននយោបាយប្រជាធិបតេយ្យរបស់ថៃ ដែលត្រូវបានចោទប្រកាន់ថា បាត់ខ្លួនដោយបង្ខំនៅកម្ពុជា៖ «ចង់ ឬមិនចង់នៅពេលករណីនេះ កើតនៅលើប្រទេសកម្ពុជា គឺប្រទេសផ្សេងៗនិងសកម្មជនប្រជាធិបតេយ្យច្បាស់ជាមានការតាមដាននៅតាមសារព័ត៌មាន អន្តរជាតិធំៗ និងអង្គការជាតិនានាគឺគេផ្តោតយកចិត្តទុកដាក់បញ្ហានេះមកលើកម្ពុជា ដូច្នេះប្រសិនបើអាជ្ញាធរកម្ពុជា ចង់គេចវេះពីបញ្ហានេះច្បាស់ជាមានការរិះគន់ការអនុវត្តច្បាប់និងការ ការពារសន្តិសុខដល់ភ្ញៀវជាតិ និងអន្តរជាតិ ម៉្លោះហើយចង់មិនចង់ត្រូវតែធ្វើការងារនេះឱ្យល្អប្រសើរដើម្បីឆ្លើយតបនឹងបំភ្លឺដល់សាធារណជន និងសហគមន៍អន្តរជាតិ»។
លោក ស៊ឹង សែនករុណា បង្ហាញការព្រួយបារម្ភថា ប្រសិនបើករណីចាប់ពង្រត់សកម្មជននយោបាយថៃ ពីកម្ពុជានេះកើតឡើងប្រាកដមែន អាចនឹងមានកិច្ចសហការសម្ងាត់រវាងរដ្ឋាភិបាល និងរដ្ឋាភិបាល ក្នុងការដោះដូរអ្នកទោសនយោបាយ។ លោកបន្តថា ថ្វីដ្បិតតែកម្ពុជា និងថៃមានកិច្ចព្រមព្រៀងស្តីពីការធ្វើបត្យាប័នក្តី ប៉ុន្តែការចាប់បញ្ជូនអ្នកនយោបាយដោះដូរគ្នានេះ គឺជាការរំលោភសិទ្ធិមនុស្សធ្ងន់ធ្ងរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments