 |
| អ្នកឃ្លាំមើលផ្នែកអភិវឌ្ឍន៍សង្គម លោកបណ្ឌិត មាស នី ក្នុងវេទិកាអ្នកស្ដាប់វិទ្យុអាស៊ីសេរី កាលពីយប់ថ្ងៃទី៣១ ខែមីនា ឆ្នាំ២០១៧។ RFA |
ដោយ តាំង សារ៉ាដា RFA 2018-03-28
អ្នកវិភាគយល់ថា ការប្រកាសបិទផ្លូវចរចារបស់លោកនាយករដ្ឋមន្ត្រី ហ៊ុន សែន កំពុងតែធ្វើឲ្យ ជាតិខ្មែរបែកបាក់ធ្ងន់ធ្ងរ។ ការលើកឡើងបែបនេះ បន្ទាប់ពីលោក ហ៊ុន សែន ប្រកាសជាថ្មីម្តងទៀតថា នឹងគ្មានការចរចាជាមួយលោក សម រង្ស៊ី នោះទេ។
ប្រធានក្រុមអ្នកវិភាគវ័យក្មេង លោក ហង្ស វិទូ ព្រមានថាប្រសិនបើ លោក ហ៊ុន សែន ធ្វើនយោបាយដោយការគុំកួន យកកំហឹង ទល់កំហល់ ហើយប្រឹងយកឈ្នះចាញ់ស្លាប់រស់ជាមួយគណបក្សប្រឆាំងដោយមិនព្រមវិលទៅចូលតុចរចារហូតបែបនេះ វានឹងនាំឲ្យប្រទេសជួបភាពប្រេះឆាកាន់តែធ្ងន់ធ្ងរថែមទៀត៖ «និយាយពីបែកបាក់គ្នានេះ គឺមិនមែនបែកបាក់ត្រឹមអ្នកនយោបាយទេ ព្រោះកាលណាអ្នកនយោបាយ អត់បានគិតអំពីការរួបរួមជាតិ អត់បានគិតអំពីយន្តការដោះស្រាយដោយសន្តិភាពនោះ វានឹងបណ្ដាលឲ្យបែកបាក់ដល់អ្នកនៅខាងក្រោមទៀត។ យើងចំណាំមើលថា មន្ត្រីរាជការខាងក្រោម សមាជិក ឬមួយអ្នកគាំទ្រនៅខាងក្រោម នឹងបែកបាក់គ្នាទៅតាមអ្នកនយោបាយ ខាងឬមេដឹកនាំខាងលើដែលឈ្លោះគ្នាដែរ។ បើយើងបែកបាក់ជាតិ យើងមិនអាចនិយាយអំពីសន្តិភាព និងការអភិវឌ្ឍបានទេ ព្រោះគ្មានការចូលរួមពីភាគីពាក់ព័ន្ធ»។
លោក ហ៊ុន សែន ប្រកាសជាថ្មីនៅក្នុងពិធីចែកសញ្ញាប័ត្រដល់និស្សិត នៅថ្ងៃទី២៧ មីនាថា លោកនឹងមិនចរចាជាមួយលោក សម រង្ស៊ី អំពីតថ្លៃនយោបាយនោះឡើយ ដោយសារក្រុមអ្នកគាំទ្របក្សប្រឆាំង បាននាំគ្នា ដុតរូបទីងមោងរបស់លោក ក្នុងប្រទេសអូស្ត្រាលី និងការប្រើសារឲ្យកងទ័ព បង្វែរចុងអាវុធលើរដ្ឋាភិបាលជាដើម៖ «ទី១ គ្មានការចរចាជាមួយពួកក្បត់ជាតិ ទី២ គ្មានការលើកលែងទោស ឬបន្ធូរបន្ថយទោស អោយពួកក្បត់ជាតិនេះទេ។ លោកឯងចង់ថា..ម៉េចថាទៅ...ចង់ធ្វើអីធ្វើទៅ។ កាលពីមុនម៉េចក៏លោកឯងមិននៅអោយស្ងៀម ធ្វើអោយវាស្រួល លោកឯងបង្កើននៅហិង្សាតាមរយៈការដុតទីងមោងរូប ហ៊ុន សែន គ្រប់ទីកន្លែង»។
លោក ហ៊ុន សែន កាលពីថ្ងៃទី២៦ មីនា អះអាងថា នៅសប្ដាហ៍ក្រោយនេះ លោកនឹងជួបពិភាក្សាការងារ និងចុះហត្ថលេខា លើការផ្ដល់ជំនួយរបស់រដ្ឋាភិបាលជប៉ុន។ លោកបន្តថា ជំនួបនោះនឹងគ្មានប្រធានបទនិយាយ អំពីគណបក្សសង្គ្រោះជាតិ ឬការចរចាជាមួយលោក សម រង្ស៊ី នោះឡើយ។
ទោះជាយ៉ាងណាក៏ដោយ អ្នកសិក្សាការអភិវឌ្ឍសង្គម លោកបណ្ឌិត មាស នី មានមានប្រសាសន៍ថា បើមើលទៅលើទិដ្ឋភាពនៃជម្លោះ អ្នកនយោបាយបច្ចុប្បន្ននេះ នឹងបណ្ដាលឲ្យប្រទេសខ្មែរត្រូវប្រេះឆា រយៈពេលយូរតទៅទៀត។
លោកយល់ថានៅពេលនេះលោក ហ៊ុន សែន ប្រហែលជាមិនទាន់អាចឆ្លើយតប ជាវិជ្ជមានបានទេព្រោះ លោក ហ៊ុន សែន ត្រូវការពេលវេលារៀបចំខ្លួន និងពិភាក្សាអោយបាន ហ្មត់ចត់ជាមួយគណៈកម្មការអចិន្ត្រៃយ៍នៃគណបក្សប្រជាជនកម្ពុជា មុននឹងព្រមវិលចូលតុចរចាគ្នាវិញ។
លោកបន្តថា លោក ហ៊ុន សែន ត្រូវការពេលវេលាដើម្បីរក្សាមុខមាត់ខ្ពស់ ក្នុងនាមជាបុរសខ្លាំងម្នាក់ មិនអាចដោយសារតែការសម្ពាធពីអន្តរជាតិ ឬប្រទេសជប៉ុន ធ្វើឲ្យលោកត្រូវយល់ព្រមចរចាភ្លាមៗ នោះទេ៖ «ខ្ញុំគិតថា អ្វីដែលជាសំណើរបស់ជប៉ុន ថ្មីៗនេះ វាដូចជាថ្មីពេកសម្រាប់គណបក្ស កាន់អំណាចយកមកពិចារណាដោយផ្អែកលើជំហររបស់ខ្លួន ព្រោះអី តាមពិតពេលខ្លះបញ្ហាដែលវា កើតឡើងធ្វើឲ្យស្មុគស្មាញដែរ សម្រាប់គណបក្សកាន់អំណាច ក្នុងការដោះខ្លួនមកវិញ។ ហើយត្រូវ ការប្រើពេលវេលា ព្រោះអីកាលណាដោះទៅតាមផ្លូវក្រោយវិញ បានន័យថា ផ្លូវដែលចូលមក ដូចជា ផ្លូវច្បាប់អីនោះ ហើយអោយសង្គ្រោះជាតិវិលមកវិញ វាត្រូវតែមានភាពអាម៉ាស ព្រោះអីធ្លាប់ បានអះអាងថា អាហ្នឹងជាបញ្ហាផ្លូវច្បាប់អីអ៊ីចឹងបាទ»។
លោកបណ្ឌិត មាស នី លើកឡើងថា ជំនួបរវាងលោក ហ៊ុន សែន និងគណៈប្រតិភូជាន់ខ្ពស់របស់ជប៉ុន កាលពីប៉ុន្មានថ្ងៃមុននេះអាចជា ការត្រួសត្រាយផ្លូវមួយសម្រាប់ដំណើរទស្សនកិច្ច របស់រដ្ឋមន្ត្រីការបរទេសជប៉ុននៅកម្ពុជា ក្នុងសប្ដាហ៍ក្រោយនេះ។
ផ្ទុយពីការលើកឡើងរបស់លោក ហ៊ុន សែន នោះ លោកបណ្ឌិត មាស នី រំពឹងថា រដ្ឋមន្ត្រីការបរទេសជប៉ុន នឹងជួបពិភាក្សាអំពីជម្លោះនយោបាយក្នុងប្រទេសកម្ពុជាជាមួយលោក ហ៊ុន សែន ព្រមទាំងជំរុញឲ្យមានការចរចាទៀតផង។ កាលពីថ្ងៃទី២៦ មីនា លោក សម រង្ស៊ី ប្រធានចលនាសង្គ្រោះជាតិ សរសេរនៅលើគណនីហ្វេសប៊ុករបស់លោក ដោយសំដែងការសោកស្ដាយចំពោះលោក ហ៊ុន សែន ដែលយកអារម្មណ៍ផ្ទាល់ខ្លួនដាក់ពីមុខ ដើម្បីបញ្ឈប់ការសន្ទនារវាងគណបក្សជាប់ឆ្នោតទាំងពីរ។
លោកបន្តថា លក្ខណៈសម្បត្តិជាអ្នកដឹកនាំប្រទេស តម្រូវឲ្យអ្នកនយោបាយដាក់អារម្មណ៍ផ្ទាល់ខ្លួន ដូចជាការខឹងសម្បាមួយអន្លើ ហើយផ្ដោតយកចិត្តទុកដាក់ទៅលើផលប្រយោជន៍ជាតិជាធំវិញ។
លោក សម រង្ស៊ី បញ្ជាក់ថា ថ្ងៃណាមួយភាគីទាំងអស់នឹងយល់ថា ខ្លួនមិនអាចគេចផុត ពីការសន្ទនាបានទេ ពីព្រោះការសន្ទនានេះជាមូលដ្ឋាននៃសន្តិភាពសង្គម និងលទ្ធិប្រជាធិបតេយ្យ។
ប្រធានក្រុមអ្នកវិភាគវ័យក្មេង លើកឡើងថា ការប្រកាន់ជំហរតឹងរ៉ឹង របស់លោក ហ៊ុន សែន នឹងមិនផ្ដល់ផលចំណេញដល់ជាតិ និងគណបក្សប្រជាជនកម្ពុជាទេ។ លោកបន្ថែមថា ប្រសិនបើលោក ហ៊ុន សែន បើកឲ្យមានការចរចានៅពេលនេះ គឺមានផលប្រយោជន៍ សម្រាប់ជាតិ និងគណបក្សប្រជាជនកម្ពុជា ដូចជាអាចផ្សះផ្សាជាតិ បញ្ចប់កំហឹងអ្នកគាំទ្របក្សប្រឆាំង កាត់បន្ថយសម្ពាធពីអន្តរ ជាតិ និងធ្វើឲ្យការបោះឆ្នោតអាណត្តិក្រោយមានការទទួលស្គាល់ពីអន្តរជាតិ៕
From KI Media - Khmer Intelligence
via_IFTTT
0 Comments