អនុប្រធានទី១ ក្រុមប្រឹក្សាអភិវឌ្ឍន៍កម្ពុជាលោក ស៊ុន ចាន់ថុល បង្ហាញព័ត៌មានអំពីគម្រោងព្រែកជីកហ្វូណនតេជោដល់តំណាងស្ថានទូតមួយចំនួនប្រចាំនៅកម្ពុជា ក្រោយពេលមានការរិះគន់ និងជំទាស់ពីវៀតណាម។ ទោះជាយ៉ាងណាក្ដី អ្នកវិភាគនិយាយថា គម្រោងព្រែកជីកហ្វូណនតេជោ នៅតែសង្ស័យពីមតិជាតិ និងអន្តជាតិថា ប្រសិនបើការគ្រប់គ្រងព្រែកជីកនេះ នៅតែស្ថិតក្រោមការគ្រប់គ្រងរបស់ក្រុមហ៊ុនចិន។
លោក ស៊ុន ចាន់ថុល ប្រាប់ឯកអគ្គរាជទូត និងអ្នកតំណាងស្ថានទូតមួយចំនួនប្រចាំនៅកម្ពុជាថាសហរដ្ឋអាមេរិក និងប្រទេសជាប់ទន្លេមេគង្គរួមមានប្រទេស ឡាវ ថៃ មីយ៉ាន់ម៉ា មិនបានហាមឃាត់ចំពោះការសាងសង់ព្រែកជីកនេះទេ លើកលែងតែប្រទេសវៀតណាមប៉ុណ្ណោះ។ លោក ស៊ុន ចាន់ថុល បន្តថារដ្ឋាភិបាលកម្ពុជាបានសិក្សាគម្រោងនេះជាង ២ឆ្នាំ និងបញ្ជាក់ថា គ្មានផលប៉ះពាល់ទៅលើបរិស្ថាននោះដែរ។
លោក ស៊ុន ចាន់ថុល៖ «ខ្មែរ វៀតណាម ថៃ ឡាវ ភូមា នេះ ប្រាំហើយណា។ ប្រាំទៀតនៅសមុទ្រឯណោះ គ្មានព្រួយបារម្ភអីទេ តែគេលើកចេះតែលើកទៅ តែអ្នកព្រួយបារម្ភជាងគេមិត្តវៀតណាមនៅក្រោមនេះឯង។ អ៊ីចឹងបានខ្ញុំបានពន្យល់អស់ហើយ ទឹកហូរចេញតិច: យើងសិក្សាលំអិតណាស់កុំបារម្ភអី កុំបារម្ភ»។
លោក ស៊ុន ចាន់ថុល ក៏នឹងបន្តធ្វើបទបង្ហាញអំពីគម្រោងព្រែកជីកហ្វូណនតេជោជាសាធារណៈនៅវិទ្យាស្ថានបច្ចេកវិទ្យាហៅកាត់ថា តិចណូ (ITC) នៅថ្ងៃទី៤ ឧសភា។
ការបង្ហាញជំហររបស់កម្ពុជានេះធ្វើឡើងក្រោយពេលមន្ត្រីជាន់របស់ប្រទេសវៀតណាមនៅតែទាមទារឱ្យរដ្ឋាភិបាលកម្ពុជាផ្ដល់ព័ត៌មានលំអិតអំពីព្រែកជីកនេះ និងអនុញ្ញាតឱ្យគណៈកម្មការទន្លេមេគង្គ (MRC) ចូលរួមស្រាវជ្រាវពីផលប៉ះពាល់ពីគម្រោង។
អត្ថបទស្រាវជ្រាវរបស់វៀតណាមមួយវាយតម្លៃថា ព្រែកជីកហ្វូណនតេជោ មិនត្រឹមតែជាគម្រោងមួយដែលបម្រើឱ្យសេដ្ឋកិច្ច-សង្គមកម្ពុជាប៉ុណ្ណោះទេ ក៏ប៉ុន្តែព្រែកជីកនេះ ក៏មានតម្លៃចម្បងបម្រើឱ្យវិស័យយោធារបស់ចិនផងដែរ។ ក្រុមអ្នកស្រាវជ្រាវវៀតណាម សន្និដ្ឋានថា គម្រោងនេះនឹងបង្កផលប៉ះពាល់ខ្លាំងក្លាដល់ស្ថានភាពវិស័យការពារជាតិ និងសន្តិសុខនៃតំបន់ទាំងមូល ស្របពេលដែលចិនកំពុងអភិវឌ្ឍកំពង់ផែកងទ័ពជើងទឹករាមនៅកម្ពុជាស្រាប់។ នេះបើយោងតាមសេចក្តីដកស្រង់របស់សារព័ត៌មាន ឌឹ ស្ត្រេតស៍ ថាមស៍ (The Straits Times) នៃប្រទេសសិង្ហបុរី ផ្សាយកាលពីថ្ងៃទី៦ ខែមេសា។
ជុំវិញរឿងនេះ អ្នកសិក្សាផ្នែកច្បាប់ លោក វ៉ន ចាន់ឡូត លើកឡើងថា បើទោះជាថ្នាក់ដឹកនាំកម្ពុជាព្យាយាមបកស្រាយពីអត្ថប្រយោជន៍ នៃព្រែកជីកហ្វូណនតេជោនេះជាបន្តបន្ទាប់ក្ដី លោកយល់ថា រដ្ឋាភិបាលនៅតែមិនទទួលបានទំនុកចិត្តពីពលរដ្ឋខ្មែរ និងសហគមន៍អន្តរជាតិនោះទេ។
លោក វន ចាន់ឡូត បន្តថា ការមិនទទួលបានការជឿជាក់នេះ គឺដោយសារតែគម្រោងព្រែកជីកនេះសាងសង់ដោយលុយរបស់ក្រុមហ៊ុនចិនក្នុងផ្នែកមួយនៃគម្រោង «ខ្សែក្រវាត់មួយផ្លូវមួយ» (One Belt One Road) របស់រដ្ឋាភិបាលចិន ហើយនឹងត្រូវគ្របគ្រងដោយក្រុមហ៊ុនចិនបន្ទាប់ពីសាងសង់រួច។
លោក វន ចាន់ឡូត៖ «ហើយចំណុចទី៣ រដ្ឋាភិបាលគួរតែប្រើប្រាស់ថវិកាជាតិ បើអាចបានទាំងស្រុងក៏ល្អ បើជាថវិកាកម្ចីពីបរទេស យើងគួរឱ្យមានការចូលរួមកម្ចីច្រើនស្ថាប័ន នៅពេលដែលសាងសង់ហើយកម្ពុជាជាអ្នកគ្រប់គ្រងប្រើប្រាស់ព្រែកជីកហ្នឹង យើងមិនចាំបាច់ទៅសម្បទានឱ្យប្រទេសដទៃ គេគ្រប់គ្រង ៣០ឆ្នាំ ឬ ៥០ឆ្នាំហ្នឹង»។
កម្ពុជាគ្រោងនឹងអនុញ្ញាតឱ្យក្រុមហ៊ុនគ្រប់គ្រងដោយរដ្ឋអំណាចចិនឈ្មោះ China Road and Bridge Corporation (CRBC) សាងសង់គម្រោងព្រែកជីកហ្វូណននេះ ក្រោមកិច្ចព្រមព្រៀង សាងសង់ ប្រតិបត្តិ និងផ្ទេរ ដែលមានរយៈពេល ៥០ឆ្នាំ។ រដ្ឋមន្ត្រីសាធារណការកម្ពុជា លោក ប៉េង ពោធិ៍នា ធ្លាប់ប្រកាសថា គម្រោងដែលមានតម្លៃ ១ពាន់ ៧រយលានដុល្លារនេះ គ្រោងនឹងបើកការដ្ឋានសាងសង់នៅចុងឆ្នាំ២០២៤ ហើយនឹងបញ្ចប់ត្រឹមឆ្នាំ២០២៨៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments