មន្ត្រីបក្សកាន់អំណាចស្វាគមន៍ សារជូនពររបស់លោក មាជ សុវណ្ណារ៉ា និងអ្នកទោសមនសិការ ១៤ នាក់ផ្សេងទៀត ប៉ុន្តែ លោកចាត់ទុកថា សារបែបនេះ មិនអាចបន្ធូរបន្ថយទោសអ្នកជាប់ឃុំទាំងនោះបាននោះទេ។ មន្ត្រីនាំពាក្យគណបក្សប្រជាជនកម្ពុជា លោក សុខ ឥសាន ប្រាប់អាស៊ីសេរីនៅថ្ងៃទី ៨ ខែមករា នេះថា សាររបស់លោក មាជ សុវណ្ណារ៉ា ជាអន្ទាក់ ឲ្យរដ្ឋាភិបាលទទួលស្គាល់អ្នកជាប់ឃុំទាំងនោះ ជាអ្នកទោសមនសិការទៅវិញ។ «»
ប្រតិកម្មរបស់មន្ត្រីនាំពាក្យរដ្ឋាភិបាលនេះ ធ្វើឡើងក្រោយពី លិខិតមួយច្បាប់ មានហត្ថលេខាលោក មាជ សុវណ្ណារ៉ា ចុះថ្ងៃទី៥ ខែមករា ត្រូវបានចែកផ្សាយព្រោងព្រាត នៅតាមបណ្ដាញសង្គមហ្វេសប៊ុក។
លិខិតនោះរៀបរាប់ថា ខ្ញុំបាទ មាជ សុវណ្ណារ៉ា ជាអ្នកទោសមនសិការ ពិតជាមានក្ដីសោមនស្សរីករាយយ៉ាងក្រៃលែង ដោយខ្ញុំបាទបានចង់ចាំ ជារៀងរាល់ខែមករា ថ្ងៃទី៥ គឺជាថ្ងៃមង្គល នៃការរំលឹកឡើងវិញ នូវអនុស្សាវរីយ៍ដ៏កម្សត់កម្រ ជូរចត់ និងពោរពេញ ដោយការតស៊ូពុះពារ គ្រប់ស្ថានភាពលំបាក នៃសម្ដេចទាំងពីរ ដើម្បីសម្រេចឲ្យបាននូវបុព្វហេតុសន្តិភាព ជាតិមាតុភូមិសម្រាប់ប្រជាជនខ្មែរ។
លិខិតដដែលបន្ដទៀតថា ជាង៣ឆ្នាំមកនេះ ខ្ញុំស្ទើរតែភ្លេចថ្ងៃកំណើតរបស់ភរិយា និងកូនស្រីពៅរបស់ខ្ញុំ ប៉ុន្តែ ខ្ញុំនៅតែចាំថ្ងៃពិសេស ៥ មករា ជាថ្ងៃមង្គលរបស់លោកនាយករដ្ឋមន្ត្រី ហ៊ុន សែន និង លោកស្រី ប៊ុន រ៉ានី។ ក្រោយពេលដឹងភ្លាម ខ្ញុំក៏ជម្រាបទៅកាន់មិត្តៗ កំពុងជាប់ឃុំទាំង ១៤នាក់ភ្លាម។ ពួកគេក៏បានតឿនខ្ញុំ ឲ្យឆាប់សរសេរលិខិតមួយច្បាប់នេះ ដើម្បីជូនពរសម្ដេចទាំងពីរ ឲ្យនៅទាន់ថ្ងៃទី៥ ខែមករានេះ។ ជាចុងក្រោយលិខិតបញ្ជាក់ថា “ជាអ្នកទោសមនសិការ ប្រៀបដូចបក្សីកម្សត់ កំពុងជាប់ទ្រុង សង្ឃឹមអ្នកមានបុណ្យ” យើងទាំង ១៥ នាក់ គ្មានអ្វីជាប់នៅនឹងខ្លួនឡើយ មានតែនាំគ្នាបន្តក់លោហិតម្នាក់១តំណក់ នៅក្នុងគុកងងឹតនេះ ដើម្បីជាបច្ច័យ សម្រាប់ការបួងសួងដល់ទេវតាឆ្នាំថ្មី និងវត្ថុស័ក្ដិសិទ្ធិក្នុងលោកឲ្យជួយតាមថែរក្សា និងជ្រោមជ្រែងសម្ដេចទាំងពីរ ឲ្យប្រកបដោយសុខុមាលភាព សុភមង្គល សុខដុមរមនាជានិច្ច។
ភរិយារបស់លោក មាជ សុវណ្ណារ៉ា គឺអ្នកស្រី Jamie Meach បានសរសេរសារនៅលើហ្វេសប៊ុកគាត់ កាលពីថ្ងៃទី៦ ខែមករា ដោយភ្ជាប់លិខិតនេះមកជាមួយដែរ នឹងបានចោទជាសំណួរថា គ្រាន់តែសារជូនពររបស់ប្ដីអ្នកស្រីមួយច្បាប់នេះ ខុសធ្ងន់ណាស់មែនទេ។
អ្នកស្រីបន្តថា តើយើងមិនអាចរកសន្តិភាព រវាងខ្មែរនឹងខ្មែរ បានទេអី ចាំបាច់នៅចងគំនុំ ចង់ស៊ីសាច់ និងបង្ហូរឈាមគ្នាយកឈ្នះយកចាញ់គ្នា ដល់ពេលណាទៀតទៅ។
បើទោះជាយ៉ាងនេះក្តី អ្នកនាំពាក្យបក្សកាន់អំណាច លោក សុខ ឥសាន អះអាងថា សារជូនពរនេះ ជាការល្អតាមផ្លូវសីលធម៌ ប៉ុន្តែគ្មានប្រយោជន៍អ្វី ដែលអាចឲ្យរដ្ឋាភិបាលបន្ទន់ចិត្ត ដោះលែងអ្នកជាប់ឃុំទាំងអស់នោះទេ។ ទោះជាលិខិតសុំទោសក៏អត់ប្រយោជន៍ដែរ ព្រោះលោកអះអាងថា រដ្ឋាភិបាលមិនអនុវត្តឲ្យរំលងច្បាប់ទេ ពោលគឺ “យល់ញាតិឃ្លាតច្បាប់”៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments