អាជ្ញាធរវៀតណាមចាប់បញ្ជូនពលរដ្ឋខ្មែរ ២៧នាក់ ក្នុងនោះភាគច្រើនជាកុមារ និងមនុស្សចាស់មកកម្ពុជាវិញ ពីបទឆ្លងដែនខុសច្បាប់។ អគ្គនាយកដ្ឋានប្រវេសន៍ឲ្យដឹងតាមរយៈទំព័រហ្វេសប៊ុកខ្លួន កាលពីថ្ងៃទី២៧ កុម្ភៈថា កម្លាំងស្នងការដ្ឋាននគរបាលខេត្តស្វាយរៀង ការិយាល័យប្រឆាំងការជួញដូរមនុស្ស និងការពារអនីតិជន បានទទួលពលរដ្ឋខ្មែរទាំងនោះពីភាគីវៀតណាម តាមច្រកទ្វារអន្តរជាតិបាវិតចំនួន ១៨គ្រួសារ ដែលមានមនុស្ស ២៧នាក់ ស្រី ១៩នាក់។ ក្នុងនោះមានមនុស្សចាស់ចំនួន ១២នាក់ និងក្មេង ១៥នាក់ ស្រី ៨នាក់។ ក្រោយពីប្រគល់ទទួលហើយ សមត្ថកិច្ចបានអប់រំ រួចហើយឲ្យវិលត្រឡប់ទៅលំនៅឋានវិញ។
ដូចគ្នានេះដែរ ខាងអាជ្ញាធរថៃកាលពីថ្ងៃទី២៦ កុម្ភៈ ក៏បញ្ជូនពលរដ្ឋខ្មែរ ដែលជាយុវជនពេញកម្លាំងធ្វើការចំនួន ៣៤នាក់ មកកម្ពុជាវិញ តាមច្រកទ្វារអន្តរជាតិព្រំខេត្តប៉ៃលិន បន្ទាប់ពីនគរបាលអន្តោប្រវេសន៍ច្រកទ្វារបានផាកាត ខេត្តចន្ទបូរី មិនប្រថាប់ត្រាអនុញ្ញាតឲ្យចូលប្រទេស។ អគ្គនាយកដ្ឋានប្រវេសន៍ឲ្យដឹងថា ពលរដ្ឋខ្មែរបានប្រាប់សមត្ថកិច្ចកម្ពុជាថា សមត្ថកិច្ចអន្តោប្រវេសន៍ថៃ មិនអនុញ្ញាតឲ្យពួកគេចូលប្រទេសថៃ ព្រោះពលរដ្ឋទាំងអស់នោះ មានគោលបំណងធ្វើដំណើរទៅប្រទេសម៉ាឡេស៊ី មូលហេតុដោយសារមានភេរវកម្ម និងអសន្តិសុខ នៅក្នុងខេត្តភាគខាងត្បូងប្រទេសថៃ។
សមត្ថកិច្ចកម្ពុជាបញ្ជាក់ថា មិនហាមឃាត់ពលរដ្ឋខ្មែរ ក្នុងការធ្វើដំណើរចេញពីប្រទេសទេ តែការហាមមិនឲ្យចូលប្រទេសថៃ នោះជាសិទ្ធិរបស់សមត្ថកិច្ចថៃ៕
សូមរង់ចាំស្ដាប់សេចក្ដីរាយការណ៍ពិស្ដារនៅក្នុងការផ្សាយវិទ្យុអាស៊ីសេរីនារាត្រីនេះ...
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments