របាយការណ៍ស្តីពីការជួញដូរមនុស្សឆ្នាំ២០១៧ របស់ក្រសួងការបរទេសអាមេរិក ផ្សាយកាលពីថ្ងៃទី២៧ ខែមិថុនា រកឃើញថា រដ្ឋាភិបាលកម្ពុជា នៅមិនទាន់គោរពបានពេញលេញតាមបទដ្ឋានអប្បបរមាដើម្បីលុបបំបាត់អំពើជួញដូរមនុស្សនៅឡើយទេ។ របាយការណ៍នេះបន្តរក្សាដាក់ចំណាត់ថ្នាក់ប្រទេសកម្ពុជា ក្នុងលេខ២ ដដែល ពោលគឺដូចគ្នាកាលពីឆ្នាំ២០១៦ កន្លងទៅ។
បញ្ហាចម្បងៗមួយចំនួនដែលរដ្ឋាភិបាលកម្ពុជា នៅមិនទាន់បានបំពេញតាមបទដ្ឋានអប្បបរមារួមមាន ការណ៍ដែលរដ្ឋាភិបាលខកខានមិនបានស៊ើបអង្កេត ផ្តន្ទាទោស ឬកាត់ទោសមន្ត្រីសមគំនិតរបស់ខ្លួនដែលបានប្រព្រឹត្តអំពើពុករលួយ និងរួមចំណែកឲ្យមានអំពើជួញដូរមនុស្សក្នុងវិស័យជាច្រើន ជាពិសេសក្នុងចំណោមក្រុមប្រជាសាស្ត្រងាយរងគ្រោះ។ បន្ថែមលើនេះទៀត តុលាការកម្ពុជា នៅតែបន្តបិទបញ្ចប់សំណុំរឿងនានា ពាក់ព័ន្ធនឹងអំពើជួញដូរផ្លូវភេទ ក្រោយពីមានការដោះស្រាយជាលុយកាក់ ជំនួសឲ្យការកាត់ទោសដាក់ពន្ធនាគារ។
របាយការណ៍ក៏បានគូសបញ្ជាក់ផងដែរថា រដ្ឋាភិបាលនៅមិនទាន់បានចេញគោលការណ៍ណែនាំអនុញ្ញាតឲ្យប្រើប្រាស់បច្ចេកទេសស៊ើបអង្កេតសម្ងាត់ក្នុងប្រតិបត្តិការប្រយុទ្ធប្រឆាំងនឹងអំពើជួញដូរមនុស្សនៅឡើយទេ។
ក្រសួងការបរទេសអាមេរិក បានស្នើឲ្យរដ្ឋាភិបាលធ្វើការស៊ើបអង្កេតឲ្យបានហ្មត់ចត់ ផ្ដន្ទាទោសអំពើជួញដូរមនុស្ស និងកាត់ទោសឧក្រិដ្ឋជនជួញដូរផ្លូវភេទ និងកម្លាំងពលកម្ម ឲ្យបានតឹងរ៉ឹងជាទីបំផុត ដោយត្រូវរាប់បញ្ចូលទាំងមន្ត្រីសមគំនិតនានារបស់ខ្លួនផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments