អ្នកឃ្លាំមើល និងប្រជាពលរដ្ឋថា រដ្ឋាភិបាលរបស់លោក ហ៊ុន ម៉ាណែត ព្យាយាមកេងចំណេញនយោបាយ ពីការរៀបចំពិធីបុណ្យចូលឆ្នាំប្រពៃណីជាតិ ។ ពួកគាត់សង្កេតឃើញថា ព្រឹត្តិការណ៍ទាំងនោះបានផ្សារភ្ជាប់ការផ្សព្វផ្សាយគ្រឿងស្រវឹង និងសារអរគុណសន្តិភាព គ្រប់ទីកន្លែង ដោយឱ្យពលរដ្ឋដឹងគុណការដឹកនាំ របស់បក្សកាន់អំណាច ជាជាងធ្វើឡើងដើម្បីអបអរបុណ្យប្រពៃណីជាតិ។
ពិធីបុណ្យចូលឆ្នាំប្រពៃណីជាតិនៅឆ្នាំនេះ ឃើញមានមេដឹកនាំគ្រាក់ៗ ក្នុងជួររដ្ឋាភិបាល ហាក់សប្បាយអរ ដោយអួតថា ការសប្បាយក្អាកក្អាយ របស់ពលរដ្ឋ នៅថ្ងៃបុណ្យចូលឆ្នាំខ្មែរ ដោយសារតែគុណបំណាច់របស់បក្សកាន់អំណាច ក្រោមម្លប់សន្តិភាព។ ចំណែកពលរដ្ឋថា ការលើកឡើងនេះ គឺផ្ទុយនឹងទិដ្ឋភាពជាក់ស្ដែង ស្របពេលដែលប្រជាពលរដ្ឋភាគច្រើនជួបវិបត្តិសេដ្ឋកិច្ចគ្រួសារ។ពលរដ្ឋរងគ្រោះដីធ្លីដ៏រ៉ាំរ៉ៃ នៅសហគមន៍ឡពាង ស្រុកកំពង់ត្រឡាច ខេត្តកំពង់ឆ្នាំង លោក ស្ងួន ញៀន ប្រាប់វិទ្យុអាស៊ីសេរីនៅថ្ងៃទី១៧ ខែមេសាថា បើទោះពិធីចូលឆ្នាំខ្មែរ មានការរាំលេងសប្បាយ និងពលរដ្ឋជួបជុំគ្រួសារធ្វើបុណ្យទានក្ដី ប៉ុន្តែ នេះគ្រាន់តែការមើលឃើញមួយជ្រុងប៉ុណ្ណោះ តែជាក់ស្ដែង ពលរដ្ឋភាគច្រើនកំពុង ជួបវិបត្តិសេដ្ឋកិច្ចគ្រួសារធ្ងន់ធ្ងរ។
លោក ស្ងួន ញឿន មើលឃើញថា ការរៀបចំព្រឹត្តិការណ៍ ក្នុងថ្ងៃចូលឆ្នាំខ្មែរនេះ គឺរៀបចំឡើង ដើម្បី កេងចំណេញផលប្រយោជន៍នយោបាយ ជាជាងផលពលរដ្ឋ ដោយសារតែ មន្ត្រីនយោបាយទាំងតែងផ្សារភ្ជាប់ជាមួយនឹងសារនយោបាយ ឱ្យពលរដ្ឋអរគុណសន្តិភាព។ លោកបន្តថា ប្រទេសជាតិមួយដែលមានសន្តិភាពទៅបាន លុះណាតែប្រជាពលរដ្ឋ លែងរងគ្រោះ បាត់បង់ដីធ្លី ផ្ទះសម្បែង ហើយមានការងារធ្វើសមរម្យ ពុំជាប់បំណុលធនាគារវ័ណ្ឌក ដូចបច្ចុប្បន្ន។ «»
ការលើកឡើងរបស់ពលរដ្ឋនេះ ស្របពេលមន្ត្រីពាក់ព័ន្ធ រួមនឹងលោកនាយករដ្ឋមន្ត្រី ហ៊ុន ម៉ាណែត និងឪពុករបស់លោក គឺ លោក ហ៊ុន សែន បានអួតក្ដែងៗថា ការសប្បាយក្អាកក្អាយ របស់ពលរដ្ឋ នៅថ្ងៃបុណ្យចូលឆ្នាំប្រពៃណីជាតិនេះ ដោយសារតែកម្ពុជាមានសន្តិភាព។
នៅថ្ងៃទី១៦ ខែមេសា លោកនាយករដ្ឋមន្ត្រី ហ៊ុន ម៉ាណែត បានសរសេរបង្ហោះលើហ្វេសប៊ុក (Facebook) ដោយអរគុណដល់ អាជ្ញាធរដែនដីគ្រប់លំដាប់ថ្នាក់ ដែលបានរៀបចំពិធីចូលឆ្នាំប្រពៃណីជាតិគួរជាទីពេញចិត្ត តាមការចង់បានរបស់លោក ។ លោកបញ្ជាក់ថា ករណីនេះ ដោយសារតែ កម្ពុជាមានម្លប់សន្តិភាព ដែលបានផ្ដល់ឱ្យប្រជាជនគ្រប់រូប អាចរួមរស់ប្រកបដោយកុសលធម៌ និងសាមគ្គីធម៌។
រីឯ ឪពុក លោក ហ៊ុន ម៉ាណែត គឺ លោក ហ៊ុន សែន ក៏បានសរសេរបង្ហោះលើហ្វេសប៊ុកផងដែរ ដោយភ្ជាប់នឹងរូបថត យុវជនរាំលេង ប៉ាតម្សៅ។ លោកថា កម្ពុជាមានសន្តិភាពពេញលេញ ទើបអាចមានព្រឹត្តិការណ៍ រាំលេង សើចសប្បាយក្អាកក្អាយ។ លោកថា មិនមែនមានតែពលរដ្ឋខ្មែរទេ គឺមានទាំងភ្ញៀវបរទេសច្រើនកុះករ មកលេងកម្សាន្តផងដែរ។
អ្នកឃ្លាំមើលលើកឡើងថា ការចេញសារអួតក្ដែងៗ ពីសំណាក់ លោក ហ៊ុន ម៉ាណែត និង លោក ហ៊ុន សែន នេះ គឺគ្រាន់តែដើម្បីកេងចំណេញនយោបាយ ហើយចង់បង្វែរស្ថានការណ៍ ដើម្បីឱ្យពលរដ្ឋងាកមកដឹងគិតពីការដឹកនាំរបស់បក្សកាន់អំណាចប៉ុណ្ណោះ។ តែជាក់ស្ដែង ប្រជាពលរដ្ឋ កំពុងជាប់វិបត្តិធ្ងន់ធ្ងរផ្នែកសេដ្ឋកិច្ច និងគ្មានការងារធ្វើត្រឹមត្រូវ ។ ចំណែក ការសប្បាយអំឡុងពេលជួបឆ្នាំ គឺគ្រាន់តែដើម្បី បន្ធូរបន្ថយភាពតានតឹងក្នុងចិត្តមួយគ្រាប៉ុណ្ណោះ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ បណ្ឌិត សេក សុជាតិ ប្រាប់វិទ្យុអាស៊ី ថា ការយកព្រឹត្តិការណ៍ បុណ្យប្រពៃណីជាតិ របស់អ្នកនយោបាយដើម្បីកេងចំណេញផលប្រយោជន៍ ពុំមែនជាគំរូល្អនោះទេ។ លោកបន្តថា ការណ៍ដែលអ្នកនយោបាយនាំគ្នា ដោះស្រាយបញ្ហាសង្គមដូចជា បញ្ឈប់ ការរំលោភបំពានសិទ្ធិដីធ្លី និងផ្ដល់ការងារសមរម្យ ដល់ពលរដ្ឋ នោះទើបសមជាប្រទេស មានសន្តិភាពហើយពលរដ្ឋអាចរស់នៅសម្បូរសប្បាយពិតប្រាកដ។ «»
មន្ត្រីសង្គមស៊ីវិល និងប្រជាពលរដ្ឋ ចង់ឃើញរដ្ឋាភិបាល ដែលដឹកនាំដោយលោកនាយករដ្ឋមន្ត្រី ហ៊ុន ម៉ាណែត ដោះស្រាយបញ្ហាសង្គមនានា ដូចជាបញ្ហាការរំលោភដីធ្លី សិទ្ធិការងារ សិទ្ធិមនុស្ស និងគិតគូរពីសេដ្ឋកិច្ចពលរដ្ឋជាធំ តាមរយៈស្វែងរកការងារសមរម្យ ទើបប្រទេសជាតិមានសន្តិភាពពេញលេញ ដែលធ្វើឱ្យពលរដ្ឋមានសន្តិភាពទាំងផ្លូវកាយ និងផ្លូវចិត្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
From ព័ត៌មានថ្មីៗ | RFA
via_IFTTT
0 Comments