 |
| នាយកប្រតិបត្តិមជ្ឈមណ្ឌលសិទ្ធិមនុស្សកម្ពុជា (CCHR) អ្នកស្រី ចក់ សុភាព ក្នុងវេទិកាអ្នកស្ដាប់វិទ្យុអាស៊ីសេរី នៅយប់ថ្ងៃទី២០ ខែមេសា ឆ្នាំ២០១៦។ Photo: RFA |
ដោយ មាន ឫទ្ធិ RFA 2017-12-03
មជ្ឈមណ្ឌលសិទ្ធិមនុស្សកម្ពុជា (ហៅកាត់ថា CCHR) ប្ដេជ្ញាបន្តការងារស្នូលរបស់ខ្លួនក្នុងការលើកកម្ពស់ការការពារ និងគោរពសិទ្ធិមនុស្សនៅកម្ពុជា ដែលមជ្ឈមណ្ឌលនេះថា ជាការងារបន្ទាន់ និងចាំបាច់។ ការប្រកាសអំពីការប្ដេជ្ញាចិត្តជាថ្មីនេះ ធ្វើឡើងក្រោយពីលោក ហ៊ុន សែន បញ្ជាក់ប្រាប់ប្រព័ន្ធផ្សព្វផ្សាយរបស់លោក កាលពីថ្ងៃទី២ ធ្នូ ថា លោកនឹងមិនបិទមជ្ឈមណ្ឌលនេះទេ ក្រោយពីក្រសួងពិនិត្យ និងស្រាវជ្រាវរកមិនឃើញកំហុស ឬមិនមានសកម្មភាពពាក់ព័ន្ធបញ្ហាល្មើសច្បាប់។
អ្នកស្រី ចក់ សុភាព នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា ថ្លែងក្នុងសេចក្ដីថ្លែងការណ៍ នៅថ្ងៃទី៣ ខែធ្នូ ថា ទោះបីជាមជ្ឈមណ្ឌលអ្នកស្រី ស្វាគមន៍ចំពោះព័ត៌មានវិជ្ជមាននេះ យ៉ាងណាក្តី ជាការចាំបាច់ដែលពេលនេះ មជ្ឈមណ្ឌលសិទ្ធិមនុស្សកម្ពុជា ត្រូវបន្តផ្ដោតលើការងារស្នូលរបស់ខ្លួនបន្តទៀត។ អ្នកស្រីបញ្ជាក់ថា ការប្ដេជ្ញាចិត្តនេះ គឺដោយសារតែស្ថានភាពជាក់ស្ដែងនៃការរួមតូចនៃលំហសង្គមស៊ីវិល ដែលកំពុងបង្កជាបញ្ហាប្រឈមជាច្រើនដល់សង្គមស៊ីវិល នៅកម្ពុជានាពេលបច្ចុប្បន្ននេះ។
មជ្ឈមណ្ឌលសិទ្ធិមនុស្សកម្ពុជាអះអាងថា ខ្លួននៅតែមានទំនុកចិត្តថា ការស៊ើបអង្កេតឥតលម្អៀង នឹងបញ្ជាក់ពីឯករាជ្យភាពពិតប្រាកដ និងបង្ហាញពីភាពត្រឹមត្រូវចំពោះសកម្មភាពរបស់ខ្លួន។
លោក ហ៊ុន សែន កាលពីថ្ងៃទី២៦ ខែវិច្ឆិកា បានប្រាប់ទៅក្រសួងមហាផ្ទៃ ឱ្យពិនិត្យ និងបិទមជ្ឈមណ្ឌលសិទ្ធិមនុស្សកម្ពុជា (CCHR) នៅភ្នំពេញ ដោយលោកចោទថា មជ្ឈមណ្ឌលនេះបង្កើតឡើងដោយបរទេស៕
From KI Media - Khmer Intelligence
via_IFTTT
0 Comments