មាស សុខជា ភ្នំពេញ ប៉ុស្តិ៍ Fri, 11 November 2016
ភ្នំពេញៈ គណបក្សសង្គ្រោះជាតិនឹងកាត់បន្ថយចំនួនក្រសួងក្នុងរដ្ឋាភិបាល និងកំណត់ឲ្យមានរដ្ឋលេខាធិការតែពីររូបប៉ុណ្ណោះនៅក្នុងក្រសួងនីមួយៗជាជាងមានរដ្ឋលេខាធិការចំនួន ៥ ហើយលុបបំបាត់រាល់អនុរដ្ឋលេខាធិការទាំងអស់ប្រសិនបើខ្លួនឈ្នះឆ្នោតបានឡើងកាន់អំណាច។ នេះបើតាមឯកសារមួយដែលទទួលបានកាលពីម្សិលមិញ។
ឯកសារនេះមិនបានបញ្ជាក់ថាតើក្រសួងណាអាចនឹងត្រូវកាត់ ឬបញ្ចូលគ្នាទេ ប៉ុន្តែនិយាយថាគណបក្សសង្គ្រោះជាតិមានគោលបំណងដឹកនាំរដ្ឋាភិបាលមួយដែលមានសណ្តាប់ធ្នាប់ដោយមិនមានភាពធ្ងន់កំពូលនៅក្នុងក្រសួងនានា។
ប្រទេសកម្ពុជាចាប់តាំងពីមានកិច្ចព្រមព្រៀងនយោបាយរវាងគណបក្សប្រជាជន និងគណបក្សហ៊្វុនស៊ីនប៉ិចឆ្នាំ ២០០៤ ដើម្បីឲ្យមានរដ្ឋាភិបាលចម្រុះមួយក្រសួងនីមួយៗត្រូវបានបង្កើនឡើងខ្លាំងនូវចំនួនតំណែងថ្នាក់កំពូលៗដែលត្រូវបានគេរិះគន់ថារដ្ឋាភិបាលក្បាលធំហួសហេតុដែលធ្វើឲ្យមានការចំណាយថវិកាជាតិខ្ជះខ្ជាយ។ ឯកសារនេះនិយាយថា៖«ដើម្បីសម្រេចគោលដៅរាជរដ្ឋាភិបាលស្អាតស្អំដែលដឹកនាំដោយគណបក្សសង្គ្រោះជាតិនឹងរៀបចំគណៈរដ្ឋមន្រ្តីដែលមានសមាសភាពតូចជាងមុនប៉ុន្តែនឹងមានការទទួលខុសត្រូវសមត្ថភាព និងប្រសិទ្ធភាពពិតប្រាកដជាមួយនឹងភាពជាអ្នកដឹកនាំខ្ពស់»។
ឯកសារនេះក៏បានលើកឡើងផងដែរថានឹងមិនមាន «សហរដ្ឋមន្រ្តី» ដូចនៅក្នុងរដ្ឋាភិបាលចម្រុះរវាងគណបក្សប្រជាជនកម្ពុជា និងគណបក្សហ៊្វុនស៊ិនប៉ិចនៅចន្លោះពីឆ្នាំ ១៩៩៣ និង ២០០៥ នោះទេហើយថាក្រសួងនីមួយៗនឹងលែងមានរដ្ឋលេខាធិការប្រាំរូប និងអនុរដ្ឋលេខាធិការជាច្រើនរូបទៀតហើយ។ ឯកសារនេះបន្តថា៖ «ក្រសួងនីមួយៗនឹងកំណត់រដ្ឋមន្រ្តីតែមួយ និងរដ្ឋលេខាធិការតែពីររូបប៉ុណ្ណោះ។ ងារអនុរដ្ឋលេខាធិការត្រូវតែលុបចោល»។
អ្នកនាំពាក្យគណបក្សសង្គ្រោះជាតិលោក យឹម សុវណ្ណ បានបដិសេធធ្វើអត្ថាធិប្បាយអំពីឯកសារនេះដោយថ្លែងថាវាមិនទាន់ជាផ្នែកផ្លូវការនៃគោលនយោបាយរបស់គណបក្សនៅឡើយទេ។ «យើងត្រូវការកែវាបន្ថែមទៀត។ នេះគ្រាន់តែជាសេចក្តីព្រាងបណ្តោះអាសន្នប៉ុណ្ណោះ»។
អ្នកនាំពាក្យគណបក្សប្រជាជនកម្ពុជាលោក សុខ ឥសាន បានថ្លែងថាវាជាបុព្វសិទ្ធិរបស់គណបក្សប្រឆាំងដែលស្នើឲ្យមានការផ្លាស់ប្តូររដ្ឋាភិបាលហើយគណបក្សកាន់អំណាចគ្មានបញ្ហាចំពោះសំណើរបស់គណបក្សសង្គ្រោះជាតិទេ។ លោក សុខ ឥសាន បានថ្លែងបន្តថា៖ «យើងមិនអាចគិតថាម្ខាងនេះត្រូវហើយម្ខាងនោះខុសទេ។ អ្វីដែលគាត់និយាយគឺស្រេចតែគាត់។ ប្រសិនបើគាត់ចង់បង្កើតក្រសួងមួយដែលមានរដ្ឋមន្រ្តីមួយហើយមិនមានជំនួយការវាអាស្រ័យទៅលើការយល់ឃើញរបស់គណបក្សនីមួយៗ»។
ក្រៅពី «សហរដ្ឋមន្រ្តី» ពីគណបក្សនីមួយៗនៅក្នុងក្រសួងមហាផ្ទៃ និងក្រសួងការពារជាតិ កិច្ចព្រមព្រៀងរដ្ឋាភិបាលចម្រុះខែមិថុនា ឆ្នាំ ២០០៤ រវាងគណបក្សប្រជាជនកម្ពុជា និងគណបក្សហ៊្វុនស៊ិនប៉ិចបានបង្កើនចំនួនអនុរដ្ឋលេខាធិការដែលស្មើនឹងអនុរដ្ឋមន្រ្តីពី ២ ទៅ ៥ រូបដើម្បីបង្កើតតួនាទីចែកគ្នា។ លោកនាយករដ្ឋមន្រ្តី ហ៊ុន សែន បានលុបបំបាត់មិនឲ្យមាន «អនុរដ្ឋមន្រ្តី» របស់គណបក្សហ៊្វុនស៊ិនប៉ិចនៅឆ្នាំបន្ទាប់ប៉ុន្តែក្រសួងនីមួយៗបានបន្តមានរដ្ឋលេខាធិការយ៉ាងហោចណាស់ ៥ រូប។
លោក មាស នី អ្នកវិភាគនយោបាយឯករាជ្យបានថ្លែងថាគម្រោងកាត់បន្ថយក្រសួង និងតំណែងកំពូលៗនៅក្នុងក្រសួងនឹងទាក់ទាញសាធារណជនហើយថាលោកថែមទាំងមើលឃើញថាវាកំពុងត្រូវបានទទួលយកដោយគណបក្សប្រជាជនកម្ពុជា។ លោក នី បានថ្លែងថា៖ «កម្មវិធីគោលនយោបាយដែលរៀបចំដូចនេះគឺសមស្របហើយខ្ញុំគិតថាប្រសិនបើគណបក្សសង្គ្រោះជាតិផ្សព្វផ្សាយកម្មវិធីគោលនយោបាយនេះទូលំទូលាយ...គណបក្សកាន់អំណាចអាចនឹងពិចារណាវាផងដែរដោយសារយើងអាចទទួលស្គាល់ថាបច្ចុប្បន្ននេះតំណែងនៅក្នុងរដ្ឋាភិបាលមួយចំនួនមិនគួរបង្កើតទេ»។
លោក មាស នី បានបន្តថា៖ «តំណែងទាំងនោះត្រូវបានបង្កើតឡើងគ្រាន់តែដើម្បីមានមុខងារសម្រាប់អ្នករាល់គ្នាទាំងនោះ និងដើម្បីទទួលបានប្រាក់ខែពីរដ្ឋប៉ុណ្ណោះ»៕ PS
From KI Media - Khmer Intelligence
via_IFTTT
0 Comments