ពលរដ្ឋខ្មែររស់នៅក្រៅប្រទេសមួយចំនួនប្រកាសថ្កោលទោសលោក ហ៊ុន សែន ដែលយកអំណាចកំពូលនៃស្ថាប័នរបស់ជាតិ មកគ្រប់គ្រងធ្វើជាកម្មសិទ្ធិគ្រួសារត្រកូល ហ៊ុន។ ប្រតិកម្មនេះ ក្រោយពេល លោក ហ៊ុន សែន ប្រកាសត្រៀមធ្វើជាប្រធានឧត្តមក្រុមប្រឹក្សាព្រះមហាក្សត្រ ប្រធានព្រឹទ្ធសភា និងគ្រោងផ្ទេរតំណែងនាយករដ្ឋមន្ត្រី ទៅឱ្យកូនប្រុសច្បងរបស់លោក គឺលោក ហ៊ុន ម៉ាណែត ក្នុងពេលដ៏ខ្លីខាងមុខនេះ។
ពលរដ្ឋខ្មែររស់នៅក្រៅប្រទេសរិះគន់ថា លោក ហ៊ុន សែន កំពុង ដឹកនាំប្រទេសកម្ពុជា ដូចទៅនឹងប្រទេសកូរ៉េខាងជើង (North Korea)។
ពលរដ្ឋរស់នៅប្រទេសជប៉ុន (Japan) លោកស្រី ណិត បូរ៉ា និយាយថា នៅពេលលោកស្រីឃើញក្រុមគ្រួសារលោក ហ៊ុន សែន ច្បាមយកស្ថាប័នកំពូលៗ របស់ជាតិមកគ្រប់គ្រងដូច្នេះធ្វើឱ្យលោកស្រី ខ្មាសប្រទេសជិតខាង។ លោកស្រី ប្រាប់ទៅលោក ហ៊ុន សែន ថា ប្រទេសកម្ពុជាមិនមែនជាប្រទេសកូរ៉េខាងជើងទេ។ លោកស្រី ប្រកាសថ្កោលទោស លោក ហ៊ុន សែន ដែលរៀបចំចាត់ចែងឱ្យកូនៗ របស់ខ្លួនគ្រប់គ្រងរដ្ឋាភិបាល ចំណែករូបលោកទៅគ្រប់គ្រងស្ថាប័នព្រះមហាក្សត្រដែលជាស្ថាប័នកំពូលរបស់ជាតិ។
លោកស្រី ណិត បូរ៉ា៖ «ខ្ញុំសូមថ្កោលទោសដាច់អហង្ការ ព្រោះអីដោយសារតែការរៀបចំការបោះឆ្នោតហ្នឹងអត់មានសេរីភាព និងភាពត្រឹមត្រូវ និងយុត្តិធម៌ ចេញពីការជ្រើសរើសរបស់ពលរដ្ឋផងហ្នឹងអ៊ីចឹងយើងមិនអាចទទួលយកបានទេ ព្រោះអីការដឹកនាំ ដូចជា ការលើកបន្តុប ដូចជា ការរៀបចំ តែសែស្រឡាយបន្តគ្នាតាមកិច្ចការងារអ៊ីចឹង យើងអត់អាចទទួលបានទេ ព្រោះអីខ្មែរអត់បានជ្រើសរើសអ្នកដឹកនាំហ្នឹងផងខ្មែរអត់បានបោះឆ្នោតអត់បានចូលរួមដោយសេរីត្រឹមត្រូវផងហ្នឹង»។
ស្រដៀងគ្នានេះដែរ សកម្មជនធ្វើការងារសង្គម ដែលកំពុងរស់នៅក្រៅប្រទេស អ្នកនាង លីម គីមស័រ លើកឡើងថា របៀបគ្រប់គ្រងអំណាចរបស់គ្រួសារ លោក ហ៊ុន សែន បែបនេះ កំពុងធ្វើឱ្យយុវជន ឬពលរដ្ឋខ្មែរដែលមានសមត្ថភាព បាត់បង់ឱកាសបម្រើការងារជូនប្រទេសជាតិ។ អ្នកនាង លីម គីមស័រ រិះគន់ថា ពេលនេះលោក ហ៊ុន សែន បានធ្វើឱ្យកម្ពុជា ដែលជាប្រទេសប្រជាធិបតេយ្យ ក្លាយជាប្រទេសផ្ដាច់ការ។ យុវជនរូបនេះ យល់ថា ពេលនេះ ពលរដ្ឋខ្មែរ ជាពិសេស យុវជន មិនគួរនៅស្ងៀមទុកឱ្យក្រុមគ្រួសារលោក ហ៊ុន សែន ធ្វើអ្វីស្រេចតែចិត្តដូច្នេះទេ។
លោកស្រី លីម គីមស័រ៖ «បើយើងមើលទៅតំណែងហ្នឹង សឹងតែខ្ពស់ជាងនាយករដ្ឋមន្ត្រីទៀត ព្រោះគាត់ឧត្តមប្រឹក្សាព្រះមហាក្សត្រឯណោះ អ៊ីចឹងបានន័យថា គាត់(លោក ហ៊ុន សែន) មិនមែនគាត់ចុះចេញពីតំណែងទេ គាត់ដំឡើងតំណែងខ្លួនឯង អ៊ីចឹងកាន់តែព្រួយបារម្ភជាងមុនហើយឥឡូវនេះ គឺយើងលែងហៅថា គ្រួសាររដ្ឋាភិបាលរបស់ប្រទេសកម្ពុជា ហើយគ្រួសាររដ្ឋាភិបាលលោក ហ៊ុន សែន វិញហើយ ព្រោះបើយើងមើលទៅចង្កោមហ្នឹង គឺអត់មានប្រជាពលរដ្ឋធម្មតា ដែលគាត់ឡើងទៅកាន់អំណាចហ្នឹងទេសុទ្ធតែកូនមេដឹកនាំមុនដដែលៗ»។
រីឯពលរដ្ឋរស់នៅប្រទេសនូវែលហ្សេឡង់ (New Zealand) លោក ម៉េង លី សង្កេតឃើញថា លោក ហ៊ុន សែន ហ៊ានច្បាមយកអំណាចមកគ្រប់គ្រងបែបនេះ ព្រោះលោក ហ៊ុន សែន មិនយល់ដឹងច្បាប់ជាតិ និងច្បាប់អន្តរជាតិ។ លោកយល់ថា នៅក្នុងស្ថានភាពដូច្នេះ ពលរដ្ឋនៅក្នុងស្រុកមិនអាចធ្វើសកម្មភាពណាមួយប្រឆាំងនឹងរបៀបគ្រប់គ្រងអំណាចរបស់លោក ហ៊ុន សែន បានទេ ប៉ុន្តែ លោកយល់ថា ពលរដ្ឋខ្មែរនៅក្រៅស្រុក និងអ្នកនយោបាយខ្មែរនៅក្រៅប្រទេស ដែលមានសិទ្ធិសេរីភាព គួរនាំគ្នាតវ៉ាទាមទារ នៅមុខអង្គការសហប្រជាជាតិ ឬក៏ទាមទារទៅក្រុមប្រទេសហត្ថលេខីនៃកិច្ចព្រមព្រៀងសន្តិភាពទីក្រុងប៉ារីសឱ្យគិតគូរពីបញ្ហាកម្ពុជា ឡើងវិញ។
លោកស្រី លីម គីមស័រ៖ «ខ្ញុំថា ត្រូវតែតំណាងរាស្ត្រខ្មែរដែលពីដើមជាប់ឈ្មោះកាលពីឆ្នាំ២០១៣ ហ្នឹងណា គាត់នាំគ្នាទៅអង្គការសហប្រជាជាតិ គាត់ប្រកាសថា គាត់ឱ្យអង្គការសហប្រជាជាតិដោះស្រាយប្រទេសខ្មែរ ពីព្រោះសព្វថ្ងៃនេះកំពុងអនាធិបតេយ្យណាស់ ហើយគាត់ត្រូវធ្វើកូដកម្មអត់អាហារនៅកន្លែងហ្នឹង បានអន្តរជាតិគេបានមើលឃើញច្បាស់ៗ តែម្ដង ហើយយើងសហគមន៍ខ្មែរនៅក្រៅប្រទេសយើងនឹងគាំទ្រអ្នកនយោបាយដែលធ្វើអ៊ីចឹងណា»។
ពលរដ្ឋរស់នៅក្រៅប្រទេសប្រតិកម្មដូច្នេះ ក្រោយពេលលោក ហ៊ុន សែន ដែលធ្វើជានាយករដ្ឋមន្ត្រីជិត ៤០ឆ្នាំមកនេះ ប្រកាសផ្ទេរតំណែងនេះទៅកូនប្រុសច្បងរបស់លោក គឺលោក ហ៊ុន ម៉ាណែត។ ទន្ទឹមគ្នានេះដែរ ក៏មានព័ត៌មានបែកធ្លាយពីសមាសភាពគណៈរដ្ឋមន្ត្រីថ្មីរបស់លោក ហ៊ុន ម៉ាណែត ដែលកូនប្រុសពៅរបស់លោក ហ៊ុន សែន ម្នាក់ទៀត គឺលោក ហ៊ុន ម៉ានី ក៏នឹងធ្វើជារដ្ឋមន្ត្រី ក្រសួងមុខងារសាធារណៈផងដែរ រីឯកូនប្រុសលោក ហ៊ុន សែន ម្នាក់ទៀត គឺលោក ហ៊ុន ម៉ានិត គឺជាមេបញ្ជាការរងកងទ័ពជើងគោក ខណៈដែលកូនប្រុសទី២ របស់លោក ហ៊ុន សែន រូបនេះ មានតួនាទីជាអគ្គនាយកនៃអគ្គនាយកដ្ឋានស្រាវជ្រាវចារកិច្ចក្រសួងការពារជាតិ និងជានាយករងខុទ្ទកាល័យលោក ហ៊ុន សែន សមាជិកក្រុមប្រឹក្សាភិបាលមជ្ឈមណ្ឌលសកម្មភាពកម្ចាត់មីនកម្ពុជា (CMAC)។
ចំណែក លោក ហ៊ុន សែន ក៏មិនសុខចិត្តដេកផ្ទះក្រោយឈប់ធ្វើជានាយករដ្ឋមន្ត្រីនោះដែរ គឺលោកនឹងឡើងទៅកាន់តំណែងជាប្រធានក្រុមប្រឹក្សាព្រះមហាក្សត្រ និងជាប្រធានព្រឹទ្ធសភា ដែលអាចបំពេញតួនាទីជាប្រមុខរដ្ឋស្តីទីនៅពេលអវត្តមានព្រះមហាក្សត្រ។
ជុំវិញប្រតិកម្មរបស់ពលរដ្ឋរស់នៅក្រៅស្រុកដូច្នេះ វិទ្យុអាស៊ីសេរីមិនអាចសុំការឆ្លើយតបពីអ្នកនាំពាក្យគណបក្សប្រជាជនកម្ពុជា លោក សុខ ឥសាន បានទេនៅថ្ងៃទី២៧ ខែកក្កដា។
រីឯ លោក ហ៊ុន ម៉ាណែត ដែលនឹងឡើងធ្វើជានាយករដ្ឋមន្ត្រី ក្នុងខែសីហា ខាងមុខនេះ សរសេរលើទំព័រហ្វេសប៊ុករបស់លោកនៅថ្ងៃទី២៧ ខែកក្កដាថា លោក ហ៊ុន សែន ដែលជាឪពុករបស់លោកបានផ្ដាំលោកថា នៅពេលលោកក្លាយជានាយករដ្ឋមន្ត្រី ត្រូវតែការពារឱ្យខាងតែបាននូវសន្តិភាព ដើម្បីធានាដល់ការអភិវឌ្ឍ និងភាពសុខសាន្តរបស់ប្រជាជន"។ លោក ហ៊ុន ម៉ាណែត ក៏បានសន្យាទៅឪពុកលោកថា លោកនឹងចងចាំជានិច្ច និងប្ដេជ្ញាអនុវត្តបណ្ដាំរបស់លោក ហ៊ុន សែន ឱ្យបានដាច់ខាតនៅក្នុងគ្រប់កាលៈទេសៈ។
ទោះយ៉ាងណាក្ដី អ្នកវិភាគនយោបាយ លោក គឹម សុខ យល់ថា សន្តិភាព និងការអភិវឌ្ឍ ពិតប្រាកដ លុះត្រាតែកើតចេញពីរដ្ឋាភិបាល ដែលមានការបោះឆ្នោត ត្រឹមត្រូវ និងយុត្តិធម៌ ប៉ុន្តែលោកថា លោក ហ៊ុន ម៉ាណែត ដែលនឹងឡើងធ្វើជានាយករដ្ឋមន្ត្រី នាពេលខាងមុខនេះ គឺកើតចេញពីការបោះឆ្នោតក្លែងក្លាយ ដែលគ្មានគណបក្សប្រឆាំងចូលរួម។ ទាក់ទងសារមុតស្រួច របស់លោក ហ៊ុន ម៉ាណែត ពីការប្ដូរផ្ដាច់អនុវត្តបណ្ដាំរបស់លោក ហ៊ុន សែន អ្នកវិភាគនយោបាយ លោក គឹម សុខ យល់ថា លោក ហ៊ុន ម៉ាណែត ដែលគ្រប់គ្រងយោធាជិតកន្លះជីវិតរបស់ខ្លួនមកហើយនោះ អាចនឹងដឹកនាំប្រទេសសាហាវ និងផ្ដាច់ការជាងលោក ហ៊ុន សែន ទៅទៀត។
លោក គឹម សុខ៖ «គ្មាននរណាម្នាក់សង្ឃឹមថា ហ៊ុន ម៉ាណែត នឹងធ្វើបានល្អប្រសើរជាងឪពុករបស់គាត់ទេ ពីព្រោះគាត់មានស្នាដៃជាអ្នកបង្កើតឧក្រិដ្ឋកម្មនយោបាយ ដឹកនាំបញ្ជាការរំលាយគណបក្សសង្គ្រោះជាតិ មានបទពិសោធន៍ ដែលមិនការពារជាតិ ប៉ុន្តែមេកងទ័ពវាយប្រជាពលរដ្ឋរហូតដល់តំណាងរាស្ត្រ ដូច្នេះ បទពិសោធន៍ និងគោលនយោបាយបែបនេះរបស់លោក ហ៊ុន ម៉ាណែត ដែលដើរតាមឪពុកអត់មានអ្វីប្រសើរនោះទេ សម្រាប់ប្រទេសកម្ពុជា»។
ទន្ទឹមនឹងពលរដ្ឋរិះគន់ការច្បាមអំណាចមកគ្រប់គ្រងនៃឪពុកកូន ត្រកូល ហ៊ុន ដូច្នេះ សហគមន៍អន្តរជាតិ ដែលនាំមុខដោយសហរដ្ឋអាមេរិកបានប្រកាសដាក់ទណ្ឌកម្មលើរដ្ឋាភិបាល លោក ហ៊ុន សែន មន្ត្រីរដ្ឋាភិបាលនៃរបបនេះជាបន្តបន្ទាប់។ ចំណែកក្រុមប្រទេសប្រជាធិបតេយ្យផ្សេងៗ ទៀត រួមមាន ប្រទេសបារាំង (France) អង់គ្លេស (England) និងអូស្ត្រាលី (Australia) ជាដើមនោះ ក៏បង្ហាញការមិនពេញចិត្តការបោះឆ្នោត កាលថ្ងៃទី២៣ កក្កដាដែរ ហើយពួកគេក៏ប្រកាសចាត់ វិធានការជាក់លាក់លើរដ្ឋាភិបាលថ្មីត្រកូល ហ៊ុន នេះផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments