ក្រុមហ៊ុនចិន ដែលជាអ្នកគ្រប់គ្រងកម្មវិធីវីដេអូបណ្តាញសង្គម TikTok របស់ចិន បានបដិសេធការដេញថ្លៃទិញយកកម្មវិធីនេះរបស់ក្រុមហ៊ុន Microsoft ហើយហាក់ដូចជាទំនងចង់លក់ក្រុមហ៊ុន TikTok នេះ ទៅឲ្យក្រុមហ៊ុន Oracle វិញ។ រដ្ឋបាលរបស់លោកត្រាំ បានដាក់កំហិតត្រឹមថ្ងៃ២០កញ្ញា ជាថ្ងៃចុងក្រោយឲ្យក្រុមហ៊ុន ByteDance របស់ចិន ត្រូវរកឲ្យបានម្ចាស់គ្រប់គ្រងផ្សេង ឬបើមិនអញ្ជឹងទេ ត្រូវបញ្ឈប់ប្រតិបត្តិការរបស់ខ្លួនក្នុងទឹកដីសហរដ្ឋអាមេរិក។ កាលពីថ្ងៃអាទិត្យ ការសែត the New York Times ផ្សាយថា ក្រុមហ៊ុនចិន ByteDance បានបដិសេធការដេញថ្លៃរបស់ក្រុម Microsoft របស់អាមេរិក ហើយថាក្រុមហ៊ុន Oracle នឹងអាចក្លាយជា«ដៃគូបច្ចេកវិទ្យា»របស់ខ្លួន។ ទោះជាយ៉ាងណាក៏ដោយ គេនៅមិនទាន់ដឹងលម្អិតពីកិច្ចព្រមព្រៀងរវាងក្រុមហ៊ុន ByteDance និង Oracle នោះនៅឡើយទេ។ ក្រុមហ៊ុន Microsoft បញ្ជាក់ក្នុងសេចក្តីថ្លែងការណ៍របស់ខ្លួនថា គម្រោងទិញយករបស់ខ្លួន អាចជាការល្អសម្រាប់អ្នកប្រើប្រាស់បណ្តាញសង្គម TikTok ទន្ទឹមនឹងការការផលប្រយោជន៍សន្តិសុខជាតិរបស់អាមេរិកនោះ។ ដើម្បីធ្វើដូចនេះបាន Microsoftត្រូវធ្វើការផ្លាស់ប្តូរដ៏សំខាន់ ដើម្បីធានាថា សេវាកម្មដែលផ្តល់ដោយក្រុមហ៊ុន មានស្តង់ដារខ្ពស់សម្រាប់បញ្ហាសនិ្តសុខ ភាពជាឯកជន សុវត្ថិភាពអនឡាញ និងការប្រឆាំងពត៌មានក្លែងក្លាយជាដើម។ ក្រុមហ៊ុនOracle ជាក្រុមហ៊ុននៅតំបន់បច្ចេកវិទ្យា Silicon Valley ចំនួនតូចប៉ុណ្ណោះ ដែលអ្នកដឹកនាំរបស់ក្រុមហ៊ុននេះ បានធ្វើការរៃអង្គាសប្រាក់សម្រាប់លោកប្រធានាធិបតី ដូណាល់ ត្រាំ។ កាលពីថ្ងៃច័ន្ទ រដ្ឋមន្ត្រីក្រសួងហិរញ្ញវត្ថុអាមេរិក លោក Steven Mnuchin ថ្លែងថា រដ្ឋបាលលោកត្រាំនឹងពិនិត្យមើលសំណើទិញរបស់ក្រុមហ៊ុន Oracle ដើម្បីប្រែក្លាយក្រុមហ៊ុន TikTok ឲ្យទៅជាក្រុមហ៊ុនមានមូលដ្ឋាននៅសហរដ្ឋអាមេរិក៕
From វិទ្យាសាស្ត្រ បច្ចេកវិទ្យា - Voice of America | VOA
via_IFTTT
Author
Subscribe to:Post Comments (Atom)
0 Comments