រាជរដ្ឋាភិបាល បានចេញអនុក្រឹត្យ២ ដាក់ទោសទណ្ឌអ្នក ដែលលួចរត់គេចចេញពីមណ្ឌលចត្តាឡីស័ក និងមេខ្យល់ជាដើម។ មន្ត្រីសិទ្ធិមនុស្សយល់ថា រដ្ឋាភិបាលគួរផ្សព្វផ្សាយបន្ថែមអំពីអនុក្រឹត្យនេះ ដើម្បីឲ្យប្រជាពលរដ្ឋបានយល់ដឹងជាមុនសិន មុននឹងអនុវត្តវិធានការតឹងរ៉ឹងនេះ។
អនុក្រឹត្យ២ ដែលរដ្ឋាភិបាលចេញកាលពីពេលថ្មីៗ នេះ គឺទី១ អនុក្រឹត្តស្តីពីវិធានការចត្តាឡីស័ក ដើម្បីទប់ស្កាត់ការឆ្លងរាលដាលនៃជំងឺកូវីដ១៩ និង ទី២ ស្ដីពីវិធានការសុខាភិបាល ដើម្បីទប់ស្កាត់ និងឆ្លើយតបការឆ្លងរាលដាលជាអន្តរជាតិនៃជំងឺឆ្លងទូទៅនៅតាមច្រកចេញចូលព្រំដែន។
អនុក្រឹត្យទាំង២នេះ ក៏បានចែងអំពីកាត្វពកិច្ច ការដាក់ទោសទណ្ឌ និងការផាកពិន័យ លើជនដែលអនុវត្តផ្ទុយពីការណែនាំរបស់ក្រសួងសុខាភិបាល និងបទបញ្ជារបស់រដ្ឋាភិបាល។
រដ្ឋលេខាធិការ និងជាអ្នកនាំពាក្យក្រសួងយុត្តិធម៌ លោក គឹម សន្តិភាព ថ្លែងនៅក្នុងសន្និសីទព័ត៌មានជុំវិញការកែសម្រួល អនុក្រឹត្យនៅព្រឹកថ្ងៃ១៩ កុម្ភៈនេះ ថាការបង្កើនប្រាក់ផាកពិន័យ ពុំមែនជាគោលបំណងរបស់រដ្ឋាភិបាលដើម្បីរកប្រាក់ចំណូលបន្ថែមនោះទេ។ លោកបន្តថា ការបង្កើនប្រាក់ផាកពិន័យនេះ គឺជាវិធានការទប់ស្កាត់ កុំឲ្យមានការគេចវេះ ឬរារាំងវិធានការរបស់ក្រសួងសុខាភិបាលក្នុងការទប់ស្កាត់ការរីករាលដាលនៃជំងឺឆ្លង និងជាការក្រើនរំលឹកដល់ពលរដ្ឋ និងមន្ត្រីមួយចំនួនផងដែរ៖ «
អនុក្រឹត្យស្ដីពីវិធានការចត្តាឡីស័កអនុញ្ញាតឲ្យអាជ្ញាធរមានសមត្ថកិច្ច ពិន័យជាប្រាក់ពី ១លាន (១.០០០.០០០) រៀល ទៅ ៥លាន (៥.០០០.០០០) រៀល ចំពោះបុគ្គលដែលគេចវេះ ពីការធ្វើចត្តាឡីស័ក ឬបុគ្គលដែលគេចចេញពីកន្លែងធ្វើចត្តាឡីស័ក ក្នុងអំឡុងពេលធ្វើចត្តាឡីស័ក និង បុគ្គលដែលមិនសហការជាមួយមន្ត្រីសុខាភិបាល ក្នុងការយកសំណាកទៅវិភាគរកជំងឺកូវីដ១៩។ អ្នកផ្តើមគំនិត ញុះញង់ ឬជួយសំរួលដោយចេតនា ឬហៅថា មេខ្យល់ ឲ្យមនុស្សគេចចេញ ឬគេចវេះ ពីការត្រួតពិនិត្យរបស់មន្ត្រីចត្តាឡីស័ក និងចំពោះគ្រឹះស្ថានសុខាភិបាលឯកជនណា ដែលជួយលាក់បាំង មិនព្រមជូនដំណឹងបន្ទាន់ទៅក្រសួងសុខាភិបាល ត្រូវពិន័យជាប្រាក់ពី ១០លាន (១០.០០០.០០០)រៀល ទៅ ៥០លាន (៥០.០០០.០០០)រៀល។
ការចេញអនុក្រឹត្យនេះ គឺក្រោយពេលដែលរដ្ឋាភិបាលរកឃើញថា អធិការស្រុកកំរៀង ខេត្តបាត់ដំបង លោក គឹម ពន្លក ដែលបានប្រព្រឹត្តខុសនីតិវិធីច្បាប់ ដោះលែងមេខ្យល់ដែលនាំពលករគេចវេះពីការធ្វើចត្តាឡីស័ក។ ក្រោយមក លោក នាយករដ្ឋមន្ត្រី ហ៊ុន សែន ក៏បានដកតំណែង និងបញ្ចប់មុខតំណែងអធិការស្រុករូបនេះផងដែរ។
សង្គមស៊ីវិលរិះគន់ប្រាក់ពិន័យថា មានលក្ខណៈធ្ងន់ធ្ងរសម្រាប់ពលរដ្ឋ។
នាយករងផ្នែកឃ្លាំមើល និងការពារសិទ្ធិមនុស្សនៃអង្គការលីកាដូលោក អំ សំអាត ថ្លែងថា តម្លៃនៃការផាកពិន័យនេះ ហាក់មានកម្រិតខ្ពស់ខ្លាំង ហើយរដ្ឋាភិបាលគួរផ្សព្វផ្សាយឲ្យបានទូលំទូលាយជាងនេះ ដល់ប្រជាពលរដ្ឋ។ លោកទទូចថា រដ្ឋាភិបាល គួរត្រួតពិនិត្យឲ្យបានតឹងរ៉ឹង ចំពោះការអនុវត្តរបស់មន្ត្រីថ្នាក់ក្រោមមួយចំនួន ដើម្បីធានាថា ពួកគេមិនបានប្រព្រឹត្តពុករលួយ ឬកេងចំណេញលើអនុក្រឹត្យនេះ៖ «
នៅក្នុងសន្និសីទព័ត៌មានស្ដីពីការកែសម្រួល អនុក្រឹត្យស្ដីពីវិធានការសុខាភិបាល នៅព្រឹកថ្ងៃទី១៩ កុម្ភៈនេះ អ្នកនាំពាក្យក្រសួងសុខាភិបាលអ្នកស្រី ក៏បានបញ្ជាក់ថា កម្ពុជានឹងទទួលបានវ៉ាក់សាំងបង្ការជំងឺកូវីដ១៩ ឈ្មោះ អាស់ស្ត្រាហ្សានីកា (AstraZeneca)របស់អង់គ្លេស ពីកម្មវិធីចែកចាយវ៉ាក់សាំងកូវីដ១៩ ជាសកលរបស់អង្គការសុខភាពពិភពលោក ហៅថា កូវ៉ាក់ (COVAX) ប្រមាណជាង ១លាន ២សែន ៩ពាន់ (១.២៩៦.០០០)ដូស មកឲ្យកម្ពុជាផងដែរ។ លោកស្រីបន្តថា វ៉ាក់សាំងនេះ អាចនឹងមកដល់ប្រទេសកម្ពុជា ក្នុងអំឡុងខែមីនា ឬខែមេសា ក្នុងត្រីមាសទី១ ប្រមាណជាង ៤សែន ៥ម៉ឺន ៣ពាន់ (៤៥៣.៦០០)ដូស ឬអាចច្រើនជាងនេះ ពីប្រទេសឥណ្ឌា៖ «
កម្ពុជារកឃើញករណីឆ្លងជំងឺកូវីដ១៩ថ្មី ១ករណីបន្ថែមទៀតផងដែរ លើស្ត្រីជនជាតិចិន អាយុ ២៥ឆ្នាំជាអ្នកធ្វើ ដំណើរមកពីប្រទេសអារ៉ាប់ បន្តជើងហោះហើរនៅប្រទេសសិង្ហបុរី មកដល់កម្ពុជាកាលពីថ្ងៃទី១៧ កុម្ភៈ។ សំណាកស្ត្រីរូបនេះ ត្រូវបានក្រុមគ្រូពេទ្យពិនិត្យឃើញ វិជ្ជមានជំងឺកូវីដ១៩ ហើយបច្ចុប្បន្នកំពុងសម្រាកព្យាបាលនៅមជ្ឈមណ្ឌលជាតិកម្ចាត់រោគរបេង និងហង់សិន រាជធានីភ្នំពេញ។ គិតត្រឹមថ្ងៃទី១៩ កុម្ភៈ ចំនួនអ្នកផ្ទុកជំងឺកូវីដ-១៩ សរុបទូទាំងប្រទេសកើនដល់ចំនួន ៤៨៤នាក់ ក្នុងនោះអ្នកជាសះស្បើយ ៤៧០នាក់ និងអ្នកកំពុងសម្រាកព្យាបាលនៅក្នុងមន្ទីរពេទ្យមានចំនួន ១៤នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments