អ្នកឃ្លាំមើលអភិបាលកិច្ចល្អ យល់ថា អនុសាសន៍ របស់ លោក ហ៊ុន សែន ប្រធានគណបក្សប្រជាជនកម្ពុជា ដែលជំរុញឲ្យសមាជិក សមាជិកាបក្ស ជាមន្ត្រីក្នុងបក្សកាន់អំណាច ចុះទៅមូលដ្ឋានវិញជាបន្ទាន់ ដើម្បីខិតខំបម្រើរាស្ត្រឲ្យបានខ្លាំងជាងអាណត្តិមុនៗ ២ដង នឹងមិនមានប្រសិទ្ធភាពទេ។ សង្គមស៊ីវិល ពន្យល់ថា របបមួយ ដែលគ្មានបក្សប្រឆាំង គ្មានសង្គមស៊ីវិល និងសារព័ត៌មានឯករាជ្យ ជាកញ្ចក់ឆ្លុះបញ្ចាំងសង្គម ពលរដ្ឋងាយរងគ្រោះ ដោយសារការជិះសេះលែងដៃ របស់បក្សកាន់អំណាច។
លោក ហ៊ុន សែន បញ្ជាឲ្យសមាជិកបក្សរបស់លោក ខិតខំបម្រើពលរដ្ឋឲ្យបានខ្លាំងជាងអាណត្តិមុន និងមានប្រសិទ្ធភាពជាងមុន២ដង ក្រោយពេលគណបក្សកាន់អំណាចអះអាងដោយខ្លួនឯងថា បានឈ្នះអាសនៈក្នុងរដ្ឋសភាទាំងអស់។
ថ្លែងក្នុងពិធីចុះជួបកម្មករ ក្នុងខណ្ឌមានជ័យ រាជធានីភ្នំពេញ នៅព្រឹកថ្ងៃទី០២ សីហា លោក ហ៊ុន សែន ចាត់ទុកការឈ្នះឆ្នោត ដែលគ្មានការទទួលស្គាល់ពីក្រុមអ្នកនិយមប្រជាធិបតេយ្យ ថា ប្រជាជនកម្ពុជាបានផ្ដល់ការជឿទុកចិត្ត ដូច្នេះពលរដ្ឋមិនត្រូវការបង្កើតរាជរដ្ឋាភិបាលថ្មីឡើយ ក្រៅពីបក្សកាន់អំណាច។ លោក ហ៊ុន សែន ថា នេះជាបន្ទុករបស់បក្សកាន់អំណាចធ្ងន់មួយជាពីរ សម្រាប់អាណត្តិទី៦ ហើយសមាជិកបក្សកាន់អំណាច ត្រូវខិតខំបម្រើប្រជាជនដោយស្មោះត្រង់បំផុត។
លោក ហ៊ុន សែន មិនមែនទើបតែជំរុញ ឬអំពាវនាវឲ្យសមាជិកបក្សកាន់អំណាច ចុះជួយពលរដ្ឋនៅក្រោយការបោះឆ្នោត ជាលើកទី១ទេ។ ក្នុងកិច្ចប្រជុំគណៈរដ្ឋមន្ត្រីលើកដំបូង កាលពីអាណត្តិទី៥ លោក ហ៊ុន សែន ចំណាយពេលស្ទើរពេញមួយថ្ងៃ ដើម្បីស្ដីបន្ទោសមន្ត្រីក្រោមឱវាទលោក។ កាលណោះ លោក ហ៊ុន សែន បន្ទោសថា ដោយសារមន្ត្រីក្រោមឱវាទលោក ជិះសេះលែងដៃ ទើបគណបក្សលោក បាត់បង់សំឡេងគាំទ្រយ៉ាងច្រើនទៅបក្សប្រឆាំង។ លោក ហ៊ុន សែន បានសន្យាកំណែទម្រង់ស៊ីជម្រៅ ដើម្បីបម្រើផលប្រយោជន៍ពលរដ្ឋដែរ ប៉ុន្តែអ្នកតាមដានសង្គម សង្កេតឃើញថា របបលោក ហ៊ុន សែន ក្នុងអាណត្តិទី៥ មិនបានកែទម្រង់ស៊ីជម្រៅលើវិស័យមួយណា ឲ្យបានប្រសើរគួរឲ្យកត់សម្គាល់ទេ ពលរដ្ឋជាច្រើន នៅតែរងគ្រោះ ពីវិស័យសុខាភិបាល ឬវិស័យដីធ្លី កាន់តែខ្លាំងជាងមុន។
អ្នកឃ្លាំមើលអភិបាលកិច្ចល្អ និងជានាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ យល់ថា សភាឯកបក្ស ឬការដឹកនាំបែបឯកបក្ស នឹងមិនអាចធ្វើឲ្យសិទ្ធិសេរីភាពពលរដ្ឋមានពេញទីទេ។ លោក សន ជ័យ បន្តថា អង្គការក្រៅរដ្ឋាភិបាល និងប្រព័ន្ធផ្សព្វផ្សាយឯករាជ្យ មានតួនាទីសំខាន់ ក្នុងការជួយពង្រឹងភាពអសកម្មរបស់មន្ត្រី ក្នុងការបម្រើពលរដ្ឋ។ លោក សន ជ័យ សង្កេតឃើញថា ខណៈប្រព័ន្ធផ្សព្វផ្សាយឯករាជ្យរងការរឹតត្បិត សង្គមស៊ីវិលឯករាជ្យឯណោះវិញ បានរងការលាបពណ៌ ជាក្រុមបដិវត្តពណ៌ជាដើម។ «»
សមាជិកក្រុមអ្នកវិភាគវ័យក្មេង កញ្ញា លី ស្រីស្រស់ យល់ថា ការអំពាវនាវរបស់លោក ហ៊ុន សែន នឹងគ្មានប្រសិទ្ធភាពទេ។ អ្នកវិភាគរូបនេះ អះអាងយោងទៅតាមការសង្កេតនៅអាណត្តិទី៥ គឺគណបក្សកាន់អំណាចបានសន្យា កែទម្រង់ស៊ីជម្រៅ ប៉ុន្តែគ្មានប្រសិទ្ធភាព ដូច្នេះ ការជំរុញរបស់ លោក ហ៊ុន សែន ពេលនេះ គ្រាន់ជាការបន្លំស្ថានការណ៍ និងចង់ឲ្យពលរដ្ឋស្ងប់ចិត្ត ក្រោយការបោះឆ្នោត។ «»
កន្លងមក គេសង្កេតឃើញថា សំដីរបស់លោក ហ៊ុន សែន មានប្រសិទ្ធភាពខ្លាំង តែនៅពេលលោកបញ្ជាឲ្យចាប់ក្រុមអ្នកនយោបាយបក្សប្រឆាំង ឬក្រុមអ្នកនិយមប្រជាធិបតេយ្យប៉ុណ្ណោះ។ ចំណែកឯ ការជំរុញឲ្យមន្ត្រីលោកធ្វើការងារបម្រើរាស្ត្រមិនសូវមានប្រសិទ្ធភាពទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments