កសិករតាមតំបន់ខ្លះ ចាប់ផ្ដើមប្រមូលផលស្រូវប្រាំង ជាបណ្ដើរៗហើយ។ ស្រូវប្រាំងឆ្នាំនេះ បានផលគួរសម និងបានថ្លៃគ្រាន់។ តែ អ្នកជំនាញកសិកម្ម ជំរុញឱ្យរដ្ឋាភិបាលស្ដារ និងកសាងហេដ្ឋារចនាសម្ព័ន្ធ ឱ្យមានប្រភពទឹកគ្រប់គ្រាន់ សម្រាប់ការធ្វើស្រែប្រាំង នៅឆ្នាំក្រោយ។
តម្លៃស្រូវ នៅដើមរដូវប្រមូលផលខែប្រាំងឆ្នាំនេះ ខ្ពស់គ្រាន់បើ ដោយក្នុងមួយគីឡូក្រាម បានថ្លៃប្រហែលមួយពាន់ (១.០០០)រៀល ទៅតាមប្រភេទស្រូវទន់ ឬរឹង។ កសិកររំពឹងថា បើតម្លៃស្រូវប្រាំង ថេរបានតម្លៃបែបនេះ ពួកគាត់ អាចបន្តធ្វើស្រែប្រាំងនៅឆ្នាំក្រោយទៀតបាន។
កសិករធ្វើស្រូវប្រាំង នៅស្រុកបាកាន ពោធិ៍សាត់ លោក សុខ បៀន ឱ្យដឹងថា នៅម្ដុំលោកធ្វើស្រែ កសិករនាំគ្នាប្រមូលផលអស់ហើយ តាំងពីកន្លះខែមុន។ លោកថា ឆ្នាំនេះ ត្បិតទឹកតិច តែមិនសូវសម្បូរអ្នកធ្វើស្រែប្រាំងទេ ទើបលោកមានទឹកបូមដាក់ស្រែគ្រប់គ្រាន់។ លោកថា តម្លៃស្រូវទៀតសោត គឺ ប្រភេទស្រូវទន់ អូ.អឹម (OM) លក់បានថ្លៃ ១ ០៥០រៀល និងមានឈ្មួញ ចុះទិញដល់ស្រែ។ តម្លៃនេះ ជាតម្លៃល្អ អាចធ្វើឱ្យលោកមានលទ្ធភាពទូទាត់ថ្លៃពូជ ជី និងប្រេងបូមទឹកដាក់ស្រែបាន៖ «និយាយទៅ ស្រែខ្ញុំវាតិច មួយហិកតារកន្លះ បានផល៧-៨តោន។ ធ្វើលក់ លក់ខ្លះ ទុកហូបខ្លះ លក់អស់ហើយ។ ឆ្នាំនេះ ស្រូវគ្រាន់បើដែរ តម្លៃ អូអឹម បាន១.០២០រៀល។ ធ្វើស្រូវប្រាំងឆ្នាំទៅមុន ធ្វើសុម៉ាលី ទើបដាក់ស្រូវអូអឹម ស្រូវកន្លះ ឆ្នាំនេះ»។
ទោះបីយ៉ាងណា កសិករខេត្តផ្សេង មិនបានទទួល បានលទ្ធផលល្អ ដូចកសិករខេត្តពោធិ៍សាត់ឡើយ។ ចំណែក អ្នកនៅខាងខេត្តបន្ទាយមានជ័យ កំពង់ឆ្នាំង តាកែវ និងខេត្តមួយចំនួនទៀត ក៏កំពុងប្រមូលផលដែរ។ កសិករធ្វើស្រែប្រាំងម្នាក់ នៅស្រុកកំពង់លែង ខេត្តកំពង់ឆ្នាំង លោកស្រី ជី ចាន់ថន និយាយថា លោកស្រី ធ្វើស្រូវប្រាំង មិនបានលក់ទេ ឆ្នាំនេះ ដោយសារ ស្រូវប្រាំងពីរស្រែធំៗ ត្រូវខូចទាំងស្រុង ព្រោះខ្វះទឹកស្រោចស្រព។
លោកស្រី ឱ្យដឹងថា អ្នកស្រុកកំពង់លែងខ្លះ ដែលធ្វើស្រែក នៅកៀក ប្រភពទឹក ដូចជា ក្បែរបឹង ឬ ទន្លេសាប ជាដើម ប្រមូលផលបានច្រើនគួរសម និងអាចលក់បាន។ កសិកររូបនេះ ឱ្យដឹងថា ក្នុងករណីឈ្មួញមកទិញដល់ស្រែ តម្លៃស្រូវប្រាំង ប្រភេទទន់ (OM) លក់បានតម្លៃ ក្រោមមួយពាន់រៀល (950)រៀល តែបើដឹកឱ្យឈ្មួញ ដល់ទីតាំង តម្លៃលើមួយពាន់(១.០៥០)រៀល៖ «រកផលមិនឃើញទេ ព្រោះវាអត់មានទឹក។ ខ្ញុំខូច(ស្រូវ)អស់២ស្រែ ខូចស្រែធំៗដែរ។ វាស្វិត អត់មាន ទឹកដាក់។ ខ្ញុំធ្វើទុកហូប។ គេធ្វើច្រើន គេលក់។ ឆ្នាំនេះ បើដឹកដល់កន្លែងគេ បានមួយពាន់ បើច្រូតភ្លាម លក់ភ្លាមបាន៩៥០។ គេចូលទិញដល់ស្រែ»។
កសិករ បានចាប់ផ្ដើមធ្វើស្រែប្រាំង កាលពីខែធ្នូ ចុងឆ្នាំមុន ដែលជារដូវទឹកសម្រក។ រយៈពេល នៃការធ្វើស្រែប្រាំង គឺ៣ ទៅ៤ខែ។ នៅចុងកុម្ភៈ ដល់មុនពេលចូលឆ្នាំខ្មែរ ជាពេលប្រមូលផលស្រែប្រាំង។ ការធ្វើស្រូវប្រាំង មានការលំបាក និងចំណាយច្រើន ជាងស្រែវស្សា ដោយសារបញ្ហាខ្វះទឹក ដាក់ស្រែ ហើយទិន្នផល ក៏តិចជាងស្រូវវស្សាដែរ។
នៅតំបន់ខ្លះ មិនអាចដាំដុះស្រូវប្រាំង ប្រភេទទន់ ដែលលក់បានតម្លៃថ្លៃៗបានទេ ព្រោះស្រូវប្រភេទនេះ (ម្លិះ ក្រអូប សែនពិដោរ) ត្រូវការស្រោចស្រពទឹកច្រើន។ កសិករ ភាគច្រើន និយមដាំដុះស្រូវប្រាំង ជាប្រភេទអង្កររឹង (អ៊ី.អ៊ែ IR) ព្រោះ វាធន់នឹងកម្ដៅ ហើយត្រូវការទឹកមធ្យម សម្រាប់ស្រោចស្រព។
អ្នកស្រុកបាទី នៃខេត្តតាកែវម្នាក់ គឺ កសិករ ជា ឡេង ឱ្យដឹងថា កសិករខាងលោក កំពុងប្រមូលផល ស្រូវប្រាំង និងមានឈ្មួញ ចាំទិញ ដឹកយកទៅលក់នៅប្រទេសវៀតណាម។ ឆ្នាំនេះ អ្នកស្រុកបាទី ភាគតិចបានធ្វើស្រែប្រាំង ទើបធ្វើឱ្យវាលស្រែ នៅតាមបណ្ដោយព្រែក ភាគខាងក្រោមទន្លេបាទី មានទឹកស្រោចស្រពគ្រប់គ្រាន់ និងទទួលបានទិន្នផលល្អគ្រាន់បើ។
