កាសែត The New York Times កាលពីថ្ងៃពុធបានរាយការណ៍ថា ប្រព័ន្ធកុំព្យូទ័ររបស់បូរីវ៉ាទីកង់ ត្រូវបានលួចចូលដោយក្រុម hackers ចិនតាំងពីខែឧសភា ដែលមើលទៅទំនងជាបេសកកម្មចារកម្មនៅមុនកិច្ចចរចារវាងអាជ្ញាធរគ្រិស្តសាសនានិកាយរ៉ូម៉ាំងកាតូលិក និងអាជ្ញាធរកុម្មុយនិស្តចិន។ កាសែតអាមេរិកនេះបន្តថា ការវាយប្រហារតាមប្រព័ន្ធកុំព្យូទ័រនេះត្រូវបានរកឃើញដោយក្រុមហ៊ុនសន្តិសុខអ៊ីនធឺណិតមានមូលដ្ឋាននៅសហរដ្ឋអាមេរិកឈ្មោះ Recorded Future ហើយទំនងជាលើកដំបូងដែលគេបានរកឃើញក្រុមលួចចូលប្រព័ន្ធកុំព្យូទ័រ ឬហៅជាភាសាអង់គ្លេសថា hackers របស់ចិន បានចូលវាយប្រហារចំពោះបូរីវ៉ាទីកង់និងអង្គការមួយដែលតំណាងឲ្យបូរីវ៉ាទីកង់ដែលធ្លាប់បានចរចាជាមួយរដ្ឋាភិបាលចិនអំពីឋានៈស្ថាប័នគ្រិស្តសាសនានេះនៅចិនដីគោក។ អ្នកជំនាញនៅក្រុមហ៊ុន Recorded Future បានសន្និដ្ឋានថា ក្រុម hackers ធ្វើការឲ្យរដ្ឋាភិបាលចិន។ ប្រទេសចិនទទួលស្គាល់និកាយកាតូលិកនិងសាសនាបួនទៀតជាផ្លូវការ ប៉ុន្តែតែងសង្ស័យថា ក្រុមសាសនិកទាំងនេះអាចបង្កគ្រោះថ្នាក់ដល់សន្តិសុខជាតិនិងអំណាចរបស់គណបក្សកុម្មុយនិស្តចិន អាជ្ញាធរចិនតែងធ្វើការវាយប្រហារតាមកុំព្យូទ័រចូលលួចព័ត៌មានពីក្រុមដូចជាពុទ្ធសាសនិកទីបេតិ៍ និង ក្រុមអ៊ុយហ្គ័រកាន់សាសនាឥស្លាម ជាដើមដែលមានមូលដ្ឋាននៅក្រៅប្រទេស។ បូរីវ៉ាទីកង់និងអាជ្ញាធរចិនរំពឹងថា នឹងធ្វើការចរចានៅខែកញ្ញា អំពីសង្ឃនាយកនិកាយកាតូលិកផ្លូវការនៅចិន ហើយការរកឃើញថ្មីនេះទំនងនឹងធ្វើឲ្យវ៉ាទីកង់ខឹងសម្បារ។ បូរីវ៉ាទីកង់និងចិនដីគោកបានផ្តាច់ទំនាក់ទំនងផ្លូវការកាលពីឆ្នាំ១៩៥១ ហើយបច្ចុប្បន្ននេះវ៉ាទីកង់ទទួលស្គាល់កោះតៃវ៉ាន់ជាផ្លូវការ។ ប្រសិនបើភាគីទាំងពីរស្តារទំនាក់ទំនងការទូតឡើងវិញ នោះអាជ្ញាធរចិនត្រូវគេគិតថានឹងទាមទារឲ្យបូរីវ៉ាទីកង់ផ្តាច់ទំនាក់ទំនងជាមួយតៃវ៉ាន់៕
From វិទ្យាសាស្ត្រ បច្ចេកវិទ្យា - Voice of America | VOA
via_IFTTT
Author
Subscribe to:Post Comments (Atom)
0 Comments