ដោយ អ៊ូ បាណុង RFA 2016-11-11
នៅថ្ងៃទី២២ ខែវិច្ឆិកា ខាងមុខនេះ រដ្ឋសភានឹងបើកកិច្ចប្រជុំអនុម័តច្បាប់ថវិកាជាតិឆ្នាំ២០១៧។ បក្សប្រឆាំងអះអាងថា តំណាងរាស្ត្រខ្លួនគ្រោងនឹងចូលរួមកិច្ចប្រជុំនេះដែរ យ៉ាងណាមិញ ខាងសភាថា ការចូលរួមប្រជុំសភាជាតួនាទីរបស់តំណាងរាស្ត្រ ប៉ុន្តែត្រង់តំណាងរាស្ត្របក្សប្រឆាំងចូលរួម ឬមិនចូលរួម ក៏សភាមានសំឡេងភាគច្រើនគ្រប់គ្រាន់ក្នុងការអនុម័តដែរ។
អគ្គលេខាធិការ និងជាអ្នកនាំពាក្យរដ្ឋសភា លោក ឡេង ប៉េងឡុង អះអាងថា របៀបវារៈនៃការបើកកិច្ចប្រជុំសភាក្រោយពិធីបុណ្យអុំទូកខាងមុខនេះ នឹងពិភាក្សាលើចំណុចសំខាន់ ៣ រួមមានសេចក្ដីព្រាងច្បាប់ស្ដីពីការអនុម័តយល់ព្រមលើសន្ធិសញ្ញាទីក្រុងប៉ារីស ស្ដីពីការប្រែប្រួលអាកាសធាតុ សេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០១៧ និងសេចក្ដីព្រាងច្បាប់ស្ដីពីការទូទាត់ថវិការបស់រដ្ឋឆ្នាំ២០១៥។
អ្នកនាំពាក្យនៃបក្សសំឡេងភាគតិចក្នុងរដ្ឋសភា លោក យឹម សុវណ្ណ បញ្ជាក់ប្រាប់អាស៊ីសេរី តាមទូរស័ព្ទថា តំណាងរាស្ត្របក្សលោកនឹងចូលរួមប្រជុំសភានៅថ្ងៃខាងមុខនេះ ដោយសារតែរបៀបវារៈមួយក្នុងចំណោមរបៀបវារៈទាំងបី មានសារសំខាន់ខ្លាំងនោះ គឺការអនុម័តច្បាប់ស្ដីពីការគ្រប់គ្រងថវិកាជាតិឆ្នាំ២០១៧៖ «សេចក្ដីព្រាងច្បាប់ហ្នឹងមានសារសំខាន់ណាស់ វាគឺជាច្បាប់ដែលចែងអំពីការប្រមូលពន្ធ ប្រមូលប្រាក់ចំណូលពីប្រជាពលរដ្ឋ ហើយចាយវាយដើម្បីដឹងថា ដំណើរការរបស់រដ្ឋាភិបាល ក៏ដូចជាការអភិវឌ្ឍប្រទេស ការលើកកម្ពស់ជីវភាពប្រជាពលរដ្ឋ។ អ៊ីចឹងវាទាក់ទងសំខាន់ទៅនឹងកាតព្វកិច្ចរបស់អ្នកតំណាងរាស្ត្រ ដែលត្រូវតែពិនិត្យមើលកិច្ចការទាំងអស់ហ្នឹង ដើម្បីផលប្រយោជន៍ប្រជាពលរដ្ឋ»។
ឆ្លើយតបទៅនឹងអ្នកនយោបាយបក្សប្រឆាំងរូបនេះដែរ អគ្គលេខាធិការនៃរដ្ឋសភា លោក ឡេង ប៉េងឡុង បញ្ជាក់ថា ការចូលរួមប្រជុំសភាគឺជាតួនាទីរបស់តំណាងរាស្ត្រ ប៉ុន្តែយោងតាមបទពិសោធន៍កន្លងមក បើទោះជាអវត្តមានអ្នកនយោបាយបក្សប្រឆាំង ក៏សភាមានសំឡេងគ្រប់គ្រាន់ក្នុងការអនុម័តដែរ៖ «ភារកិច្ចរបស់ពួកគាត់គឺថា ត្រូវតែមកធ្វើច្បាប់ អ៊ីចឹងហើយកន្លងមកគាត់មិនមក ក៏គណបក្សដែលនៅសល់ហ្នឹង មានភាគច្រើនគ្រប់គ្រាន់ដើម្បីអនុម័តដែរ»។
សេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងថវិកាជាតិឆ្នាំ២០១៧ មាន ៦ជំពូក និង ១៥មាត្រា។ ថវិកាជាតិឆ្នាំ២០១៧ ដែលគណៈរដ្ឋមន្ត្រីអនុម័តនៅក្នុងកិច្ចប្រជុំរបស់ខ្លួន និងបញ្ជូនឲ្យរដ្ឋសភាគាំទ្រនោះ គឺមានទំហំទឹកប្រាក់ប្រមាណជិត ៥ពាន់លានដុល្លារអាមេរិក។ ចំនួននេះមានការកើនឡើង បើធៀបទៅនឹងការចំណាយថវិកាជាតិឆ្នាំ២០១៦ ដែលមានតែជិត ៤ពាន់លានដុល្លារអាមេរិក៕
From KI Media - Khmer Intelligence
via_IFTTT
0 Comments