 |
| ទិដ្ឋភាពផ្សារច្បារអំពៅ រាជធានីភ្នំពេញ ត្រូវភ្លើងឆាបឆេះ កាលពីយប់ថ្ងៃទី១៥ ខែមីនា ឆ្នាំ២០១៨។ Photo screenshot |
ដោយ មាន ឫទ្ធិ RFA 2018-03-18
ក្រុមអាជីវករនៅផ្សារច្បារអំពៅ ដែលរងគ្រោះឆេះផ្សារ កាលពីពាក់កណ្ដាលអាធ្រាត្រ ថ្ងៃទី១៥ មីនា បាននាំគ្នាទៅជួបជុំគ្នាក្នុងវត្តច្បារអំពៅ នៅព្រឹកថ្ងៃទី១៨ មីនា នេះ ដើម្បីស្នើសុំឲ្យអាជ្ញាធរជួយសាងសង់ដំបូលផ្សាររួមគ្នាមួយ ឲ្យបានខ្ពស់ឲ្យបានលឿនបំផុត ដើម្បីពួកគេអាចបន្តអាជីវកម្មលក់ដូររបស់គេបន្តទៀតបាន។ អភិបាលខណ្ឌច្បារអំពៅ មិនទាន់សម្រេចបែបណាទេ ចំពោះសំណើនេះ ដោយអះអាងថា ចាំពិភាក្សាគ្នាសិន។
ជំនួបរវាងអាជីវកររងគ្រោះ និងអាជ្ញាធរខណ្ឌច្បារអំពៅនោះ ក្រុមអាជីវករបានទាមទារជារួម ចំនួន ៣ចំណុច គឺស្នើសុំឲ្យអាជ្ញាធរជួយសំអាតកម្ទេចកំទី នៅក្នុងផ្សារដែលឆេះ ជួយសាងសង់ដំបូល ផ្សារទាំងមូលឲ្យបានខ្ពស់ នៅលើទីតាំងចាស់ និងធ្វើឲ្យបានលឿននៅមុនពិធីបុណ្យចូលឆ្នាំខ្មែរខាងមុខនេះ។ ចំណែក តូបលក់នីមួយៗ ម្ចាស់តូបអះអាងថា សុខចិត្តសាងសង់ដោយខ្លួនឯងឡើងវិញ។
អាជីវករលក់គ្រឿងក្រអូបម្នាក់ ក្នុងផ្សារច្បារអំពៅ កញ្ញា គឹម ឆាយ ឲ្យដឹងថា ជំនួបនេះ នឹងបន្តពិភាក្សាគ្នា នៅព្រឹកថ្ងៃទី១៩ មីនាទៀត ព្រោះការដោះស្រាយកាលពីព្រឹកថ្ងៃទី១៨ មីនា នៅមិនទាន់ទទួលបានលទ្ធផលបែបណាទេ។ ទោះយ៉ាងណា អាជីវករដែលខាតបង់ថវិកាជាង ១ម៉ឺនដុល្លារ ក្នុងករណីឆេះផ្សារច្បារអំពៅរូបនេះ ប្រាប់ថា ក្រុមអាជីវករសង្ឃឹមយ៉ាងមុតមាំថា អាជ្ញាធរនឹងទទួលយកសំណើរបស់ពួកគេ ព្រោះពួកគេសុទ្ធតែរងគ្រោះដោយភ្លើងឆេះផ្សារ៖ «និយាយទៅ ពួកខ្ញុំសំណូមពរឲ្យគាត់ (អាជ្ញាធរ) ធ្វើតែដំបូលរួមទេ។ សំខាន់បំផុតធ្វើការឲ្យលឿនហ្នឹងណា ឲ្យគាត់កាយ អាគ្រឿងឆេះហ្នឹង កាយឲ្យលឿននឹងអាចខ្ញុំបន្តឆ្នាំងបាយតទៅទៀត បើទាមទារសាងសង់តូបទៀត នាំតែយូរទេបង ខ្ញុំត្រូវការលក់ដូរឆាប់ៗដែរហ្នឹង»។
កាលពីពាក់កណ្ដាលអធ្រាត្រថ្ងៃទី១៥ ឈានចូលថ្ងៃ ១៦ ខែមីនា ផ្សារច្បារអំពៅទាំងមូល បានរងនូវការឆេះយ៉ាងសន្ធោសន្ធៅ បណ្ដាលឲ្យតូបចំនួន ១.៤៤៧ ខូចខាតស្ទើរទាំងស្រុង។ ករណីនេះ ការសន្និដ្ឋានជាបឋមរបស់អាជ្ញាធរ សន្និដ្ឋានថា បណ្ដាលមកពីឆ្លងចរន្តអគ្គិសនី។
របាយការណ៍របស់នគរបាលប៉ុស្តិ៍ច្បារអំពៅទី២ បានរៀបរាប់ថា នៅយប់ ថ្ងៃព្រហស្បតិ៍ ទី ១៥ ខែមីនា អគ្គីភ័យឆេះផ្សារច្បារអំពៅ ដែលឋិតនៅភូមិកណ្ដាល សង្កាត់ច្បារអំពៅ ២ ខណ្ឌច្បារអំពៅ រាជធានីភ្នំពេញ។ តាមរបាយការណ៍នេះ សរសេរថា តូបដែលឆេះ សរុបចំនួន ៥៨៨តូប ក្នុងនោះឆេះតូបខាងក្នុងផ្សារចំនួន ៣៤០ តូប នឹងឆេះតូបក្រៅផ្សារចំនួន ២៤៨តូប ដែលជាតូបសង់អំពីថ្មប្រក់ស័ង្កសី មានទំហំតូបនីមួយៗស្មើ ២ម៉ែត្រ។
នាយនគរបាលប៉ុស្តិ៍រដ្ឋបាលច្បារអំពៅទី២ លោក ទេព បូរ៉ា ត្រូវបានសារព័ត៌មានភ្នំពេញប៉ុស្ដិ៍ស្រង់សម្ដី ពីកន្លែងកើតហេតុថា ក្នុងការពន្លត់អគ្គីភ័យឆេះផ្សារអំពៅ សមត្ថកិច្ចបានប្រើប្រាស់ទឹកអស់ជាច្រើនឡាន ខណៈដែលភ្លើងបានឆេះជាង ១០ម៉ោង គឺតាំងពីយប់ពាក់កណ្ដាលអាធ្រាត្រ ថ្ងៃទី១៥ មីនា រហូត ដល់ម៉ោងប្រមាណ ៣រសៀល ថ្ងៃទី១៦ មីនា។
ក្រៅពីស្នើដល់អាជ្ញាធរឲ្យជួយដោះស្រាយលើការសាងសង់ដំបូលផ្សារឡើងវិញ ក្រុមអាជីវករ ដែលរងគ្រោះឆេះតូប និងអីវ៉ាន់ទាំងស្រុង ស្នើសុំឲ្យលោកនាយករដ្ឋមន្ត្រី ហ៊ុន សែន ជួយជាថវិកា ដល់ពួកគាត់ឲ្យបានយ៉ាងហោចណាស់ ៥០ភាគរយ នៃការខូចខាត ដើម្បីជាដើមទុនចាប់ផ្ដើមអាជីវកម្មជាថ្មី។
រាល់សំណើរបស់អាជីវករផ្សារច្បារអំពៅ មិនទាន់ទទួលបានការឆ្លើយតបយ៉ាងណា ពីអាជ្ញាធរទេ។ គេហទំព័រសារព័ត៌មានថ្មីៗ បានស្រង់សម្ដីអភិបាលខណ្ឌច្បារអំពៅ លោក ចេង មុនីរ៉ា បានត្រឹមសន្យា ជាមួយក្រុមអាជីវករថា នឹងយកសំណើទាំងអស់ ទៅពិភាក្សាគ្នាសិនហើយលោកក៏នៅមិនទាន់អាចកំណត់រយៈពេល និងទំហំ នៃការដោះស្រាយជូនក្រុមអាជីវករបាននៅពេលណាឡើយ។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ មើលឃើញថា អាជ្ញាធរគ្រប់ជាន់ថ្នាក់ក្នុងរបបលោក ហ៊ុន សែន គួរតែជួយតាមសំណើរបស់អាជីវកររងគ្រោះនៅផ្សារច្បារអំពៅ ព្រោះកន្លងមក លោកឃើញថា លោកនាយករដ្ឋមន្ត្រី ហ៊ុន សែន តែងបានជួយសាងសង់ផ្សារឡើងវិញ ក្រោយពេលឆេះ។ លោក សន ជ័យ គាំទ្រសំណើរបស់ក្រុមអាជីវករ ដែលស្នើសុំអាជ្ញាធរឲ្យជួយត្រឹមសំអាតផ្សារ និងសាងសង់ដំបូលរួមឲ្យខ្ពស់ ហើយសុខចិត្តសង់តូបខ្លួនឯង ដើម្បីបង្ការកុំឲ្យមន្ត្រីខិលខូច លួចបន្លំសង់តូបបន្ថែមពីលើតូបដែលមានចាស់ ឬកុំឲ្យកេងចំណេញពីលើករណី ឆេះផ្សារ ដូច្នេះ គួរធ្វើតាមសំណើរបស់អាជីវករ ព្រោះករណីបែបនេះ កើតឡើងច្រើនកន្លែងហើយ៖ «ជាបទពិសោធន៍ហ្នឹង អារឿងសង់តូប ខ្ញុំគិតថា តូបមិនសូវធំប៉ុន្មានទេ នៅតាមផ្សារ អ៊ីចឹងប្រជាពលរដ្ឋប្រហែលដោះស្រាយខ្លួនឯងបាន។ ប៉ុន្តែរឿងការខូចខាតទំនិញអីហ្នឹង ផ្សេងៗទៀត វាជារឿងមួយត្រូវមើលដែរ។ រឿងតូប ប្រជាពលរដ្ឋថា មិនបាច់ជួយទេ ធ្វើតែដំបូលឲ្យ ខ្ញុំគិតថា វាជារឿងមួយដែលល្អដែរ ព្រោះអីថា នេះជាចំណុចបារម្ភ ហើយរឿងនេះកើតឡើងច្រើន ដូចនៅករណីនៅស្ទឹងត្រែង កាលពីប៉ុន្មានឆ្នាំមុនវាធ្លាប់កើតឡើងដែរ។ អាហ្នឹងគេហៅថា អាជ្ញាធរខ្លះ ធ្លាប់មានបទពិសោធន៍ កន្ទេលធំបន្លំដេក។ ក្រោយភ្លើងឆេះហ្នឹងទៅ មានអ្នកខ្លះ បានផលប្រយោជន៍ពីអគ្គីភ័យ គ្រោះមហន្តរាយហ្នឹងដែរ»។
សង្គមស៊ីវិលសង្ឃឹមថា អាជ្ញាធរខណ្ឌច្បារអំពៅ នឹងមិនធ្វើឲ្យខូចឈ្មោះ ដូចអាជ្ញាធរផ្សេងទៀត ក្នុងរបបលោក ហ៊ុន សែន ដែលរងការចោទពីអាជីវការ ថាបានឆ្លៀតឱកាសកេងចំណេញពីអាជីវករក្នុងករណី ឆេះផ្សារ ហើយលួចសាងសង់តូបបន្ថែមពីលើតូបចាស់។ លោក សន ជ័យ ថា ទង្វើបែបនេះ នឹងធ្វើឲ្យអាជីវកររងវិបត្តិផ្លូវចិត្តកាន់តែខ្លាំង៕
From KI Media - Khmer Intelligence
via_IFTTT
0 Comments