មេដឹកនាំរបបឯកបក្ស លោក ហ៊ុន សែន អះអាងថា ជីវភាពសេដ្ឋកិច្ច នយោបាយ និងសង្គមរបស់ប្រជាពលរដ្ឋមានភាពល្អប្រសើរ បើប្រៀបធៀបនឹងពេលក្រោយការបោះឆ្នោតអាណត្តិមុន ដែលអស្ថិរភាពសង្គមកើតឡើង។ ប៉ុន្តែមន្ត្រីជាន់ខ្ពស់គណបក្សសង្គ្រោះជាតិច្រានចោលការចោទប្រកាន់នេះ និងថាលោក ហ៊ុន សែន កំពុងព្យាយាមបិទបាំងទង្វើអាក្រក់របស់ខ្លួន។
មេដឹកនាំរបបក្រុងភ្នំពេញ លោក ហ៊ុន សែន ទទួលស្គាល់ថា មានការបង្ហូរឈាមនៅក្រោយការបោះឆ្នោតតំណាងរាស្ត្រ កាលពីឆ្នាំ២០១៣ កន្លងទៅ ប៉ុន្តែលោកចោទថា ការបង្ហូរឈាមនោះគឺបង្កឡើងដោយគណបក្សសង្គ្រោះជាតិ។ ថ្លែងនៅចំពោះមុខកម្មករ-កម្មការិនី រាប់ពាន់នាក់ក្នុងខេត្តកណ្ដាល នៅព្រឹកថ្ងៃទី៣១ តុលា លោកអះអាងថា សកម្មភាពនេះមិនបានកើតឡើងទៀតឡើយនៅក្រោយការបោះឆ្នោតឆ្នាំ២០១៨ នេះ ដោយសារតែគ្មានវត្តមានបក្សប្រឆាំង ហើយមេដឹកនាំគណបក្សនេះក៏ត្រូវចាប់ខ្លួនដាក់ពន្ធនាគាររួចទៅហើយដែរ៖ «ជាភ័ព្វសំណាងរបស់កម្ពុជាណាស់ ដែលមិនមានការបង្ហូរឈាម និងមិនមានចលាចល បន្ទាប់ពីការបោះឆ្នោត។ ឆ្នាំ២០១៣ ពិតជាមានការបង្ហូរឈាម ហើយអ្នកដែលបង្កឱ្យមានការបង្ហូរឈាមនោះ យើងបានចាប់ខ្លួនរួចហើយ ព្រោះពួកគេអ្នកបានសាងអំពើបាបទាំងនេះ។ ដូច្នេះផ្លូវច្បាប់ត្រូវតែបន្តនីតិវិធីតទៅទៀត ដើម្បីដោះស្រាយបញ្ហាទាំងអស់។ ទ្រព្យសម្បត្តិឯកជន និងសាធារណៈមួយចំនួនត្រូវបានបំផ្លិចបំផ្លាញ ពួកគេត្រូវមានការទទួលខុសត្រូវ»។
លោក ហ៊ុន សែន ចោទថា បាតុកម្មរបស់គណបក្សសង្គ្រោះជាតិបានធ្វើឱ្យពលរដ្ឋក្នុងរាជធានីភ្នំពេញដែលមួយចំនួនបានបោះឆ្នោតឱ្យខ្លួនដែរនោះ ខកខានមិនអាចប្រកបរបររកស៊ីអ្វីបាន។ លោកបានដាស់តឿនពលរដ្ឋថា ត្រូវសម្រេចចិត្តឱ្យបានច្បាស់លាស់ កុំឱ្យសន្លឹកឆ្នោតរបស់ខ្លួននាំក្តីបារម្ភអំពីបញ្ហាអស្ថិរភាពសង្គម។
កាលពីដើមឆ្នាំ២០១៤ កន្លងទៅ កម្លាំងចម្រុះនៃរបបលោក ហ៊ុន សែន បានបង្ក្រាប និងបាញ់ប្រហារយ៉ាងឃោរឃៅទៅលើហ្វូងបាតុករជាកម្មករ-កម្មការិនី ដែលតវ៉ាទាមទារដំឡើងប្រាក់ខែគោល នៅផ្លូវវេងស្រេង និងក្បែររោងចក្រយ៉ាក់ជីន។ ហេតុការណ៍ហិង្សានៅគ្រានោះ បានបណ្ដាលឱ្យកម្មករ ៤ នាក់បាត់បង់ជីវិត និងម្នាក់ទៀតបាត់ខ្លួន ព្រមទាំងជិត ៤០នាក់ផ្សេងទៀតរងរបួស។ បន្ថែមពីលើនេះ ថ្នាក់ដឹកនាំសហជីព និងកម្មករជាង ២០នាក់ ក៏ត្រូវបានចាប់ខ្លួនដាក់ពន្ធនាគារអស់រយៈពេលជិត ៥ ខែ ដោយរងការចោទប្រកាន់ពីបទញុះញង់ឱ្យមានការប្រើអំពើហិង្សា។
មន្ត្រីជាន់ខ្ពស់គណបក្សប្រឆាំង និងអ្នកឃ្លាំមើលបញ្ហាសង្គម ច្រានចោលការលើកឡើង និងការចោទប្រកាន់របស់លោក ហ៊ុន សែន នេះ។
ប្រធានចលនាយុវជនគណបក្សសង្គ្រោះជាតិ ដែលត្រូវរបបលោក ហ៊ុន សែន រំលាយចោល លោក ហ៊ីង សុខសាន្ត ថ្លែងថា លោក ហ៊ុន សែន កំពុងតែបិទបាំងទង្វើទុច្ចរិតរបស់ខ្លួនដែលបានប្រព្រឹត្តលើគណបក្សសង្គ្រោះជាតិ និងពលរដ្ឋ កាលពីពេលកន្លងទៅ។ លោកបន្តថា បាតុកម្មគណបក្សសង្គ្រោះជាតិនៅក្រោយការបោះឆ្នោតឆ្នាំ២០១៣ ជាបាតុកម្មអហិង្សា ហើយមិនមានជាប់ពាក់ព័ន្ធនឹងបាតុកម្មដំឡើងប្រាក់ខែរបស់ក្រុមកម្មករ-កម្មការិនីនោះឡើយ។ លោកយល់ថា ការផ្សាភ្ជាប់គណបក្សសង្គ្រោះជាតិទៅនឹងការបង្ក្រាបដោយហិង្សាទៅលើក្រុមកម្មករកាលពីដើមឆ្នាំ ២០១៤ នោះ គឺជាការគេចវេះពីការទទួលខុសត្រូវរបស់លោក ហ៊ុន សែន និងក្នុងបំណងកេងចំណេញនយោបាយពីក្រុមកម្មករប៉ុណ្ណោះ។
លោក ហ៊ីង សុខសាន្ត ថ្លែងទៀតថា លោក ហ៊ុន សែន ខ្លាចមិនហ៊ានលេងល្បែងប្រជាធិបតេយ្យជាមួយគណបក្សប្រឆាំងឡើយ ទើបលោករំលាយគណបក្សសង្គ្រោះជាតិបែបនេះ។ លោកបន្តថា ជ័យជំនះក្នុងការបោះឆ្នោតបែបបង្គ្រប់កិច្ចនេះ មិនមែនជាជ័យជំនះពិតប្រាកដឡើយ ប៉ុន្តែជាជ័យជំនះបានមកពីការរំលោភសិទ្ធិពលរដ្ឋ និងបំពានច្បាប់ប៉ុណ្ណោះ៖ «បាតុកម្មសុទ្ធតែក្រោមរូបភាពអហិង្សា ហើយការដឹកនាំធ្វើម្តងៗ គឺយើងសុទ្ធតែមានវិន័យច្បាស់លាស់ មិនដែលមានគំនិតទៅប្រើហិង្សា ដូចការលើកឡើងទេ ដូច្នេះសរុបមកអ្វីដែលលោកនាយករដ្ឋមន្ត្រីលើកឡើងនេះ គ្រាន់តែលេសមួយដើម្បីបិទបាំងនូវទង្វើព្រៃផ្សៃរបស់គាត់ ដែលបានវាយធ្វើបាប និងបង្ក្រាបយ៉ាងព្រៃផ្សៃទៅលើកម្មករ និងពលរដ្ឋស្លូតត្រង់។ ទីពីរ អ្វីដែលគាត់លើកឡើងនេះ ក្នុងគោលបំណងដើម្បីកេងចំណេញនយោបាយ ដើម្បីយកប្រៀបនយោបាយតែប៉ុណ្ណោះ នៅពេលគាត់បានធ្វើអំពើដ៏ព្រៃផ្សៃបែបនេះមកលើគណបក្សសង្គ្រោះជាតិ»។
ចំណែក ប្រធានសហភាពសហជីពកម្ពុជា អតីតសមាជិក គ.ជ.ប លោក រ៉ុង ឈុន ក៏អះអាងដែរថា បាតុកម្មរបស់គណបក្សសង្គ្រោះជាតិនៅពេលនោះ មានគោលបំណងទាមទារឱ្យរាប់សន្លឹកឆ្នោតឡើងវិញ កែទម្រង់ស្ថាប័នរៀបចំការបោះឆ្នោត និងដោះស្រាយបញ្ហាមិនប្រក្រតីមួយចំនួនទៀតពាក់ព័ន្ធនឹងដំណើរការបោះឆ្នោត ចំណែកបាតុកម្មរបស់កម្មករ-កម្មការិនីវិញ គឺដើម្បីទាមទារដំឡើងប្រាក់ខែ ដូច្នេះរឿងទាំងពីរនេះត្រូវញែកឱ្យដាច់ពីគ្នា។ លោកជំរុញឱ្យ លោក ហ៊ុន សែន ហ៊ាននិយាយការពិតនៅត្រង់ចំណុចនេះ និងផ្ដល់យុត្តិធម៌ជូនជនរងគ្រោះក្នុងហេតុការណ៍បាញ់បង្ក្រាបលើក្រុមកម្មករ កាលពីពេលកន្លងទៅនោះ៖ «មិនឃើញមានមេគណបក្សសង្គ្រោះជាតិណាដឹកនាំកម្លាំងទៅឡោមព័ទ្ធស្ថាប័នរដ្ឋណាមួយទេ គឺគ្មាននោះទេ។ គ្រាន់តែសម្ដែងមតិអហិង្សាបំផុត ហើយបំណងចង់រាប់សន្លឹកឆ្នោតឡើងវិញ ហើយនិងចង់ធ្វើកំណែទម្រង់ គ.ជ.ប តែប៉ុណ្ណឹងទេ។ នេះបើនិយាយពីផ្នែកគណបក្សសង្គ្រោះជាតិ។ ចំពោះផ្នែកសហជីព គោលបំណងតែមួយគត់ គឺប្រាក់ឈ្នួល ១៦០ដុល្លារ តែប៉ុណ្ណោះ។ ប៉ុន្តែយើងឃើញហើយករណីផ្លូវវេងស្រេងហ្នឹង អ្នកដែលចេញបង្ក្រាប គឺកងកម្លាំងប្រដាប់អាវុធ អត់មានអ្វីដែលថា មើលមិនឃើញទេ។ មានវីដេអូដែលកងកម្លាំងហ្នឹងឡើងលើផ្ទះកម្មករ មើលទៅរូបភាពសាហាវឃោរឃៅណាស់»។
មកទល់នឹងពេលនេះ គ្មានជនសង្ស័យណាម្នាក់ត្រូវបាននាំយកមកកាត់ទោស ឬទទួលខុសត្រូវចំពោះការបាត់បង់អាយុជីវិតកម្មករទាំងនោះឡើយ ដោយអាជ្ញាធររបបលោក ហ៊ុន សែន ចាត់ទុកហេតុការណ៍នេះថា ជាការបង្ក្រាបក្រុមជនអានាធិបតេយ្យ ខណៈអង្គការសិទ្ធិមនុស្សជាតិ និងអន្តរជាតិជាតិចាត់ទុកថា នេះជាការរំលោភសិទ្ធិមនុស្សធ្ងន់ធ្ងរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments