មន្ត្រីគណបក្សប្រឆាំងយល់ឃើញថា មូលហេតុ ដែលមេដឹកនាំយោធាមីយ៉ាន់ម៉ា (Myanmar) ឬភូមា បដិសេធការស្នើសុំរបស់លោក ហ៊ុន សែន ជួបជាមួយអ្នកស្រី អ៊ុង សានស៊ូជី (Aung San Suu Kyi)អាចមកពីភាគីភូមា ខ្លាចលោក ហ៊ុន សែន ទាញយកប្រជាប្រិយភាព ខណៈដែលរដ្ឋាភិបាលរបស់លោក ក៏បានចាប់ឃុំខ្លួនមេដឹកនាំបក្សប្រឆាំងដែរ។ កាលើកឡើងនេះ បន្ទាប់ពីសំណើរបស់ប្រធានព្រឹទ្ធសភាកម្ពុជា លោក ហ៊ុន សែន ដែលល្បីឈ្មោះខាងគំរាម និងចាប់ខ្លួនមន្ត្រីបក្សប្រឆាំងដាក់គុកនោះ ស្នើទៅកាន់មេដឹកនាំរបបសឹកភូមាសុំជួប អ្នកស្រី អ៊ុងសាន ស៊ូជី នោះត្រូវបានបដិសេធ។
ពេលនេះ សំណើរបស់ប្រធានព្រឹទ្ធសភាកម្ពុជា គឺលោក ហ៊ុន សែន ដែលស្នើសុំជួបមេដឹកនាំរដ្ឋាភិបាលស្របច្បាប់ភូមា ដែលកំពុងជាប់ឃុំ គឺអ្នកស្រី អ៊ុង សាន ស៊ូជី នោះ មិនបានសម្រេចដូចបំណងឡើយ។
អតីតតំណាងរាស្ត្រ គណបក្សសង្គ្រោះជាតិ លោក អ៊ំ សំអាន ប្រាប់វិទ្យុអាស៊ីសេរី នៅថ្ងៃទី៩ ខែឧសភា ថា មូលហេតុដែលមេដឹកនាំរបបសឹកភូមា លោក ម៊ីន អ៊ុងលាំង (Min Aughlaing) មិនអនុញ្ញាតឱ្យលោក ហ៊ុន សែន ជួបជាមួយមេដឹកនាំ រដ្ឋាភិបាលស្របច្បាប់ ដែលកំពុងជាប់ឃុំ គឺអ្នកស្រី អ៊ុង សានស៊ូជី ដោយសារមេដឹកនាំរបបសឹកភូមា មិនចង់ឱ្យលោក ហ៊ុន សែន លូកដៃចូលអន្តរាគមន៍ និងឆ្លៀតយកវិបត្តិនៅភូមា ដើម្បីរកប្រជាប្រិយភាព។ ទោះជាយ៉ាងណា លោក អ៊ំ សំអាន លើកជាសំណួរថា ខុសពីថ្នាក់ដឹកនាំប្រទេសដទៃទៀត លោក ហ៊ុន សែន មានគីឡូធ្ងន់ ដែលរាប់អានគ្នាជាមួយ លោក ម៊ីន អ៊ុងលាំង ដូចជាបងប្អូនធម៌ហើយ តែហេតុអ្វីមេដឹកនាំរបបសឹករូបនេះ នៅតែមិនទុកមុខឱ្យលោក ហ៊ុន សែន ដូច្នេះ?
លោក អ៊ំ សំអាន៖ «លោក ហ៊ុន សែន គឺគីង្គក់លក់ថ្នាំស្រែង ស្រែងខ្លួនឯងព្យាបាលមិនជាផង ទៅព្យាបាលស្រែងឱ្យគេយ៉ាងម៉េច? ប្រជាធិបតេយ្យ និងការរំលោភសិទ្ធិមនុស្ស និងការចាប់ចងដាក់ពន្ធនាគារសម្រាប់បក្សប្រឆាំងហ្នឹង មិនអាចដោះស្រាយបានផងហ្នឹង ហើយចង់ដោះស្រាយការបង្រួបបង្រួម នៅភូមាយ៉ាងម៉េចបាន»។
រដ្ឋាភិបាលនៃរបបសឹកភូមា តាមរយៈអ្នកនាំពាក្យ លោក ច មីនទុន (Zaw Min Tun) នៅថ្ងៃទី០៨ ខែឧសភា បានឆ្លើយតបតាមរយៈសារសំឡេងដែលក្រុមយោធាផ្ញើទៅទីភ្នាក់ងារព័ត៌មានបារាំង AFP បានបដិសេធការស្នើសុំរបស់លោក ហ៊ុន សែន សុំជួបមេដឹកនាំលទ្ធិប្រជាធិបតេយ្យ និងជាម្ចាស់ជ័យលាភីណូបែលសន្តិភាពអាយុ ៧៨ ឆ្នាំ អ្នកស្រី អ៊ុងសាន ស៊ូជី ថា របបយោធាមិនមានហេតុផលដើម្បីសម្របសម្រួលឱ្យមានជំនួបកើតឡើងនៅពេលនេះឡើយ ដោយរដ្ឋាភិបាលកំពុងផ្ដោតទៅលើការរៀបចំការបោះឆ្នោតនៅពេលខាងមុខតាមការសន្យា ដែលជាហេតុនាំឱ្យរដ្ឋាភិបាលយោធាត្រូវចៀសវាងរាល់បញ្ហាដែលអាចពន្យារពេល ឬរំខានដល់ដំណើរការបោះឆ្នោត។
ការបដិសេធនេះ ធ្វើឡើងក្រោយពេល លោក ហ៊ុន សែន ប្រធានព្រឹទ្ធសភា ជួបប្រជុំជាមួយមេដឹកនាំយោធា លោក ម៊ីន អ៊ុងលាំង តាមប្រព័ន្ធវីដេអូ កាលពីថ្ងៃទី៧ ខែឧសភា។
ប្រធានព្រឹទ្ធសភាកម្ពុជាបានជួបលោក ម៊ីន អ៊ុងលាំង តាមប្រព័ន្ធវីឌីអូនេះ នៅក្រោយពីលោក ហ៊ុន សែន បានជួបឯកអគ្គរដ្ឋទូតនៃរបបដឹកនាំរដ្ឋប្រហារយោធាភូមា គឺលោក ខ្យហ៍ ស៊ូមីន (Kyaw Soe Min) កាលពីថ្ងៃទី០៨ ខែមេសា នៅវិមានព្រឹទ្ធសភា។ ក្នុងជំនួបនោះ លោក ហ៊ុន សែន បានសំណូមពរចង់ជួបលោក ម៊ីន អ៊ុងលាំង តាមរយៈ វីដេអូ Conference ដែលលោកអះអាងថា ដើម្បីសួរសុខទុក្ខ និងពិគ្រោះយោបល់ស្វែងរកដំណោះស្រាយវិបត្តិនៅមីយ៉ាន់ម៉ា។
កាលពីឆ្នាំ២០២២ ក្នុងពេលដែលកម្ពុជា ធ្វើជាប្រធានប្តូរវេនអាស៊ាន លោក ហ៊ុន សែន ក៏ធ្លាប់បានមេដឹកនាំរបបសឹកភូមា បដិសេធមិនឱ្យចូលជួបអ្នកស្រី អ៊ុងសាន ស៊ូជី ម្ដងដែរ ក្រោមហេតុផលថា អ្នកស្រីកំពុងស្ថិតក្រោមនីតិវិធីតុលាការ។
ទាក់ទិនរឿងនេះ អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិក លោក សេង វណ្ណលី យល់ឃើញថា ការបដិសេធរបស់មេដឹកនាំរបបសឹកយោធា ក៏អាចបណ្ដាលមកពីឥទ្ធិពលអវិជ្ជមាននៃស្ថានភាពនយោបាយនៅក្នុងប្រទេសកម្ពុជាដែលមិនទាន់មានឯកភាពជាតិនៅឡើយ។
លោក សេង វណ្ណលី៖ «ហើយណាមួយយើងឃើញថា អ្នកគាំទ្រអ្នកស្រី អ៊ុងសាន ស៊ូជី និងឥស្សរជនគណបក្សនយោបាយមកពីក្រុមអ្នកប្រជាធិបតេយ្យរបស់អ្នកស្រី អ៊ុង សានស៊ូជី ខ្លួនឯង ក៏មិនគាំទ្រកិច្ចខិតខំព្យាយាមរបស់អតីតនាយករដ្ឋមន្ត្រី លោក ហ៊ុន សែន ដែរ។ ជាពិសេសត្រង់ចំណុចដែរ អតីតនាយករដ្ឋមន្ត្រី ហ៊ុន សែន កាលនៅជាប្រធានអាស៊ាន ព្យាយាមបញ្ចុះបញ្ចូលសមាជិកអាស៊ានដទៃទៀត ដើម្បីអនុញ្ញាតឱ្យរបបសឹកហ្នឹងបញ្ជូនអ្នកនយោបាយ ដើម្បីចូលរួមកិច្ចប្រជុំនានារបស់អាស៊ាន ក្រោយមកត្រូវបានសមាជិកអាស៊ាន ទាត់ចោលចំពោះសំណើនេះ»។
វិបត្តិនយោបាយនៅភូមា បានជាប់គាំងជាង ៣ឆ្នាំមកហើយ គិតចាប់តាំងពីមេដឹកនាំយោធា លោក ម៊ីន អ៊ុងលាំង បានធ្វើរដ្ឋប្រហារទម្លាក់រដ្ឋាភិបាលស៊ីវិល អ្នកស្រី អ៊ុង សានសូជី កាលពីខែកុម្ភៈ ឆ្នាំ២០២១ មក។ ឥលូវនេះ វិបត្តិនយោបាយកាន់តែធ្ងន់ធ្ងរ ដែលនាំឱ្យប្រទេសនេះ ធ្លាក់ចូលក្នុងសង្គ្រាមស៊ីវិលរ៉ាំរ៉ៃ និងបង្ហូរឈាមនៅទូទាំងប្រទេស។
តាំងតែពីជាប់ពន្ធនាគារក្នុងរដ្ឋធានី ណៃពិដោ (Naypyitaw) អស់រយៈពេលជាង ៣ឆ្នាំមកនេះ អ្នកស្រី អ៊ុងសាន ស៊ូជី ធ្លាប់ជួបជាមួយបេសកជនបរទេសតែម្នាក់គត់ កាលពីខែកក្កដា ឆ្នាំ២០២៣ នោះគឺអតីតរដ្ឋមន្ត្រីការបរទេសថៃ លោក ដុន ប្រាមុដវីណៃ (Don Pramudwinai) ដោយបាននិយាយគ្នា អស់រយៈពេលជាងមួយម៉ោង។
យ៉ាងណាក៏ដោយចុះ លោក អ៊ំ សំអាន ដែលធ្លាប់ត្រូវលោក ហ៊ុន សែន ចាប់ដាក់ពន្ធនាគារដែរនោះ លើកឡើងថា ទង្វើរបស់ប្រធានព្រឹទ្ធសភា លោក ហ៊ុន សែន មិនខុសពីមេដឹកនាំភូមា លោក ម៊ីន អ៊ុងលាំង នោះឡើយ ពីព្រោះលោកបានបញ្ជាឱ្យតុលាការចាប់ខ្លួន និងផ្ដន្ទាទោសមេដឹកនាំបក្សប្រឆាំង គឺលោក កឹម សុខា ឃុំក្នុងផ្ទះរយៈពេល២៧ឆ្នាំ និងហាមមិនឱ្យជួប ឬទាក់ទងជាមួយមនុស្សម្នា ក្រៅតែពីក្រុមគ្រួសាររបស់លោក។ មន្ត្រីបក្សប្រឆាំងរូបនេះ ជំរុញឱ្យលោក ហ៊ុន សែន ធ្វើជាគំរូ ដោយដោះលែងអ្នកប្រឆាំង និងស្ដារលទ្ធិប្រជាធិបតេយ្យនៅក្នុងផ្ទះខ្លួនឯងជាមុនសិន មុននឹងចង់ដើរតួជាអ្នកផ្សះផ្សាជម្លោះឱ្យជាតិគេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ៕
From ព័ត៌មានថ្មីៗ | RFA
via_IFTTT
0 Comments