សហរដ្ឋអាមេរិកជំរុញឱ្យរដ្ឋាភិបាលកម្ពុជា ប្រឹងប្រែងលើកស្ទួយសិទ្ធិការងារ និងអនុវត្តច្បាប់តឹងរ៉ឹងទៅលើជនល្មើសពាក់ព័ន្ធនឹងអំពើជួញដូរកម្លាំងពលកម្ម និងជួញដូរមនុស្ស។ ការលើកឡើងនេះ គឺនៅស្របពេលដែលសហរដ្ឋអាមេរិកមិនទាន់បន្តសុពលភាពប្រព័ន្ធអនុគ្រោះពន្ធទូទៅ (GSP) ដល់កម្ពុជានៅឡើយ។ សហជីពជឿថា សាររបស់សហរដ្ឋអាមេរិក អាចមានជាប់ទាក់ទងនឹងរឿងប្រព័ន្ធអនុគ្រោះពន្ធ GSP។
សហរដ្ឋអាមេរិកដាស់តឿនរដ្ឋាភិបាលកម្ពុជា ឱ្យការពារសិទ្ធិកម្មករ កាត់បន្ថយពលកម្មកុមារ និងពលកម្មដោយបង្ខំ ដែលជាលក្ខខណ្ឌជួយឱ្យកម្ពុជាទទួលបានអត្ថប្រយោជន៍ផ្នែកពាណិជ្ជម្ម តាមរយៈកម្មវិធីប្រព័ន្ធអនុគ្រោះពន្ធទូទៅ ហៅកាត់ថា ជីអេសភី (GSP)។ សហរដ្ឋអាមេរិកគូសបញ្ជាក់ថា កម្ពុជាបានទាញយកប្រយោជន៍ពេញលេញពីកម្មវិធីនេះ ហើយបានបង្កើតការងាររាប់ពាន់កន្លែង និងបង្កើនឱកាសផ្នែកពាណិជ្ជកម្ម តាំងពីកម្ពុជាបំពេញបានតាមលក្ខខណ្ឌកំណត់នេះ។ សហរដ្ឋអាមេរិកជឿថា ទំនាក់ទំនងពាណិជ្ជកម្មគួរតែផ្ដល់ប្រយោជន៍ឱ្យគ្នាទៅវិញទៅមក មានតម្លាភាព ហើយគោរពតាមបទដ្ឋានខ្ពស់បំផុត ដោយរួមទាំងសិទ្ធិការងារដែលជាសិទ្ធិមូលដ្ឋានរបស់មនុស្សផងដែរ។
សហរដ្ឋអាមេរិកបញ្ចេញសារបែបនេះតាមរយៈទំព័រហ្វេសប៊ុក (Facebook) របស់ស្ថានទូតប្រចាំនៅកម្ពុជា ក្រោយពីលោកឯកអគ្គរដ្ឋទូត ប៉ាទ្រីក ម័រហ្វី (Patrick Murphy) បានជួបប្រជុំជាមួយរដ្ឋមន្ត្រីក្រសួងការងារ លោក អ៊ិត សំហេង កាលពីថ្ងៃទី២៣ កុម្ភៈ។ មន្ត្រីទាំងពីររូបបានពិភាក្សាគ្នាអំពីសារសំខាន់នៃការពង្រឹងការអនុវត្តច្បាប់ទាក់ទងនឹងការកេងប្រវ័ញ្ច និងការជួញដូរមនុស្ស ព្រមទាំងការធ្វើការជាមួយគ្នា ដើម្បីលើកកម្ពស់សេរីភាពនៃការចងក្រងជាសមាគម និងគុណតម្លៃស្នូលដទៃទៀតនៃពលកម្មនៅកម្ពុជា។
ស្ថានទូតសហរដ្ឋអាមេរិកលើកឡើងទៀតថា សហរដ្ឋអាមេរិក និងកម្ពុជា មានគោលដៅរួមគ្នា ក្នុងការកាត់បន្ថយកម្លាំងពលកម្មកុមារ និងការធ្វើពលកម្មដោយបង្ខំ ដោយរួមទាំងទម្រង់នៃទាសភាពសម័យទំនើប ដូចជា ទាសភាពបំណុល ជាដើម។ ប្រទេសមហាអំណាចមួយនេះលើកទឹកចិត្តដល់អាជ្ញាធរកម្ពុជា ឱ្យកាត់ទោសជនល្មើស និងការពារជនរងគ្រោះ ព្រមទាំងការពារកុំឱ្យមានបទល្មើសជួញដូរមនុស្ស។
អាស៊ីសេរីមិនអាចទាក់ទងអ្នកនាំពាក្យក្រសួងការងារ លោក ហេង សួរ ដើម្បីសាកសួរបន្ថែមអំពីរឿងនេះបានទេ នៅថ្ងៃទី២៦ កុម្ភៈ។
ទោះជាយ៉ាងណា ក្រសួងការងារបានទទួលស្គាល់ថា កិច្ចសហប្រតិបត្តិការជាមួយសហរដ្ឋអាមេរិកបានចូលរួមចំណែកដល់កំណើនសេដ្ឋកិច្ចកម្ពុជា បើទោះបីជាជំងឺកូវីដ-១៩ កំពុងបន្តគំរាមកំហែងក៏ដោយ។
ក្រសួងការងារឱ្យដឹងតាមហ្វេសប៊ុកនៅថ្ងៃទី២៣ កុម្ភៈថា កម្ពុជាពេញចិត្តនឹងកិច្ចសហប្រតិបត្តិការជាមួយសហរដ្ឋអាមេរិក ដែលជួយបង្កើតការងារជូនកម្មករនិយោជិត។ ក្រសួងបញ្ជាក់ថា បើទោះជាកំពុងប្រឈមនឹងវិបត្តិជំងឺកូវីដ-១៩ ក៏ដោយ ក៏ការនាំចេញផលិតផលពីកម្ពុជាទៅកាន់ទីផ្សារសហរដ្ឋអាមេរិក មិនបានធ្លាក់ចុះទេ មានតែកើនឡើងថែមទៀត បើប្រៀបធៀបនឹងទីផ្សារប្រទេសដទៃ។ ក្រសួងការងារបញ្ជាក់ថា ក្រសួងឯកភាពជាមួយសហរដ្ឋអាមេរិកក្នុងការបន្តពិនិត្យចំណុចមួយចំនួននៃច្បាប់ទាំងឡាយដែលត្រូវធ្វើបច្ចុប្បន្នភាព ដើម្បីការអនុវត្តកាន់តែទទួលបានប្រសិទ្ធភាពខ្ពស់។
ប្រធានសហភាពការងារកម្ពុជា លោក អាត់ ធន់ មានប្រសាសន៍ថា ការលើកឡើងរបស់ស្ថានទូតសហរដ្ឋអាមេរិកនេះ ជាសារមួយបញ្ជាក់យ៉ាងច្បាស់ថា រដ្ឋាភិបាលកម្ពុជាត្រូវពិនិត្យមើលចំណុចខ្វះខាតទាំងឡាយពាក់ព័ន្ធវិស័យការងារ និងសិទ្ធិមនុស្ស។ លោកជំរុញឱ្យរដ្ឋាភិបាលកែលម្អទៅតាមលក្ខខណ្ឌដែលបានព្រមព្រៀងជាមួយសហរដ្ឋអាមេរិក ដើម្បីទទួលបានការអនុគ្រោះពន្ធ GSP បន្តទៅទៀត ព្រោះកម្ពុជាបានបាត់បង់ប្រព័ន្ធអនុគ្រោះពន្ធ EBA របស់សហភាពអឺរ៉ុប ចំនួន២០% រួចទៅហើយ៖ «ជាទូទៅ គឺសហរដ្ឋអាមេរិក និងប្រទេសលោកខាងលិច គេតែងតែរកមធ្យោបាយដើម្បីជំរុញឱ្យមានការគោរពសិទ្ធិកម្មករ កុំឱ្យមានការកេងប្រវ័ញ្ចកម្លាំងពលកម្ម ដើម្បីផ្តល់ឱ្យនូវកូតា ឬក៏លក្ខខណ្ឌផលប្រយោជន៍មកឱ្យកម្ពុជាច្រើន។ អ៊ីចឹងខ្ញុំគិតថា វាជាពេលមួយសមរម្យដែលរដ្ឋាភិបាលគួរតែពិនិត្យឡើងវិញអំពីចំណុចខ្វះខាតកន្លងមក ដែលខ្លួនបានធ្វើទៅ វាមិនបានឆ្លើយតបទៅនឹងកិច្ចព្រមព្រៀងផ្សេងៗជាមួយនឹងប្រទេសមួយចំនួន ដូចជា សហរដ្ឋអាមេរិក និងសហភាពអឺរ៉ុប ជាដើម»។
ប្រព័ន្ធអនុគ្រោះពន្ធទូទៅ GSP របស់សហរដ្ឋអាមេរិក បង្កើតឡើងក្នុងគោលដៅជួយអភិវឌ្ឍ និងពង្រឹងការលូតលាស់សេដ្ឋកិច្ចរបស់ប្រទេសក្រីក្រ។ សហរដ្ឋអាមេរិកផ្ដល់ប្រព័ន្ធអនុគ្រោះពន្ធនេះក្រោមលក្ខខណ្ឌដែលប្រទេសទទួល ត្រូវធានាគោរពសិទ្ធិការងារ និងលុបបំបាត់រាល់ទម្រង់នៃពលកម្មកុមារ ព្រមទាំងលក្ខខណ្ឌមួយចំនួនទៀត។
កម្ពុជាចាប់ផ្ដើមទទួលបានការអនុគ្រោះពន្ធ GSP នៅឆ្នាំ ១៩៩៧ ហើយតាមរយៈកម្មវិធីនេះ កម្ពុជានាំចេញទំនិញទៅទីផ្សារសហរដ្ឋអាមេរិក គិតជាទឹកប្រាក់ជាង ១៨០លានដុល្លារ ក្នុងមួយឆ្នាំៗ។
ទោះជាយ៉ាងណា កម្មវិធីនេះបានផុតកំណត់កាលពីថ្ងៃទី៣១ ខែ ធ្នូ ឆ្នាំ ២០២០ ហើយគិតមកដល់ចុងខែកុម្ភៈឆ្នាំ២០២១ នេះ សហរដ្ឋអាមេរិកមិនទាន់បន្តសុពលភាពឱ្យកម្ពុជាទៀតនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments