តំណាងសហគមន៍ជនជាតិដើមភាគតិច ព្រះសង្ឃ និងបណ្ដាញយុវជនកម្ពុជា ជំរុញរដ្ឋាភិបាលឱ្យទប់ស្កាត់បទល្មើសអារឈើខុសច្បាប់ និងលើកម្ពស់សិទ្ធិសេរីភាពជាមូលដ្ឋានរបស់ពលរដ្ឋក្នុងកិច្ចការអភិរក្សធនធានធម្មជាតិ។ ការលើកឡើងនេះធ្វើឡើងក្នុងសេចក្ដីថ្លែងការណ៍រួម ក្រោយពីពួកគាត់បានចូលរួមវេទិការបស់អង្គការសហប្រជាជាតិ ស្ដីពីជីវចម្រុះលើកទី១៦ នៅប្រទេសកូឡុំប៊ី (Colombia)។
បណ្ដាញសហគមន៍ព្រៃឡង់ បណ្ដាញសហគមន៍ព្រៃព្រះរកា សង្ឃសហគមន៍រុក្ខាវ័ន និងសមាគមបណ្ដាញយុវជនកម្ពុជា ក្នុងសេចក្ដីថ្លែងការណ៍រួមមួយនៅថ្ងៃទី២៥ ខែតុលាថា បញ្ហាកាប់ទន្ទ្រានដីព្រៃខុសច្បាប់ និងការរឹតត្បិតសិទ្ធិជាមូលដ្ឋាន ពីសំណាក់អាជ្ញាធរមូលដ្ឋាន គឺជាក្ដីបារម្ភរបស់ពលរដ្ឋកម្ពុជា។ ពួកគាត់ថា ការកាប់ទន្ទ្រានដីព្រៃ បង្កការគំរាមកំហែងដល់បរិស្ថាន និងដីព្រៃជំនឿរបស់ជនជាតិដើមភាគតិច។
សេចក្ដីថ្លែងការណ៍ដដែលៗ លើកឡើងថា ព្រៃឈើដែលនៅសេសសល់នៅលើពិភពលោកភាគច្រើន ស្ថិតនៅក្នុងទឹកដី នៃសហគមន៍មូលដ្ឋាន និងជនជាតិដើមភាគតិច ដែលពួកគាត់រក្សាអត្តសញ្ញាណគោរពជំនឿសាសនា និងរក្សាប្រពៃណីដ៏យូរអង្វែង។ករណីនេះ បានជំរុញឱ្យជនជាតិដើមភាគតិចចូលរួមចំណែកយ៉ាងសំខាន់ ក្នុងការទប់ស្កាត់ការបាត់បង់ជីវជាតិប្រព័ន្ធ អេកូ ការប្រែប្រួលអាកាសធាតុ និងការថែរក្សាភាពស្រស់ស្អាតរបស់ភពផែនដី។
សមាជិកស្នូលនៃបណ្ដាញសហគមន៍ព្រៃឡង់ លោក យុត សឿម លើកឡើងក្នុងសេចក្ដីថ្លែងការណ៍ថា ជនជាតិដើមភាគតិច និង សហគមន៍មូលដ្ឋាន នៅតាមបណ្ដាប្រទេសមួយចំនួន ដូចជានៅប្រទេសកូឡុំប៊ី និងប្រេស៊ីល ជាដើម ត្រូវបានរដ្ឋាភិបាល របស់ពួកគេ គាំទ្រពេញទំហឹងក្នុងការផ្ដល់មូលនិធិ ដើម្បីអភិរក្សធនធានធម្មជាតិ។ លោកសង្ឃឹមថា រដ្ឋាភិបាលកម្ពុជា ជាពិសេសក្រសួងបរិស្ថាន នឹងគាំទ្រដល់កិច្ចខិតខំប្រឹងប្រែងអភិរក្សព្រៃឈើ និង ជីវចម្រុះ របស់ពលរដ្ឋមូលដ្ឋានឱ្យបានល្អប្រសើរ ដូចគ្នានឹង បណ្ដាប្រទេសនៅលើពិភពលោកដែរ។
ចំណែកប្រធានសមាគមបណ្ដាញយុវជនកម្ពុជា (CYN) លោក ហេង គឹមហុង លើកឡើងក្នុងសេចក្ដីថ្លែងការណ៍ដែរថា ការវិនិយោគលើយុវជនដើម្បីការពារបរិស្ថាន និងជីវចម្រុះ គឺចាំបាច់ណាស់។ លោកសង្ឃឹមថា វេទិកា COP16 នឹងធានាបាននូវប្រព័ន្ធគាំទ្រដ៏រឹងមាំ សម្រាប់ការចូលរួម របស់យុវជន ក្នុងការអភិរក្សជីវចម្រុះ និងតាមដានការអនុវត្តគោលនយោបាយរបស់ប្រទេសសមាជិក រួមនឹងការបង្កើនមូលនិធិសម្រាប់គំនិតផ្ដួចផ្ដើមរបស់យុវជនត្រូវតែជាអាទិភាព។ លោកបន្តថា រដ្ឋាភិបាលកម្ពុជា គួរតែមានតម្លាភាពអំពីគោលនយោបាយរបស់ខ្លួន និងលើកទឹកចិត្តឱ្យមាន ការចូល រួមរបស់យុវជនក្នុងការការពារបរិស្ថាន។
លោក ហេង គឹមហុង ប្រាប់វិទ្យុអាស៊ីសេរី នៅថ្ងៃទី២៦ ខែតុលា បន្ថែមថា ការចេញសេចក្ដីថ្លែងការណ៍នេះ ដើម្បីបង្ហាញក្ដីកង្វល់អំពីកាប់ព្រៃឈើខុសច្បាប់ និងស្ថានភាពសិទ្ធិជាមូលដ្ឋានរបស់អ្នកការពារព្រៃឈើនៅកម្ពុជា ឱ្យពិភពលោកបានដឹង។ បន្ថែមពីនោះ លោកជំរុញឱ្យរដ្ឋាភិបាលកម្ពុជា និងអាជ្ញាធរមូលដ្ឋានទប់ស្កាត់បទល្មើសអារឈើខុសច្បាប់ឱ្យមានប្រសិទ្ធភាព រួមនឹងបើកលំហសិទ្ធិសេរីភាពដល់សហគមន៍ និងអង្គការសង្គមស៊ីវិលដោយគ្មានការរឹតត្បិត។
លោក ហេង គឹមហុង៖ «កម្ពុជាត្រូវប្រកាន់ការប្ដេជ្ញាចិត្តរបស់ខ្លួន នូវគោលនយោបាយល្អប្រសើរ បើកលំហឱ្យសហគមន៍ចូលរួមក្នុងការការពារព្រៃឈើឱ្យទូលំទូលាយ។ ជាពិសេស ភាគីពាក់ព័ន្ធ ត្រូវគោរពទៅដល់ជំនឿ សិទ្ធិសេរីភាពរបស់ជនជាតិដើមភាគតិច និងសិទ្ធិរបស់សហគមន៍មូលដ្ឋាន ព្រោះអី ពួកគាត់សំខាន់ណាស់ ក្នុងការជួយអភិរក្សមានប្រសិទ្ធភាព ប្រកបទៅតាមផ្នែកនានា ដែលគេហៅថា ជួយជំរុញឱ្យអាជ្ញាធរ មានការអនុវត្តគោលនយោបាយជាតិ និងអន្តរជាតិ»។
វិទ្យុអាស៊ីសេរី មិនអាចទាក់ទងអ្នកនាំពាក្យក្រសួងបរិស្ថាន លោក ខ្វៃ អាទិត្យា និងអង្គភាពអ្នកនាំពាក្យរដ្ឋាភិបាល លោក ប៉ែន បូណា ដើម្បីឆ្លើយតបជុំវិញរឿងនេះបានទេ នៅថ្ងៃទី២៦ ខែតុលា ដោយសារទូរស័ព្ទហៅចូល តែគ្មានអ្នកទទួល។
វេទិកាអង្គការសហប្រជាជាតិស្ដីពីជីវចម្រុះ លើកទី១៦ នេះ មានគោលបំណងតាមដានការអនុវត្តក្របខណ្ឌជីវចម្រុះជាសកល ដើម្បីលើកកម្ពស់ការប្រើប្រាស់ប្រកបដោយនិរន្តរភាព នៃព្រៃឈើ ប្រព័ន្ធ អេកូឡូស៊ី និង ជីវចម្រុះ។ វេទិកានេះមានអ្នកចូលជាង ២ម៉ឺននាក់ មកពីបណ្ដាប្រទេសនៅលើពិភពលោក ដែលភាគច្រើន ជាសមាជិក តំណាងមកពីប្រទេសហត្ថលេខី សហគមន៍ និងអង្គការសង្គមស៊ីវិល ដើម្បីផ្លាស់ប្ដូរបទពិសោធន៍ និងបន្តការប្ដេជ្ញាចិត្តរបស់ពួកគេក្នុងការការពារធនធានធម្មជាតិ និងសត្វព្រៃ។ វេទិកានេះធ្វើឡើងនៅទីក្រុងកាលី (Cali) ប្រទេសកូឡុំប៊ី (Colombia)។
បណ្ដាញសហគមន៍ព្រៃឈើ និងបណ្ដាញយុវជនអះអាងថា ក្នុងនាមតំណាងអង្គការសង្គមស៊ីវិល និងសហគមន៍ព្រៃឈើនៅកម្ពុជា ប្ដេជ្ញាចិត្តយ៉ាងមុតមាំក្នុងការគាំទ្ររដ្ឋាភិបាលកម្ពុជាក្នុងការអនុវត្តក្របខណ្ឌជីវចម្រុះសកល និងផែនការយុទ្ធសាស្ត្រ និងសកម្មភាពជីវចម្រុះ ដើម្បីធនធានធម្មជាតិ។ ពួកគាត់លើកទឹកចិត្តឱ្យរដ្ឋាភិបាលចូលរួមជាមួយយុវជន ជនជាតិដើមភាគតិច និងសហគមន៍មូលដ្ឋាន ដើម្បីការពារ និង អភិរក្សព្រៃឈើ និងជីវចម្រុះ ដ៏មានតម្លៃ របស់កម្ពុជាឡើងវិញ។
មាត្រា២១ ស្ដីពីតំបន់ការពារធម្មជាតិបានចែងថា សហគមន៍មូលដ្ឋាន សហគមន៍ជនជាតិដើមភាគតិច សាធារណជន និងសង្គមស៊ីវិលត្រូវបានលើកទឹកចិត្តឱ្យមានការចូលរួមយ៉ាងពេញលេញក្នុងការផ្ដល់ និងទទួលយកព័ត៌មានទាក់ទងនឹងការគ្រប់គ្រង ការអភិរក្ស និងការអភិវឌ្ឍក្នុងតំបន់ការពារធម្មជាតិ។ ទោះជាយ៉ាងណា កន្លងទៅ មន្ត្រីបរិស្ថានតែងរារាំងមិនឱ្យក្រុមប្រជាសហគមន៍ និងនិស្សិត ចូលល្បាតព្រៃនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments