ដោយ ហង្ស សាវយុត RFA 2017-02-20
សមាគមការពារសិទ្ធិមនុស្សអាដហុក (ADHOC) យល់ថា តុលាការខេត្តឧត្តរមានជ័យ ដែលសម្រេចឃុំខ្លួនអ្នកកាសែត ២នាក់ជាបណ្ដោះអាសន្ន ដោយចោទប្រកាន់ពីបទកំហែងយកប្រាក់ពីឈ្មួញរកស៊ីឈើនោះ គឺមិនត្រឹមត្រូវទេ។
សមាគមការពារសិទ្ធិមនុស្សអះអាងដូចនេះ នៅក្រោយពេលដែលគេរកឃើញថា អ្នកកាសែត ២នាក់ក្នុងចំណោមគ្នីគ្នាទាំងអស់ ៤នាក់ មិនបានទៅកំហែងយកប្រាក់ពីឈ្មួញរកស៊ីឈើគ្រញូងទេ គឺឈ្មួញទៅវិញទេដែលសូកប៉ាន់ដើម្បីបំបិទព័ត៌មាន។
គ្រួសាររបស់អ្នកកាសែត ២រូប អំពាវនាវឲ្យតុលាការខេត្តឧត្តរមានជ័យ ដោះលែងប្ដីរបស់គេឲ្យមានសេរីភាពវិញ។
គ្រួសាររបស់អ្នកកាសែតទាំងពីររូប បានធ្វើដំណើរទៅកាន់ទីរួមខេត្តឧត្តរមានជ័យ ដើម្បីជួបជាមួយសមាគមការពារសិទ្ធិមនុស្ស បំណងពឹងពាក់ឲ្យជួយជ្រោមជ្រែងផ្លូវច្បាប់ នៅរសៀលថ្ងៃច័ន្ទ ទី២០ ខែកុម្ភៈ។
ភរិយារបស់អ្នកកាសែតម្នាក់ក្នុងចំណោមអ្នកកាសែត ២នាក់ដែលកំពុងជាប់ឃុំ គឺលោកស្រី ញាណ ម៉ាលី។ លោកស្រីមានប្រសាសន៍ថា ប្ដីរបស់លោកស្រីឈ្មោះ សិញ សំឡី ត្រូវតុលាការខេត្តឧត្តរមានជ័យ សម្រេចឃុំខ្លួនបណ្ដោះអាសន្នក្នុងពន្ធនាគារ។ លោកស្រីបញ្ជាក់ថា តាមលោកស្រីស្ដាប់ឮប្ដីនិយាយទូរស័ព្ទទាក់ទងគ្នាមុនពេលចេញពីផ្ទះ គឺមិនបានគំរាមទារប្រាក់ពីឈ្មួញរកស៊ីឈើគ្រញូងទេ គឺឈ្មួញទៅវិញទេដែលសូកប៉ាន់ប្ដីរបស់គាត់ ដោយប្រាប់ឲ្យទៅយកលុយ៖ «គ្នាគាត់ហ្នឹងទូរស័ព្ទទៅប្រាប់ប្ដីខ្ញុំថា គេបានឃើញឈើគ្រញូងចំនួន ៣តោននៅស្រុកត្រពាំងប្រាសាទ ហើយគ្នាប្ដីខ្ញុំនោះក៏ប្រាប់ថា គេបានលុយខ្លះពីឈ្មួញឈើនោះហើយ»។
លោកស្រី ញាណ ម៉ាលី អំពាវនាវឲ្យតុលាការខេត្តឧត្តរមានជ័យ ដោះលែងប្ដីរបស់គាត់ឲ្យមានសេរីភាពវិញ។
អ្នកនាំពាក្យសមាគមការពារសិទ្ធិមនុស្សអាដហុក លោក សំ ច័ន្ទគា ជំរុញឲ្យតុលាការខេត្តឧត្តរមានជ័យ ត្រូវចាប់ខ្លួនអ្នកជួញឈើគ្រញូងផង កុំឲ្យចាប់ខ្លួនតែអ្នកកាសែត៖ «លោកព្រះរាជអាជ្ញាមិនគួរដាក់ទណ្ឌកម្មទៅលើតែភាគីមួយចំហៀងទេ គឺគួរតែដាក់ទណ្ឌកម្មលើភាគីអ្នកជួញដូរឈើគ្រញូងដែរ»។
ក្រុមគ្រួសាររបស់អ្នកកាសែតឲ្យដឹងថា ឈ្មួញរកស៊ីឈើគ្រញូងខុសច្បាប់នៅឃុំព្រះប្រឡាយ ស្រុកត្រពាំងប្រាសាទ ដែលប្ដឹងទៅសមត្ថកិច្ចនោះ ឈ្មោះ នូវ សាន ជាអ្នកសកម្មក្នុងការទទួលទិញ និងដឹកជញ្ជូនឈើគ្រញូង។
កាលពីរសៀលថ្ងៃទី១២ ខែកុម្ភៈ សមត្ថកិច្ចស្រុកត្រពាំងប្រាសាទ បានចាប់ខ្លួនអ្នកកាសែតចំនួន ៤នាក់ឈ្មោះ សិញ សំឡី ជានិពន្ធនាយកសារព័ត៌មានវិមានឯករាជ្យ លោក ស ធុច ជាអ្នកយកព័ត៌មានកាសែតកោះពេជ្រ លោក ប៉ាវ ទិតណារុង ជាអ្នកយកព័ត៌មានកាសែតខ្មែរម្ចាស់ស្រុក និងម្នាក់ទៀតមិនស្គាល់ឈ្មោះ និងអង្គភាព។
បន្ទាប់ពីបញ្ជូនទៅតុលាការ ចៅក្រមស៊ើបសួរបានសម្រេចដោះលែងអ្នកកាសែត ២នាក់ និង ២នាក់ទៀត ចៅក្រមស៊ើបសួរសម្រេចឃុំខ្លួនបណ្ដោះអាសន្នក្នុងពន្ធនាគារ។
នៅល្ងាចថ្ងៃច័ន្ទ ទី២០ កុម្ភៈ សមាគមការពារសិទ្ធិមនុស្សអាដហុក គ្រោងនឹងនាំគ្រួសាររបស់អ្នកកាសែតដែលជាប់ឃុំទាំងពីរ ទៅជួបប្រធានមន្ទីរព័ត៌មានខេត្តឧត្តរមានជ័យ ដើម្បីឲ្យជួយអន្តរាគមន៍លើការដោះលែង។
ទោះជាយ៉ាងណា អាស៊ីសេរី មិនអាចទាក់ទងប្រធានមន្ទីរព័ត៌មានខេត្តឧត្តរមានជ័យ បានទេ។
ចំណែកអភិបាលខេត្តឧត្តរមានជ័យ លោក ស ថាវី មានប្រសាសន៍ថា ស្ថាប័នតុលាការ គឺឯករាជ្យ ដែលអាជ្ញាធរមិនអាចលូកលាន់ការងាររបស់តុលាការបានទេ ប៉ុន្តែប្រសិនបើអ្នកកាសែតកំពុងជាប់ឃុំទាំងពីរដាក់ពាក្យស្នើសុំមកអាជ្ញាធរឲ្យជួយអន្តរាគមន៍លើការដោះលែង នោះរូបលោកនឹងព្យាយាមពិភាក្សាជាមួយតុលាការជុំវិញរឿងនេះ៕
From KI Media - Khmer Intelligence
via_IFTTT
You Might Also Like
Author
Subscribe to:Post Comments (Atom)
0 Comments