លោក ជា ឡេង បន្តទៀតថា តម្លៃស្រូវប្រាំង ប្រភេទទន់ (៩៥) នៅតំបន់ខាងលោក ក៏លក់ បានប្រហាក់ប្រហែលមួយពាន់ (១.០០០)រៀលដែរ។ ប៉ុន្តែ តម្លៃស្រូវប្រាំង របស់អ្នកស្រុកជាប់ព្រំដែនវៀតណាម បានតម្លៃជាងមួយពាន់ (១.២០០)រៀល៖ «គេព្រួសមុន គេបានច្រូតហើយ។ អ្នកថ្មី ទើបបានមួយខែកន្លះដែរ។ មានអ្វី គ្រាន់នឹងទប់ទល់ដែរ។ កំពុងខ្វះទឹក ឥឡូវ គេបញ្ចុះទឹកមកទៀតហើយ បូមពីបឹង។ ស្រុកខ្ញុំ គេធ្វើតិចដែរទេ វាមិនដែលរសនឹងស្រូវប្រាំង»។
ចំណែកតំបន់ដែលមិនទាន់ប្រមូលផលស្រែប្រាំង គឺ នៅស្រុកបាធាយ ខេត្តកំពង់ចាម។ កសិករ លោក ឃីម ឃាន់ ឱ្យដឹងថា កាលពីរដូវវស្សាឆ្នាំមុន ខាងបាធាយ ទឹកក្រស្រកពេក ទើបកសិករ ពន្យារពេលធ្វើស្រែប្រាំង និងត្រូវប្រមូលផលក្រោយគេ។ លោក ឃីម ឃាន់ មិនទាន់ច្បាស់ ថា តម្លៃស្រូវ អាចនឹងប្រែប្រួល ឬ អត់ទេ ទៅពេលខាងមុខ៖ «ទឹកមាន ដូចថា វាមិនទាន់ស្រក (កាលចុងខែវស្សា) អត់ទាន់បានធ្វើ ព្រោះស្រែប្រាំង នៅវាលក្រោម គេធ្វើមួយគំនរ»។
ទន្ទឹមនឹងតំបន់ខ្លះ កំពុងប្រមូលផលស្រូវប្រាំងពេលនេះ កសិករនៅតំបន់ខ្លះទៀត បានបោះបង់ របរធ្វើស្រែប្រាំងចោល នៅឆ្នាំនេះ ដោយសារ គ្មានប្រភពទឹក បូមដាក់ស្រែ។ អ្នកបោះបង់របរធ្វើស្រែប្រាំង នៅឆ្នាំនេះ មួយចំនួន ជាកសិករ នៅម្ដុំព្រំដែនខ្មែរថៃ ក្នុងស្រុកម៉ាឡៃ ខេត្តបន្ទាយមានជ័យ ព្រោះអូរក្បែរព្រំដែនរីងស្ងួតគ្មានទឹក នៅរដូវប្រាំង ឆ្នាំនេះ។
តែយ៉ាងណា កសិករខ្លះ នាំគ្នាធ្វើចម្ការជំនួសស្រែប្រាំងវិញ ដោយប្ដូរពីដាំស្រូវ មកដាំសណ្ដែក ល្អ និងដំឡូងមីវិញ។ មូលហេតុនៃការប្ដូរ ព្រោះថា មុខដំណាំទាំងនេះ មិនត្រូវការទឹកស្រោចស្រពច្រើនហូរហៀរស្រែ ដូចដំណាំស្រូវ។ ម្យ៉ាងទៀត កសិករខ្លះ ធ្លាប់ប្រាប់ថា តម្លៃស្រូវប្រាំង លក់មិនរួចថ្លៃដើម និងមានកសិករខ្លះ ចំណាកស្រុក ទៅធ្វើកម្មករ ឬពលករ ជំនួសវិញ។
ទាក់ទងស្ថានភាពស្រូវប្រាំងឆ្នាំនេះ អ្នកជំនាញកសិករ សង្កេតឃើញថា តំបន់ខ្លះ នៅតែទទួលបានទិន្នផល និងតម្លៃ មិនទាន់ល្អ។ អ្នកសម្របសម្រួលសម្ព័ន្ធកសិករកម្ពុជា ប្រចាំខេត្តស្វាយរៀង លោក ម៉ៃ វុទ្ធី ឱ្យដឹងថា បញ្ហាប្រឈមរបស់កសិករ ក្នុងការបង្កបង្កើនស្រូវ នៅខែប្រាំង គឺការខ្វះហេដ្ឋារចនាសម្ព័ន្ធ និង ប្រភពទឹក។ លោកឱ្យដឹងថា កសិករខ្លះ បានចំណាយថវិកាច្រើន ដើម្បីបុកអណ្ដូង នៅក្នុងស្រែ ហើយទាញយកទឹកពីក្រោមដី មកស្រោចស្រពស្រូវប្រាំង។
អ្នកជំនាញកសិកម្មរូបនេះ បន្តថា ទោះជាតម្លៃស្រូវប្រាំង នៅឆ្នាំនេះ ថ្លៃជាងឆ្នាំមុនបន្តិច (៨០០រៀល) គឺខ្ទង់មួយពាន់(១.០០០)រៀល ក៏មិនទាន់ឱ្យកសិករ សប្បាយចិត្ត នឹងបង្កបង្កើនផលដែរ។ លោក ថា កសិករខ្លះ នៅតែប្រឈមការខាត ដោយសារ បានចំណាយថ្លៃដើមច្រើន ក្នុងការទិញជី និងទាញយកទឹក ពីប្រភពឆ្ងាយពេក។
លោក ម៉ៃ វុទ្ធី ជំរុញឱ្យរដ្ឋាភិបាល កសាងហេដ្ឋារចនាសម្ព័ន្ធធារាសាស្ត្រ សម្រាប់វិស័យកសិកម្មបន្ថែមទៀត និងត្រូវធានាឱ្យមានទឹកតាមប្រឡាយគ្រប់គ្រាន់ នៅរដូវប្រាំង ទើបកសិករ ទទួលបានទិន្នផលល្អ។ លោកក៏ចង់ឱ្យរដ្ឋាភិបាល បង្កើតទីផ្សារក្នុងស្រុក ទទួលទិញកសិផល ក្នុងតម្លៃសមរម្យ និង ដើម្បីជៀសវាង ការដឹកយកទៅលក់ នៅប្រទេសក្បែរខាង ក្នុងតម្លៃទាបជាដើម៖ «រដ្ឋាភិបាល គាត់បង្កើនទីផ្សារនៅក្នុងស្រុក។ ជាពិសេសធ្វើយ៉ាងម្ដេច ឱ្យមានការទទួលទិញ នៅក្នុងស្រុក ព្រោះ បើយើងដឹកនាំ យកទៅខាងក្រៅ វាធ្វើឱ្យតម្លៃធ្លាក់ចុះ។ តែបើរដ្ឋាភិបាល ប្រមូលទិញ វាល្អមែនទែន ធ្វើឱ្យតម្លៃស្រូវបានសមរម្យ»។
ជុំវិញករណីផលស្រូវប្រាំងឆ្នាំនេះ អាស៊ីសេរី មិនអាចសុំការបញ្ជាក់ពីអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លោក ស្រី វុឌ្ឍី បានទេ នៅថ្ងៃទី២៧ កុម្ភៈ។ តែយ៉ាងណា កាលពីឆ្នាំ២០២០ ក្រសួងកសិកម្ម បង្ហាញថា ការធ្វើស្រែប្រាំង សម្រេចបានជិតប្រាំមួយសែន (៥៩៧.៥០៨)ហិកតារផ្ទៃដី និងប្រមូលផលស្រូវប្រាំង បានចំនួនជាងពីរលាន (២.៦១៦.២៥៣)តោន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments