ក្រុមមេដឹកនាំនយោបាយ និងសង្គមស៊ីវិលខ្មែរ តែងនាំគ្នាផ្ញើសារជូនពរប្រជាពលរដ្ឋខ្មែរ មិនដែលខកខានឡើយ នៅរៀងរាល់ពេលពិធីបុណ្យចូលឆ្នាំថ្មី ប្រពៃណីជាតិមកដល់ម្តងៗ។ សម្រាប់ឆ្នាំថ្មី ឆ្នាំច ទើបនឹងចូលមកដល់នេះ ខុសពីរាល់សព្វដង សារជូនពរឆ្នាំថ្មី របស់ក្រុមមេដឹកនាំនយោបាយ និងមន្ត្រីអង្គការសង្គមស៊ីវិល ហាក់ផ្ដោតស្ទើរតែទាំងស្រុងទៅលើបញ្ហានយោបាយ ដែលកំពុងញាំញីក្នុងសង្គមខ្មែរ ចាក់ស្រេះដោះស្រាយមិនរួច បន្សល់ទុកពីឆ្នាំចាស់។ សារទាំងនេះ បង្ហាញឲ្យឃើញថា សង្គមកម្ពុជា កំពុងប្រេះឆា បែកបាក់ស្មារតីសាមគ្គីជាតិ ជាធ្លុងមួយ ដែលអ្នកនយោបាយ ចាំបាច់ត្រូវរួមនាំគ្នាដោះស្រាយឲ្យបានឆាប់រហ័ស ដើម្បីកុំឲ្យប្រទេសជាតិ បន្តធ្លាក់ផុងក្នុងវិបត្តិធ្ងន់ធ្ងរជាងនេះទៀត នៅក្នុងឆ្នាំថ្មីនេះ។
បើទោះបីជាឆ្នាំចាស់ ឆ្នាំរកា ទើបនឹងបានឆ្លងផុតទៅហើយក៏ដោយ វិបត្តិវឹកវរផ្នែកនយោបាយ នៅមិនទាន់រសាត់ទៅណាឆ្ងាយពីសង្គមកម្ពុជាឡើយ។ បញ្ហានេះ ហាក់បន្តតាមលងបន្លាចក្រុមមេដឹកនាំនយោបាយខ្មែរ គ្រប់ពេលវេលា ដែលមិនអាចធ្វើឲ្យពួកគេឈប់និយាយ និងគិតដល់ឡើយ បើទោះបីជាពេលវេលានោះ ជាពេលវេលាដែលពលរដ្ឋខ្មែរកំពុងនាំគ្នាអបអរ ប្រារព្ធពិធីបុណ្យចូលឆ្នាំខ្មែរ និងទទួលប្រសិទ្ធពរជ័យ សព្វសាធុការពរពីទេវតា ឆ្នាំថ្មី ក៏ដោយ។
ថ្លែងក្នុងឱកាសពិធីបើកព្រឹត្តិការណ៍អង្គរសង្ក្រាន្ត ឆ្នាំថ្មី ឆ្នាំច ពីខេត្តសៀមរាប នៅគ្រាពលរដ្ឋទូទាំងប្រទេសជូនពរគ្នាទៅវិញទៅមកចង់បានសេចក្ដីសុខសប្បាយនោះ លោកនាយករដ្ឋមន្ត្រី ហ៊ុន សែនវិញ មិនភ្លេចឡើយបន្តព្រមាន និងបន្លាចពលរដ្ឋខ្មែរខ្លួនឯង អំពីបញ្ហាសង្គ្រាម ដោយលើកយកពីឧទាហរណ៍សង្គ្រាមស៊ីវិលរ៉ាំរ៉ៃនៅប្រទេសស៊ីរីមកនិយាយ។ លោកអះអាងថា គ្មានការសប្បាយរីករាយណាមួយ អាចកើតមានឡើងក្រោមភ្នក់ភ្លើងសង្គ្រាមនោះឡើយ៖ «វាពិតណាស់ គ្មានសន្តិភាព វាក៏គ្មានការអភិវឌ្ឍណាមួយ ហើយក៏គ្មានការជួបជុំសប្បាយរីករាយណាមួយដែរ។ គេមិនអាចឃើញនូវអ្វីដែលជាព្រឹត្តិការណ៍ នៃការជួបជុំសប្បាយរីករាយក្រោមគ្រាប់បែក ក្រោមគ្រាប់ផ្លោង។ សូមក្រឡេកមើលទៅប្រទេសស៊ីរី តើប្រទេសស៊ីរី មានលទ្ធភាពដើម្បីនឹងរៀបចំនូវការសប្បាយរីករាយនោះទេ បើប្រទេសនេះ នៅតែហែកហួរដោយសង្គ្រាម?»។
បន្ថែមពីលើនេះ ទំនងជាភ័យខ្លាចពលរដ្ឋខ្មែរធ្វើពហិការមិនទៅចូលរួមបោះឆ្នោតខាងមុខនេះក៏មិនដឹង ក្រោយរបបលោកបានរម្លាយដៃគូប្រកួតប្រជែងនយោបាយ ដ៏ស្វិតស្វាញចោលពីសង្វៀននយោបាយ ដើម្បីធានានិរន្តភាពនៃជ័យជម្នះគណបក្សរបស់លោក លោក ហ៊ុន សែន លើកឡើងនៅផ្នែកខាងដើមបង្អស់នៃសារជូនពររបស់លោកថា ឆ្នាំច ដែលជាឆ្នាំថ្មីនេះ គឺជាឆ្នាំ ដែលរបបរបស់លោក នឹងត្រូវរៀបចំការបោះឆ្នោតជ្រើសតាំងតំណាងរាស្ត្រនីតិកាលទី៦ នៃរដ្ឋសភា។ លោកបានឆ្លៀតឱកាសអំពាវនាវដល់ប្រជាពលរដ្ឋខ្មែរនៅទូទាំងប្រទេស ឲ្យទៅចូលរួមបោះឆ្នោតជ្រើសតាំងតំណាងរាស្ត្រ នៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ ឲ្យបានគ្រប់គ្នាកុំបីខាន ដើម្បីអនុវត្តសិទ្ធិពលរដ្ឋ ក្នុងឋានៈជាអ្វីមួយ ដែលលោកហៅថា ជាម្ចាស់ជោគវាសនានៃប្រទេសរបស់ខ្លួន។ លោក ហ៊ុន សែន ក៏បានលើកឡើងនៅក្នុងសារនោះដែរថា របបរបស់លោកបានទប់ស្កាត់ដោយជោគជ័យ តាមរយៈវិធានការច្បាប់ដ៏ម៉ឺងម៉ាត់ ធ្វើឲ្យបដិវត្តពណ៌ត្រូវបានបរាជ័យយ៉ាងធ្ងន់ធ្ងរព្រមទាំងបញ្ចៀសបាននូវគ្រោះមហន្តរាយជាថ្មីនេះ។
នៅមិនទាន់ទៅណាឆ្ងាយពីបញ្ហានយោបាយដដែល សម្រាប់ប្រធានចលនាសង្គ្រោះជាតិ លោក សម រង្ស៊ី វិញ លោកបានសរសេរសារជូនពរពលរដ្ឋខ្មែរនៅលើទំព័រគណនេយ្យហ្វេសប៊ុករបស់លោកថា លោក និងក្រុមអ្នកតស៊ូទាំងអស់ ក្នុងជួរគណបក្សសង្គ្រោះជាតិ និងចលនាសង្គ្រោះជាតិ នឹងខិតខំធ្វើយ៉ាងណាឲ្យប្រជារាស្ត្រខ្មែរ ចាប់ផ្ដើមបានឃើញនូវពន្លឺប្រជាធិបតេយ្យ សេរីភាព និងយុត្តិធម៌ យ៉ាងពិតប្រាកដ។ លោកសូមឲ្យដំណើរការបោះឆ្នោតសព្វថ្ងៃ ដែលលោកថា ជាការបោះឆ្នោតក្លែងក្លាយ ឲ្យក្លាយទៅជាដំណើរការបោះឆ្នោតត្រឹមត្រូវវិញ ក្នុងពេលមួយសមស្រប ដើម្បីឲ្យប្រជារាស្ត្រខ្មែរ មានឱកាសបង្ហាញឆន្ទៈរបស់ពួកគេ បានយ៉ាងពិតប្រាកដ ដែលអ្នកនយោបាយទាំងអស់ ត្រូវតែគោរពដាច់ខាត។
រីឯប្រធានគណបក្សសង្គ្រោះជាតិ លោក កឹម សុខា ដែលកំពុងជាប់ឃុំ ដោយសារតែរបបលោក ហ៊ុន សែន ចោទលោកថា បានប្រព្រឹត្តិអំពើក្បត់ជាតិនោះ លោកក៏ថ្លែងសារជូនពរពីពន្ធនាគារត្រពាំងផ្លុង នាឱកាសក្នុងឆ្នាំថ្មីនេះ អំពាវនាវឲ្យអ្នកដឹកនាំប្រទេស ដោះស្រាយបញ្ហាក្នុងឆ្នាំថ្មីនេះ ដោយអហិង្សា និងមិនត្រូវយកខ្មែរគ្នាឯងជាសត្រូវឡើយ។ លោកសង្កត់ធ្ងន់ៗថា ប្រទេសកម្ពុជា គឺជារបស់ខ្មែរទាំងអស់គ្នា ពោលគឺមិនមែនជាកម្មសិទ្ធិផ្ដាច់មុខរបស់ក្រុមណាឡើយ។ លោកចង់ឃើញអ្នកនយោបាយខ្មែរគ្រប់រូប បោះបង់ចោលនូវការចងអាឃាត និងឈប់យកប្រជាពលរដ្ឋខ្លួនឯងធ្វើជាសត្រូវ។ ជាមួយគ្នានេះ លោកចង់ឃើញនូវការផ្សះផ្សាជាតិឡើងវិញក្នុងឆ្នាំថ្មីនេះ ដែលនាំមកនូវសេចក្ដីសុខ សេរីភាព និងសុភមង្គលដល់ខ្មែរគ្រប់ភាគី និងលុបជម្រះឲ្យអស់នូវអពមង្គល ការគុំកួន និងអំពើបាបកម្មក្នុងឆ្នាំចាស់។
មិនខុសគ្នាពីក្រុមមេដឹកនាំនយោបាយខ្មែរប៉ុន្មានឡើយ សម្រាប់ក្រុមមេដឹកនាំអង្គការសង្គមស៊ីវិលវិញម្ដង បញ្ហានយោបាយនៅតែជាខ្លឹមសារចម្បងក្នុងសារជូនពរឆ្នាំថ្មីរបស់ពួកគេ ទោះបីជាលោក ហ៊ុន សែន ផ្ញើសារជូនពរបែបបន្លាចពលរដ្ឋឋរបស់ខ្លួនយ៉ាងណាក្ដី។ ប៉ុន្តែក្រុមអង្គការសង្គមស៊ីវិល ចង់ឃើញមានដំណោះស្រាយនយោបាយ និងបង្រួបបង្រួមជាតិរវាងខ្មែរ និងខ្មែរ និងការចេះធ្វើការជាមួយគ្នាជាធ្លុងមួយ ដើម្បីអនាគតកម្ពុជាជារួម។
លោក គល់ បញ្ញា នាយកប្រតិបត្តិគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ឬហៅថា ខុមហ្វ្រែល (Comfrel) បានសរសេរបួងសួងទេវតាឆ្នាំថ្មី សុំសេចក្ដីសុខ ដល់អ្នកតស៊ូមតិ និងការគោរព សិទ្ធិមនុស្ស និងឲ្យមាននូវប្រជាធិបតេយ្យសេរីពហុបក្ស និងការបោះឆ្នោតសេរី យុត្តិធម៌ បែបប្រកួតពហុបក្សត្រឹមត្រូវឡើងវិញនៅកម្ពុជា។ លោកពន្យល់ថា ការខិតខំក្នុងសកម្មភាពតស៊ូមតិ មិនមែនជាសកម្មភាពដើម្បីបំផ្លាញការបោះឆ្នោត ប៉ុន្តែគឺដើម្បីស្ថានភាពនៃការបោះឆ្នោត ដោយសេរី យុត្តិធម៌ និងមានការប្រកួតប្រជែងតាមបែបប្រជាធិបតេយ្យសេរីពហុបក្សត្រឹមត្រូវ និងការគោរពឆន្ទៈរបស់ម្ចាស់ឆ្នោតឡើងវិញ។ លោកថា ទាំងនេះគឺជាមូលដ្ឋានគ្រឹះសម្រាប់រក្សាស្ថិរភាព សន្តិភាព និងផ្ដល់អាណត្តិស្របច្បាប់ដល់អំណាចរដ្ឋទាំងនីតិប្បញ្ញត្តិ និងនីតិប្រតិបត្តិ។
នាយិកាមជ្ឈមណ្ឌលសិទ្ធិមនុស្សកម្ពុជា (CCHR) វិញ អ្នកស្រី ចក់ សុភាព សរសេរជូនពរ ដោយរំឭកដល់អនុស្សាវរីយល្អ កាលពីឆ្នាំ២០១៥ ដែលអ្នកស្រីថា មេដឹកនាំខ្មែរកាលណោះ ធ្លាប់ចាប់ដៃរាក់ទាក់ចាប់ផ្ដើមវប្បធម៌សន្ទនារវាងខ្មែរ និងខ្មែរ។ អ្នកស្រីបួងសួងទេវតាឆ្នាំថ្មី ជួយឱ្យពលរដ្ឋកម្ពុជាទាំងអស់ទទួលបាននូវប្រសិទ្ធពរ ហើយបន់ស្រន់ឲ្យដូនតាបុព្វបុរសខ្មែរគ្រប់ជំនាន់ ជួយនាំចិត្តឱ្យថ្នាក់ដឹកនាំ អ្នកនយោបាយទាំងអស់ តម្កល់ផលប្រយោជន៍ជាតិជាធំ ចាប់យកនូវកិច្ចសន្ទនា ដោយប្រកាន់នូវស្មារតីខ្មែរតែមួយ ដែលអាចជជែកដោះស្រាយបញ្ហានានាបាន។ អ្នកស្រីបញ្ជាក់ថា ខ្មែរប្រាកដជាអាចធ្វើបាន បើជឿជាក់ថា គ្មានអ្នកណាស្រលាញ់ខ្មែរជាងខ្មែរខ្លួនឯងនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments